អ្នកប្រើប្រាស់ស្មាតហ្វូន មិនថាឧស្សាហ៍ប្រើឬអត់ទេ តែងតែស្វែងរកវិធីដើម្បីអាចសន្សំសំចៃថ្មទូរស័ព្ទរបស់ពួកគេឲ្យបានច្រើន ។ ប្រសិនបើទូរស័ព្ទរបស់អ្នកមានអាយុកាលជាង១ឆ្នាំហើយ អ្នកប្រហែលជាប្រទះឃើញថា ថ្មទូរស័ព្ទហាក់អស់លឿនជាងមុន ។ ប្រាកដណាស់ ថ្មទូរស័ព្ទធ្លាក់ចុះទៅតាមអាយុកាលរបស់ទូរស័ព្ទ…
អ្នកប្រើប្រាស់ស្មាតហ្វូន មិនថាឧស្សាហ៍ប្រើឬអត់ទេ តែងតែស្វែងរកវិធីដើម្បីអាចសន្សំសំចៃថ្មទូរស័ព្ទរបស់ពួកគេឲ្យបានច្រើន ។ ប្រសិនបើទូរស័ព្ទរបស់អ្នកមានអាយុកាលជាង១ឆ្នាំហើយ អ្នកប្រហែលជាប្រទះឃើញថា ថ្មទូរស័ព្ទហាក់អស់លឿនជាងមុន ។
ប្រាកដណាស់ ថ្មទូរស័ព្ទធ្លាក់ចុះទៅតាមអាយុកាលរបស់ទូរស័ព្ទ ប៉ុន្តែវាមិនមែនមានន័យថា គ្មានវិធីដោះស្រាយសម្រាប់ការរក្សាសុខភាពថ្មទូរស័ព្ទឡើយ ។ ខាងក្រោមនេះ គឺជាវិធីមួយចំនួនដែលអាចធ្វើឲ្យទូរស័ព្ទរបស់អ្នករក្សាថ្មបានយូរ ៖
១-បញ្ចូលថ្មបន្តិចម្តង ៖
ការបញ្ចូលថ្មម្តងបន្តិច គឺល្អសម្រាប់ថ្មបែប Lithium-ion ។ នៅពេលទូរស័ព្ទជិតអស់ថ្ម ថ្មទាំងនេះនឹងទាញចរន្តភ្លើងថេរ ខណៈមិនទាញចរន្តខ្លាំងពេកទេ ។ ប៉ុន្តែចរន្តដែលទាញនឹងបន្តកើនឡើង ប្រសិនបើទូរស័ព្ទមានថ្មច្រើន ។ ការទាញចរន្តទាប គឺល្អសម្រាប់សុខភាពថ្មទូរស័ព្ទ ។ ដូច្នេះ ការបញ្ចូលថ្មត្រឹមពី៣០ទៅ៨០% វានឹងរក្សាការទាញចរន្តទាប ព្រមទាំងអាចជួយដល់សុខភាពថ្មបាន ។
២-ចៀសវាងការបញ្ចូលថ្មទុកចោល ៖
ការបញ្ចូលថ្មពេញ១យប់ ឬ១ថ្ងៃ គឺជាទម្លាប់មួយរបស់អ្នកប្រើប្រាស់ជាច្រើន ប៉ុន្តែវាមិនល្អសម្រាប់ទូរស័ព្ទឡើយ ។ ជាដំបូង ការសាកថ្មយូរពេក គឺអាចកាត់បន្ថយលំនឹងទូរស័ព្ទ និងបង្កឲ្យមានបញ្ហាបច្ចេកទេសផ្សេងៗ ដែលធ្វើឲ្យទូរស័ព្ទបិទ និងបើកដោយខ្លួនឯង ជាដើម ។ លើសពីនេះ វាធ្វើឲ្យទូរស័ព្ទបន្តទាញចរន្តភ្លើងខ្ពស់ ដែលប៉ះពាល់ដល់សុខភាពថ្ម ខណៈបង្កឲ្យទូរស័ព្ទឆាប់ក្តៅ និងខាតបង់ភ្លើង ជាដើម ។
៣-សីតុណ្ហភាពទូរស័ព្ទ ៖
សីតុណ្ហភាពខ្ពស់អាចប៉ះពាល់ដល់សុខភាពថ្មទូរស័ព្ទ និងបង្កឲ្យថ្មបាត់បង់សមត្ថភាពផ្ទុកភ្លើងលឿនជាងមុន ដូចនឹងចរន្តភ្លើងខ្ពស់ដែរ ។ ការបញ្ចូលថ្មរហូតដល់ពេញពេកអាចបង្កឲ្យទូរស័ព្ទក្តៅឡើង ហើយការបញ្ចូលថ្មទូរស័ព្ទដាក់នៅលើខ្នើយកើយពេលយប់ ក៏អាចធ្វើឲ្យទូរស័ព្ទឆាប់ក្តៅផងដែរ ។
ម្យ៉ាងទៀត បច្ចេកវិទ្យាបញ្ចូលថ្មឲ្យឆាប់ពេញ ក៏ជាបញ្ហាមួយដែរ ព្រោះការទាញចរន្តភ្លើងខ្ពស់ពេក វានឹងធ្វើឲ្យទូរស័ព្ទឆាប់ក្តៅ ។ ប៉ុន្តែការបញ្ចូលថ្មពី១៥ទៅ២០នាទីម្តង គឺមិនបង្កឲ្យទូរស័ព្ទឡើងកម្តៅទេ ៕
ចែករំលែកព័តមាននេះ