ខេត្តសៀមរាប ៖ ភ្ញៀវជាតិ និងអន្តរជាតិ ជាពិសេសពលរដ្ឋក្នុងខេត្តសៀមរាបមានជំនឿទៅលើព្រះអង្គចេកព្រះអង្គចម និងលោកយាយទេព អ្នកខ្លះនាំគ្នាទិញផ្កាផ្ញី ធម៌ដូង អ្នកខ្លះទិញផ្លែឈើ ដើម្បីចូលអុជធូបបួងសួងសុំសេចក្តីសុខសប្បាយ និងប៉ងប្រាថ្នាអ្វីៗតែងតែបានសម្រេចជារៀងរាល់ដងទើបពួកគាត់នាំគ្នាទិញជាគ្រឿងប្រដាប់បូជាមកថ្វាយជូនដល់ព្រះអង្គចេកព្រះអង្គចម និងលោកយាយទេពវិញ ដើម្បីកុំឱ្យមានកម្មពារទៅជាតិក្រោយ ។
លោក ពូ សុជាតិ ដែលរស់នៅខេត្តបាត់ដំបងបានរៀបរាប់ប្រាប់ថា ពួកគាត់បាននាំកូនចៅមកលេងនៅក្នុងខេត្តសៀមរាប តែងតែនាំគ្នាចូលអុជធូបបួងសួងនៅកន្លែងទាំង២នោះ គឺអុជនៅ ព្រះវិហារព្រះអង្គចេក ព្រះអង្គចមមុនរួចបានទៅអុជធូបនៅកន្លែងលោកយាយទេព ដើម្បីសុំសេចក្តីសុខសប្បាយដល់ក្រុមគ្រួសារ ។
លោកពូបានបញ្ជាក់ផងដែរថា ចំពោះនៅខេត្តបាត់ដំបងវិញគេតែងនាំគ្នាទៅអុជធូបសុំសេចក្តីសុខសប្បាយនៅកន្លែងលោកតាដំបងគ្រញូងដូចនៅខេត្តសៀមរាបដែរព្រោះ ពួកយើងទាំងអស់គ្នាដែលជាជនជាតិខ្មែរតែងតែមានជំនឿទៅលើសាសនាព្រះពុទ្ធគ្រប់ៗគ្នា ។
រីឯអ៊ុំ ស្រីម្នាក់ដែលរស់នៅខេត្តព្រះវិហារបានសម្តែងការសប្បាយរីករាយថា កាលពីជំនាន់មុន ក្រុមគ្រួសារនាងខ្ញុំគ្មានសេចក្តីសុខសប្បាយដូចសព្វថ្ងៃនេះទេដោយសារផ្លូវពិបាកក្នុងការធ្វើដំណើរទៅមក ប៉ុន្តែមកដល់បច្ចុប្បន្នបានគុណសម្តេចតេជោ ហ៊ុន សែន កុំអីពួកនាងខ្ញុំនៅខេត្តព្រះវិហារគ្មានបានឃើញភ្នំពេញ ឬខេត្តផ្សេងៗដូចសព្វថ្ងៃនោះទេ ។ អ៊ុំស្រីបានរៀបរាប់បន្តថា ចំពោះពលរដ្ឋគ្រប់រូបតែងតែមានការជឿទៅលើជំនឿនៃសាសនាព្រះពុទ្ធវាមិនខុសពីសាសនាគេប៉ុន្មានទេ ជាក់ស្តែងនៅរសៀលនេះពួកខ្ញុំបានចូលមកលេងសៀមរាបក៏បានឈៀងចូលមកអុជអូបនៅកន្លែងព្រះវិហារព្រះអង្គចេកព្រះអង្គចម និងលោកយាយទេពព្រោះ នៅជិតគ្នា ដើម្បីសុំសេចក្តីសុខសប្បាយដល់កូនចៅគ្រប់ៗគ្នាផងដែរមុន និងទៅដើរលេងនៅតាមប្រាសាទនានាក្នុងខេត្តសៀមរាប ។
លោក បូរី មគ្គុទេស ទេសចរណ៍ចិនបានប្រាប់នៅកន្លែងមុខព្រះអង្គចេកព្រះអង្គចមនៅរសៀលថ្ងៃនេះថា ភ្ញៀវចិនស្រីប្រុសក្មេងចាស់ដែលបានចូលមកដើរទស្សនាកម្សាន្តតាមរមណីយដ្ឋាន និងតាមប្រាសាទនានានៅលើទឹកដីប្រវត្តិសាស្ត្រនៃខេត្តសៀមរាបព្រមទាំងនាំគ្នាចូលមកអុជធូបបួងសួងសុំសេចក្តីសុខសប្បាយដូចជនជាតិខ្មែរយើងដែរនោះពួកគេសប្បាយចិត្តដោយឃើញខេត្តសៀមរាបមានសន្តិសុខល្អមិនខុសពីនៅភ្នំពេញ ឬខេត្តនានាឡើយ ។ ដូច្នេះពួកគេបាននាំគ្នានិយាយតៗគ្នាថា ពួកគេទៅប្រទេសគេវិញគេនឹងនិយាយ ប្រាប់បងប្អូន ឬមិត្តភក្តិឱ្យមកលេងនៅស្រុកខ្មែរឱ្យបានច្រើនផងដែរ ។
ចំណែកលោក សូរ ប្លាតុង អភិបាលក្រុងសៀមរាបបានប្រាប់តាមទូរស័ព្ទនៅព្រឹកថ្ងៃទី១៩ ខែកក្កដា ឆ្នាំ២០១៨នេះថា ចំពោះកន្លែងព្រះវិហារព្រះអង្គចេកព្រះអង្គចម និងលោកយាយទេព នេះដែលពុទ្ធបរិស័ទ្ធជិតឆ្ងាយ ព្រមទាំងភ្ញៀវបរទេសតែងតែនាំគ្នាមកចូលអុជធូបសុំសេចក្តីសុខសប្បាយគ្រប់ៗគ្នានោះ ។
ជុំវិញករណីខាងលើលោក វ៉ាន់ ប៊ុនណា ប្រធានមន្ទីរធម្មការ និងសាសនាខេត្តបានប្រាប់កោះសន្តិភាពនៅវេលាម៉ោង១១ និង០០នាទីព្រឹកថ្ងៃទី១៩ ខែកក្កដា ឆ្នាំ២០១៨នេះថា ការចំណូលបានមកពីភ្ញៀវដែលចូលមកអុជធូប បួងសួងនៅកន្លែងព្រះវិហារព្រះអង្គចេកព្រះអង្គចម និងលោកយាយទេពនោះ គឺមានគណៈកម្មាជាអ្នកចាត់ចែងទាំងអស់ ហើយមានបិទក្រដាសបទបញ្ជាផ្ទែក្នុងនៅក្នុងបរិវេណព្រះវិហារព្រះអង្គចេកព្រះអង្គចមនោះផងដែរ ៕
ចែករំលែកព័តមាននេះ