ពិភពលោករបស់យើងនាពេលបច្ចុប្បន្ន បានអភិវឌ្ឍទៅលើបច្ចេកវិទ្យាគួរឲ្យកត់សម្គាល់។ អ្វីៗដែលយើងធ្លាប់គិតស្រមៃថា អស្ចារ្យ និងខ្លាំងកាលពីនៅកុមារភាព ពេលនេះ គឺមានមែនហើយ ។ យើងមានទូរស័ព្ទដែលអាចប្រើជំនួសកុំព្យូទ័របាន ហើយមានរថយន្តអាចធ្វើជាផ្ទះរស់នៅបាន ។ អ្វីកាន់តែពិសេសនោះ យើងនឹងមានរថយន្តអាចហោះបាន ដែលនឹងអាចធ្វើដំណើរលើអាកាសនាពេលខាងមុខ ។
ពេលនេះ ក្រុមហ៊ុន Airbus និង Audi កំពុងសហការគ្នាលើគម្រោងផលិតរថយន្តតាក់ស៊ីហោះ ខណៈក្រុមហ៊ុនតាក់ស៊ី Uber កំពុងផលិតរថយន្តតាក់ស៊ីហោះនៅទីក្រុងប៉ារីស ប្រទេសបារាំង ។
អ្វីគួរឲ្យភ្ញាក់ផ្អើលនោះ គឺថាក្រុមហ៊ុន Rolls Royce ក៏ចូលរួមក្នុងគម្រោងផលិតរថយន្តតាក់ស៊ីហោះដែរ ។
គួរបញ្ជាក់ថា Rolls Royce មិនមែនជាក្រុមហ៊ុនរថយន្តប្រណីត Rolls Royce ទេ ។ វាជាក្រុមហ៊ុនម៉ាស៊ីន Rolls Royce ដែលបានបែកចេញពីក្រុមហ៊ុនរថយន្ត Rolls Royce តាំងពីរាប់ទសវត្សរ៍មុនមកម្ល៉េះ ។
ក្រុមហ៊ុនម៉ាស៊ីន Rolls Royce បានគិតគូរលើការប្រឡូកក្នុងវិស័យផលិតរថយន្តតាក់ស៊ីហោះ ជាមួយនឹងការផលិតរថយន្តអគ្គិសនី ដែលអាចបើកបរបានក្នុងល្បឿន៤០០គីឡូម៉ែត្រក្នុង១ម៉ោង ។
Rolls Royce ជឿជាក់ថា គម្រោងរបស់ខ្លួន នឹងអាចសម្រេចបាននៅរយៈពេល១០ឆ្នាំខាងមុខនេះ ជាពេលស្របគ្នានឹងការប្រកួតប្រជែងជាមួយដៃគូផ្សេងទៀត ។
លោក Rob Watson ប្រធានផ្នែកអេឡិចត្រូនិចរបស់ក្រុមហ៊ុនម៉ាស៊ីន Rolls Royce បានប្រាប់ថា ម៉ូឌែលរថយន្តដែលប្រើអគ្គិសនីខាងលើ អាចនឹងបង្ហាញខ្លួននៅអំឡុងឆ្នាំ២០២៥ ។ ប៉ុន្តែលោកមិនទាន់បានប្រាប់ថា តាក់ស៊ីហោះនោះនឹងអាចចេញនៅឆ្នាំណាប្រាកដនៅឡើយទេ ៕
ចែករំលែកព័តមាននេះ