ខេត្តបន្ទាយមានជ័យ ៖ ពិតជាគួរឱ្យសង្វេគណាស់ ខណៈកូនស្ត្រីរងគ្រោះបានរៀបចំពិធីឡើងផ្ទះ បែរជាប្រែក្លាយជាពិធីបុណ្យសពម្តាយទៅវិញ ខណៈស្ត្រីជាម្តាយបានឆក់នឹងខ្សែភ្លើងស្លាប់ ហេតុការណ៍នេះបានកើតឡើងនៅចន្លោះវេលាម៉ោង៥ទៅម៉ោង៦ព្រឹក ថ្ងៃទី១៨ ខែកក្កដា ឆ្នាំ២០១៨ ស្ថិតនៅភូមិអូរវែង ឃុំតាបែន ស្រុកស្វាយចេក ខេត្តបន្ទាយមានជ័យ ។
ប្រភពព័ត៌មានពីលោកនាយប៉ុស្តិ៍នគរបាលរដ្ឋបាលឃុំតាបែនបានឲ្យដឹងថា ស្ត្រីរងគ្រោះឈ្មោះ គង់ ណាគ្រី អាយុ៥១ឆ្នាំ មានទីលំនៅភូមិអូរវែងត្បូង ឃុំតាបែន ស្រុកស្វាយចេក ខេត្តបន្ទាយមានជ័យ។
លោកបន្តថា មុនពេលកើតហេតុស្ត្រីរងគ្រោះបានក្រោកទៅបោសសំរាមនៅក្នុងរោងពិធីសម្រាប់ទទួលភ្ញៀវ ពេលកំពុងតែបោសគាត់បានឃើញប្រ៊ីខ្សែភ្លើងដែលបែក ហើយត្រូវគេរុំដោយថង់ និងយកស្បៃសម្រាប់ហាលស្រូវមកគ្របពីលើ ចៃដន្យជួនជាស្បៃនោះសើមដោយទឹកភ្លៀងផងនោះ ស្ត្រីរងគ្រោះបានយកដៃទៅទាញចេញ ដើម្បីបោសសំរាមបន្ត ស្រាប់តែក៏ឆក់បណ្តាលឲ្យរងរបួសធ្ងន់ ជាអកុសលស្ត្រីរងគ្រោះក៏បានស្លាប់តាមផ្លូវខណៈពេលបញ្ជូនទៅមន្ទីរពេទ្យ។
លោកនាយប៉ុស្តិ៍បញ្ជាក់ថា នេះគឺជាឆ្វេសប្រហែសចំពោះអ្នកតខ្សែភ្លើង ឃើញព្រីនបែកហើយមិនព្រមផ្លាស់ប្តូរនៅតែយកមកប្រើ។ ក្នុងនោះលោកក៏បានអំពាវនាវសូមឲ្យបងប្អូនប្រើប្រាស់ប្រព័ន្ធភ្លើងឲ្យមានការប្រុងប្រយ័ត្ន ជាពិសេសកុំស្តាយប្រ៊ីភ្លើងដែលបែកបាក់ ហើយត្រូវផ្លាស់ប្តូរចេញជៀសវាងការគ្រោះថ្នាក់ដោយយថាហេតុ ហើយបច្ចុប្បន្នសពស្ត្រីរងគ្រោះត្រូវបានរៀបចំធ្វើបុណ្យតាមប្រពៃណី៕
ចែករំលែកព័តមាននេះ