ខេត្តកំពង់ស្ពឺ ៖ រថយន្តធុនធំមួយគ្រឿងដឹកចំណីសត្វត្រូវបានកម្លាំនគរបាលចរាចរណ៍ក្រុងច្បារមនធ្វើការឃាត់យកទៅរក្សាទុកនៅសាលាក្រុងរង់ចាំម្ចាស់ក្រុមហ៊ុនចេញមុខមកធ្វើការជួសជុលផ្លូវជាតិរួចហើយសិន ។
រថយន្តធុនធំខាងលើនេះដឹកចំណីសត្វរបស់ក្រុមហ៊ុន ស៊ិន ណាក្រូ ត្រូវបានដឹងថា ដឹកលើសទម្ងន់កំណត់ទើបស្រុតផ្លូវបែបនេះ ។ ការផុងនេះដែរគឺអ្នកបើកបរបានឈប់ចតម្តុំវិមានឯករាជកាលពីវេលាម៉ោង០៩ព្រឹក ថ្ងៃទី១៨ ខែកក្កដា ឆ្នាំ២០១៨ នៅចំណុចរង្វង់មូលវិមានឯករាជ មុខសាលាខេត្តកំពង់ស្ពឺ ស្ថិតនៅក្នុងភូមិទួលគោក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ ។
រថយន្តដែលដឹកលើសទម្ងន់ហើយនគរបាលអូសយកទៅរក្សាទុកនោះម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពត 1A-0391 អ្នកបើកបរមានឈ្មោះ ជុន វី ភេទប្រុស អាយុ២៤ឆ្នាំ មុខរបរបើកបររថយន្ត រស់នៅក្នុងភូមិតាព្រហ្ម ឃុំមានជ័យ ស្រុកឧដុង្គ ខេត្តកំពង់ស្ពឺ និងរួមដំណើរដោយព្រូឡានម្នាក់ទៀតមិនទាន់ស្គាល់អត្តសញ្ញាណនោះទេ គ្រាន់តែដឹងថា មានអាយុជិត២០ឆ្នាំប៉ុណ្ណោះ ។
បើតាមសម្តីរបស់អ្នកបើកបររថយន្តបានអោយដឹងថា រូបគេបានដឹកចំណីសត្វនៅក្នុងរថយន្តនេះជិត១០តោនចេញពីក្រុមហ៊ុន ស៊ិន ណាក្រូ ដែលមានទីតាំងក្នុងស្រុកឧដុង្គ ដឹកយកមកចែកចាយតាមដេប៉ូនានាក្នុងខេត្តកំពង់ស្ពឺរហូតដល់ខេត្តតាកែវ ស្រាប់តែបើកឆ្លងកាត់ស្ពានមួយខាងត្បូងផ្សារកំពង់ស្ពឺមកឈប់អែបរង្វង់មូលវិមានឯករាជក៏បានផុងជាប់បណ្តាលអោយខូចថ្នល់ជាតិតែម្តង ហើយត្រូវបានកម្លាំងនគរបាលចរាចរណ៍ក្រុងដឹកអូសយកទៅរក្សាទុកនៅសាលាក្រុងច្បារមនរង់ចាំធ្វើការជួសជុលផ្លូវអោយបានស្អាតដូចដើមវិញ និងធ្វើការផាកពិន័យទើបអោយរថយន្តបន្តដំណើរទៅមុខទៀត ។
បើតាមសម្តីរបស់មន្ត្រីនគរបាលចរាចរណ៍ក្រុងច្បារមនបាននិយាយអោយដឹងថា ដោយសារតែរថយន្តខាងលើដឹកទំនិញលើសទម្ងន់ហើយបណ្តាលអោយខូចខាតផ្លូវជាតិរង្វង់មូលវិមានឯករាជទើបលោកអភិបាលក្រុង និងលោកអភិបាលខេត្តអោយអូសយកទៅរក្សាទុកនៅសាលាក្រុងច្បារមនដើម្បីអោយម្ចាស់ក្រុមហ៊ុនចូលខ្លួនមកធ្វើការជួសជុលផ្លូវដែលរងការខូចខាតនោះអោយមានសភាពល្អដូចដើមវិញ និងធ្វើការផាកពិន័យអប់រំណែនាំ ធ្វើកិច្ចសន្យាទើបអោយបន្តដំណើរទៅមុខទៀត ៕
ចែករំលែកព័តមាននេះ