ខេត្តកណ្ដាល ៖ បុរសម្នាក់ជិះទូករាយមងចាប់ត្រីមងរុំជាប់ខ្លួនប្រឹងរើបំរាស់ក្រឡាប់ទូកធ្លាក់ទឹកលង់ស្លាប់ កាលពីវេលាម៉ោង៥និង៤០នាទីល្ងាច ថ្ងៃទី១៨ កក្កដា នេះនៅចំណុចព្រែកចិន ស្ថិតនៅភូមិទេពអរជូន ឃុំកោះខែល ស្រុកស្អាង ខេត្តកណ្តាល ។ ជនរងគ្រោះឈ្មោះ ឡន សារី ភេទប្រុស អាយុ៣៥ឆ្នាំ មុខរបរកសិករ មានទីលំនៅ ភូមិទេពអរជូន ឃុំកោះខែល ស្រុកស្អាង ខេត្តកណ្ដាល ។
ដើមចមបណ្តាលឲ្យអ្នករាយមងចាប់យកត្រីនោះលង់ទឹកស្លាប់ ត្រូវបានកូនស្រីជនរងគ្រោះឈ្មោះ ស្រីនូ អាយុ១០ឆ្នាំ រៀបរាប់ប្រាប់សមត្ថកិច្ចថា មុនកើតហេតុឪពុកនាងបានដាក់នៅលើគោក ហើយគាត់បានចេញទូកទៅមើលត្រីជាប់មងក្នុងបឹង ។ នៅពេលជនរងគ្រោះកំពុងតែចែវទូកលើកមើលមងជាប់ត្រី ស្រាប់តែខ្សល់បក់បោកទូកយោលឃ្លីឃ្លោងក្រឡាប់ធ្លាក់ទឹក ដោយវ័នជាប់ជាមួយមងនោះផងខំរើបំរាស់មិនរួចក៏លង់ទឹកស្លាប ។
កូនស្រីឃើញឪពុកធ្លាក់ទឹកដូច្នេះក៏បានរត់ទៅហៅបងប្អូនឲ្យមកជួយ បន្ទាប់មកបងប្អូនអ្នកភូមិបានចុះទៅជួយស្រង់តែជនរងគ្រោះបានស្លាប់បាត់ទៅហើយ ។ ក្រោយមកក្រុមគ្រួសារបានទៅរាយការណ៍ជូនសមត្ថកិច្ចនគរបាលប៉ុស្តិ៍រដ្ឋបាលកោះខែល ជ្រាបជាដំណឹង បន្ទាប់មកសមត្ថកិច្ចផ្នែកជំនាញស្រុក ប៉ុស្តិ៍រដ្ឋបាល ក្រុមប្រឹក្សាឃុំ លោក មេភូមិ បានសន្និដ្ឋានថា ជនរងគ្រោះស្លាប់ដោយសារលង់ទឹកពិតមែន ដូច្នោះសាកសព ត្រូវបានប្រគល់ជូនទៅក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ