ក្រុមហ៊ុនបច្ចេកវិទ្យាធំៗបានព្យាយាមដោះស្រាយបញ្ហាការញៀនប្រើប្រាស់បច្ចេកវិទ្យា និងផលប៉ះពាល់ទៅលើសុខភាព, ប្រសិទ្ធភាពការងារ និងនយោបាយ ។ កម្មវិធី Forest បានបង្ហាញរូបដើមឈើ១ដើមនៅលើទូរស័ព្ទរបស់អ្នកប្រើប្រាស់ ។ ដើមឈើនេះ នឹងចាប់ផ្តើមលូតលាស់នៅពេលពួកគេមិនប្រើទូរស័ព្ទ ប៉ុន្តែវានឹងងាប់បន្តិចម្តងៗ នៅពេលពួកគេប្រើ ។
សម្រាប់ទូរស័ព្ទ Android អេក្រង់ទូរស័ព្ទនឹងប្តូរទៅពណ៌ស-ខ្មៅ នៅពេលជិតដល់ម៉ោងចូលដំណេក ។ កាលពីខែមុន ក្រុមហ៊ុន Apple បានចេញបច្ចេកវិទ្យាមួយ ដែលអនុញ្ញាតឲ្យអ្នកអាចតាមដាន និងដាក់កម្រិតពេលវេលាចំណាយលើទូរស័ព្ទទៀតផង ។
ការប្រើប្រាស់បច្ចេកវិទ្យាដើម្បីព្យាបាលបញ្ហាដែលបង្កឡើងដោយបច្ចេកវិទ្យា គឺអាចនឹងមានប្រសិទ្ធភាព ជាពិសេស ក្រុមហ៊ុនទាំងនេះបានប្រមូលទិន្នន័យជាច្រើនពីការប្រើប្រាស់ទូរស័ព្ទរបស់ពួកគេ ។
ប៉ុន្តែការពឹងផ្អែកលើក្រុមហ៊ុនបច្ចេកវិទ្យាធំៗ ដើម្បីជួយឲ្យអ្នកប្រើប្រាស់កាត់បន្ថយពេលដែលចំណាយលើស្មាតហ្វូនរបស់ពួកគេ គឺផ្ទុយទៅនឹងផលប្រយោជន៍ក្រុមហ៊ុន ។ វាអាចបង្កឲ្យអ្នកប្រើប្រាស់កាន់តែពឹងផ្អែកលើក្រុមហ៊ុនបច្ចេកវិទ្យាកាន់តែខ្លាំងឡើង និងកាត់បន្ថយសមត្ថភាពអប់រំខ្លួនឯង ។
វាស្រដៀងនឹងការពឹងផ្អែកលើទំនើបកម្មបច្ចេកវិទ្យាសម្រាប់ដោះស្រាយបញ្ហាបម្រែបម្រួលបរិយាកាស ដែលជាបញ្ហាមួយចូលរួមបង្កដោយបច្ចេកវិទ្យា ។ វាប្រហែលជាមានប្រសិទ្ធភាព ប៉ុន្តែក៏ធ្វើឲ្យមនុស្សកាត់បន្ថយការគិតដើម្បីដោះស្រាយបញ្ហាដោយខ្លួនឯងដែរ ។
អ្នកនិពន្ធ លោក Cal Newport បានមានប្រសាសន៍ថា ៖« អ្នកប្រើប្រាស់ចង់រវល់នឹងអ្វីផ្សេងដែលពិបាក និងសំខាន់ រហូតដល់ពួកគេភ្លេចពីទូរស័ព្ទ » ។
ប្រហែលជាដំណោះស្រាយបញ្ហានេះ មិនមែនព្យាបាលការញៀននឹងទូរស័ព្ទដៃទេ ប៉ុន្តែគឺធ្វើឲ្យអ្នកប្រើប្រាស់អាចជ្រើសយកជីវិតមួយ ដែលទូរស័ព្ទដៃរបស់ពួកគេមិនអាចប្រកួតប្រជែងបាន ៕
ចែករំលែកព័តមាននេះ