ខេត្តឧត្តរមានជ័យ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ក្នុងគ្រោះថ្នាក់ចរា ចរណ៍ដែលបង្កឡើងរវាងរថយន្តបុកជាមួយនឹងម៉ូតូក្នុងទិសដៅបញ្ច្រាសទិសគ្នា ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៨ ខែកក្កដា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៦៨B…
ខេត្តឧត្តរមានជ័យ ៖ បុរសម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ក្នុងគ្រោះថ្នាក់ចរា
ចរណ៍ដែលបង្កឡើងរវាងរថយន្តបុកជាមួយនឹងម៉ូតូក្នុងទិសដៅបញ្ច្រាសទិសគ្នា ។ ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៨ ខែកក្កដា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៦៨B ក្នុងភូមិគីរីវន័ សង្កាត់កូនគ្រៀល ក្រុងសំរោង ខេត្តឧត្តរមានជ័យ ។
ជនរងគ្រោះដែលស្លាប់ឈ្មោះយ៉ម យឿម ភេទប្រុស អាយុ៥២ឆ្នាំ រស់នៅភូមិគីរីវន័ សង្កាត់កូនគ្រៀល ក្រុងសំរោង ខេត្តឧត្តរមានជ័យ រីឯម៉ូតូមួយគ្រឿងរបស់ជនរងគ្រោះម៉ាកសង់កូរ៉េ គ្មានស្លាកលេខ ចំណែករថយន្តម៉ាក RX ៣០០ ពណ៍ស្ករ ពាក់ស្លាកលេខ ភ្នំពេញ ២T-៧២៧១ អ្នកបើកមិនត្រូវបានស្គាល់អត្តសញ្ញាណ បានរត់គេចខ្លួនបាត់ស្រមោល ។
យោងតាមសាក្សីនៅនឹងកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្ត និងម៉ូតូធ្វើដំណើរក្នុងទិសដៅបញ្ច្រាសគ្នា ហើយនៅពេលកើតហេតុ គេបានឃើញភាគីខាងម៉ូតូបើកបរមិនប្រកាន់ស្តាំរបស់ខ្លួនឡើយ ខណៈរថយន្តខាងលើបើកបរក្នុងល្បឿនលឿនក៏បុកម៉ូតូយ៉ាងពេញទំហឹងតែម្តង បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ ចំណែកអ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ ។
ប៉ូលិសក្រុងសំរោងបានឱ្យដឹងថា ក្រោយពីកើតហេតុ ប៉ូលិសជំនាញបានចុះទៅដល់កន្លែងកើតហេតុ ធ្វើការវាស់វែង និងពិនិត្យនៅកន្លែងកើតហេតុឃើញថាអ្នកបើកបរម៉ូតូខ្វះការប្រុងប្រយ័ត្ន បន្ទាប់ពីបានពិនិត្យរួច សមត្ថកិច្ចបានប្រគល់សពជនរងគ្រោះទៅឱ្យក្រុមគ្រួសារយកទៅធ្វើបុណ្យតាមប្រពៃណី ចំណែករថយន្ត និងម៉ូតូត្រូវបានសមត្ថកិច្ចយកទៅរក្សាទុកនៅអធិការក្រុងសំរោងរង់ចាំធ្វើការដោះស្រាយ៕
ចែករំលែកព័តមាននេះ