រាជធានីភ្នំពេញ ៖ អ្នកប្រើប្រាស់គ្រឿងអេឡិចត្រូនិកនៅតាមផ្ទះ និងការិយាល័យបច្ចុប្បន្ន កំពុងតែរអ៊ូរទាំពីសម្ភាររបស់ពួកគាត់ហាក់ដូចប្រើមិនបានយូរ ដូចជា ទូរទស្សន៍ស្ដើងៗ, កុំព្យូទ័រលើតុ និងម៉ាស៊ីកូពី ដែលសុទ្ធសឹងជាសម្ភារថ្លៃៗ…
រាជធានីភ្នំពេញ ៖ អ្នកប្រើប្រាស់គ្រឿងអេឡិចត្រូនិកនៅតាមផ្ទះ និងការិយាល័យបច្ចុប្បន្ន កំពុងតែរអ៊ូរទាំពីសម្ភាររបស់ពួកគាត់ហាក់ដូចប្រើមិនបានយូរ ដូចជា ទូរទស្សន៍ស្ដើងៗ, កុំព្យូទ័រលើតុ និងម៉ាស៊ីកូពី ដែលសុទ្ធសឹងជាសម្ភារថ្លៃៗ គឺងាយនឹងឆាប់ឆេះស្គ្រីន, ខូច Hard disk ឬឆេះឧបករណ៍ចម្លងចរន្ដជាដើម ។ តើនេះមកពីគុណភាពនៃផលិតផល ឬក៏មកពីចរន្ដអគ្គិសនីមិនមានស្ថិរភាព ?
បើតាមលោកឧកញ៉ា សុខ ពិសិដ្ឋ ជាអ្នកជំនួញនាំចូលគ្រឿងអេឡិចត្រូនិកធំមួយមកកម្ពុជា បានលើកឡើងថា ផលិតផលអេឡិចត្រូនិកដែលនាំចូលស្របច្បាប់ គេផលិតឡើងតាមស្ដង់ដា ព្រោះគេមិនបានសិក្សាពីទីផ្សារ ឬកម្លាំងថាមពលអគ្គិសនីរបស់កម្ពុជាទេ ។ ដូច្នេះ បើគ្រឿងអេឡិចត្រូនិកនោះ ត្រូវបានទទួលស្គាល់ជាអន្តរជាតិ និងនាំចូលត្រឹមត្រូវតាមច្បាប់នោះ គុណភាពវាមិនសូវមានបញ្ហាទេ ។ ផ្ទុយមកវិញ បើផលិតដែលនាំចូលគេចពន្ធ មិនមែននាំចូលដោយក្រុមហ៊ុនស្របច្បាប់ មានន័យថា ផលិតផលក្លែងបន្លំ វាកាន់តែធ្វើឲ្យអ្នកប្រើប្រាស់ពិបាកថែមទៀត ។
បន្ថែមលើនេះ លោកឧកញ៉ាក៏បានលើកឡើងដែរថា អាជីវករ ឬក្រុមហ៊ុននានាដែលនាំចូលគ្រឿងអេឡិចត្រូនិកមកទីផ្សារប្រទេសកម្ពុជា គួរតែសិក្សាឲ្យបានច្បាស់លាស់ពីទំហំ ឬកម្លាំងថាមពលអគ្គិសនី ។ លោកថា ៖« ថ្វីដ្បិតតែកម្លាំងអគ្គិសនីមានទំហំ២២០វ៉ុលដូចគ្នា ប៉ុន្តែពីប្រទេសមួយទៅប្រទេសមួយ មិនប្រាកដថាដូចគ្នាទាំងអស់នៅទេ ។ ជាក់ស្ដែង បើយើងប្រៀបធៀបកម្លាំងអគ្គិសនីនៅតាមបណ្ដាខេត្តមួយចំនួន ទៅនឹងរាជធានីភ្នំពេញ ប្រាកដជាខុសគ្នា » ។
ទោះយ៉ាងនេះក្ដី លោកឧកញ៉ាបន្ថែមថា ចរន្ដអគ្គិសនីឡើងចុះ ឬដាច់ចរន្ដញឹកញាប់ ក៏បណ្ដាលឲ្យគ្រឿងអេឡិចត្រូនិកទាំងនោះឆាប់ខូចខាតដែរ ពិសេសនៅតាមបណ្ដាខេត្តដែលអគ្គិសនីពេលខ្លះឡើងខ្លាំង និងពេលខ្លះចុះខ្លាំងពេក ឬដាច់ញឹកញាប់តែម្ដង ។ លោកថ្លែងថា ៖« នៅតាមខេត្តមួយចំនួន កម្លាំងអគ្គិសនីពេលខ្លះឡើងខ្លាំង ពេលខ្លះចុះខ្សោយខ្លាំង ដែលអាចបណ្ដាលឲ្យគ្រឿងអេឡិចត្រូនិកឆាប់ខូច ប្រើមិនបានយូរ ហើយបើសិនជាគ្រឿងអេឡិចត្រូនិកនោះមិនសូវមានគុណភាព ហើយមិនមានឧបករណ៍ទប់ភ្លើងត្រឹមត្រូវនោះទេ វាកាន់តែឆាប់ខូចទៅទៀត » ។
លោក ទ្រី សុខហេង មន្ត្រីអគ្គិសនីកម្ពុជា បានឲ្យដឹងថា វាជាការពិតណាស់ បើសិនជាកម្លាំងថាមពលអគ្គិសនីដើរមិនស្មើ មានន័យថា ម្ដងឡើង ម្ដងចុះ វាអាចនឹងបណ្ដាលឲ្យឧបករណ៍អេឡិចត្រូនិកប្រើប្រាស់ក្នុងផ្ទះ ឬការិយាល័យឆាប់ខូច ។ លោកសុខហេង បន្ដថា ៖« បើសិនជាយូរៗឡើងចុះ ឬដាច់ម្ដង វាមិនជាបញ្ហាទេ តែបើសិនជាញឹកញាប់ វានឹងកាន់តែធ្វើឲ្យគ្រឿងអេឡិចត្រូនិកឆាប់ខូចកាន់តែខ្លាំង » ។
លោកឧកញ៉ា សុខ ពិសិដ្ឋ ក៏បានសំណូមពរដល់ពលរដ្ឋគួរទិញ ឬប្រើប្រាស់ផលិតផលណាដែលនាំចូលដោយក្រុមហ៊ុនត្រឹមត្រូវស្របច្បាប់ ដើម្បីប្រយោជន៍ខ្លួនឯងផង និងសង្គមជាតិផង ។ លោកថ្លែងថា ៖« ពេលបងប្អូនទិញមកហើយមានបញ្ហា មិនដឹងយកផលិតផលនោះ ទៅជួសជុលនៅកន្លែងណាឲ្យមានគុណភាព ឬត្រូវហៅអ្នកណាមកជួសជុលដល់ផ្ទះ ដូចនេះយើងសំណូមឲ្យពលរដ្ឋដែលជាអ្នកប្រើប្រាស់ទាំងឡាយ ចូរទិញ ឬគាំទ្រផលិតផលណាដែលនាំចូលដោយបង់ពន្ធត្រឹមត្រូវស្របច្បាប់ ដើម្បីខ្លួនឯងផង និងសង្គមជាតិផង » ។
បើតាមការណែនាំរបស់ក្រុមហ៊ុនផលិតគ្រឿងអេឡិចត្រូនិក ដើម្បីការពារគ្រឿងអេឡិចត្រូនិកដែលប្រើប្រាស់នៅតាមគេហដ្ឋាន អ្នកប្រើប្រាស់គួរតែអនុវត្ត ដោយបិទឧបករណ៍អេឡិចត្រូនិកនោះរាល់ពេលឈប់ប្រើ ឬមានឧបករណ៍ទប់ចរន្ដ ហើយរាល់ពេលទិញឧបករណ៍អេឡិចត្រូនិកពីក្រុមហ៊ុន ត្រូវសួររកប័ណ្ណធានារ៉ាប់រងពីក្រុមហ៊ុន ពីព្រោះវាមានអត្ថប្រយោជន៍ខ្ពស់ចំពោះអ្នកប្រើប្រាស់ បើសិនជាឧបករណ៍អេឡិចត្រូនិកនោះខូច ឬមានបញ្ហានៅក្នុងអំឡុងពេលធានានោះ នឹងមិនត្រូវបង់ថ្លៃក្នុងពេលជួសជុលឡើយ ៕
ចែករំលែកព័តមាននេះ