ខេត្តកំពង់ចាម៖ ទោះបីជាខេត្តនេះមិនទាន់ត្រូវបានទឹកទន្លេមេគង្គហក់ឡើងដល់ក្នុងកំរិតប្រកាសឲ្យ
ប្រុងប្រយ័ត្នដែលមានកំពស់ទឹក១៥,២០ម៉ែត្រយ៉ាងណាក្តី ក៏អាជ្ញាធរខេត្តបានដាស់តឿនដល់មន្ត្រីជំនាញ
និងសមត្ថកិច្ចគ្រប់លំដាប់ថ្នាក់ឲ្យបង្កើនការយកចិត្តទុកដាក់ក្នុងការសង្គ្រោះពលរដ្ឋដែលរងគ្រោះដោយទឹកជំនន់ពីទន្លេមេគង្គ ។
លោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្ត មានប្រសាសន៍ឲ្យដឹងនៅរសៀលថ្ងៃទី
១៩ ខែកក្កដា ឆ្នាំ២០១៨ ថា ដោយមានការណែនាំពីរដ្ឋមន្ត្រីក្រសួងសុខាភិបាល ក៏ដូចជាលោកអភិបាលខេត្ត រូបលោកបានប្រជុំជាមួយនឹងមន្ត្រីក្រោមឱវាទ និងបានបែងបែកកម្លាំងសង្គ្រោះចំនួន៤ក្រុមមានទាំងផ្លូវគោក និងផ្លូវទឹក ជាមួយនោះមានថ្នាំសម្រាប់ព្យាបាលពស់ចឹកក៏បានបែងចែកទៅតាមគោលដៅរួចរាល់អស់ហើយដែរដើម្បីការពារសត្វអសិរពិសចឹកនរណាម្នាក់ ។
លោកប្រធានមន្ទីរសុខាភិបាលខេត្តបានមានប្រសាសន៍បន្តថា ផ្លូវគោកមានរថយន្តសាមុយសម្រាប់ដឹក និងផ្លូវទឹកមានអូប័រដើម្បីជួយពលរដ្ឋដែលរងគ្រោះដោយពស់ចឹកនោះ ។ ថ្វីត្បិតកំពស់ទឹកទន្លេមេគង្គដែលរហូតមកដល់ពលេនេះមិនទាន់បានឡើងមកជន់លិចនៅតាមបណ្តាភូមិឋាននានាក្តី តែមន្ត្រីសុខាភិបាលបានត្រៀមនូវលក្ខណៈសម្បត្តិគ្រប់គ្រាន់ក្នុងការសង្គ្រោះពីសត្វអសិរពិសចឹក។ ប្រសិនបើកើតមានលើពលរដ្ឋណាម្នាក់ សូមប្រញាប់មករកសេវាសុខាភិបាលជាបន្ទាន់ មិនត្រូវទុកបណ្តែតបណ្តោយនោះទេ ដើម្បីចៀសវាងកុំឲ្យគ្រោះថ្នាក់ដល់អាយុជីវិត ។
លោកគួច ចំរើន អភិបាលខេត្តបានមានប្រសាសន៏ឲ្យដឹងនៅកន្លែងប្រារព្ធបុណ្យរុក្ខទិវាវិទ្យាល័យសម្តេច
ជួន ណាត ស្រុកកំពង់សៀមបានឲ្យដឹងថា សូមឲ្យអាជ្ញាធរនៅតាមបណ្តាស្រុកជាប់ដងទន្លេមេង្គត្រូវតែទាក់ទងជាមួយនឹងម្ចាស់កាណូតឲ្យបានជាប់លាប់ ប្រសិនបើទឹកឡើងមកលិចភូមិឋាននោះនឹងត្រូវយកកាណូតនោះទៅដឹកពួកគាត់មកកាន់ទីទួលសុវត្ថិភាព ។ ជាមួយនោះពលរដ្ឋក៏ត្រូវបង្កើនការប្រុងប្រយ័ត្នចៀសវាងកុំឲ្យកូនក្មេងតូចៗងូតទឹកទន្លេ បណ្តាលឱ្យលង់ទឹកស្លាប់ ហើយមន្ទីរសុខាភិបាលខេត្តក៏ត្រូវត្រៀមលក្ខណៈសម្បត្តិ ក្នុងនោះមានថ្នាំសម្រាប់ព្យាបាលពស់ចឹក ដើម្បីជួយពលរដ្ឋផងដែរ ៕
ចែករំលែកព័តមាននេះ