ខេត្តកណ្តាល ៖ ក្រុមចោរប្លន់ប្រដាប់ដោយដុំថ្មយ៉ាងសកម្មប្រចាំស្រុកស្អាងធ្វើសកម្មភាពប្លន់ជិត១០លើកសម្រេចបាន០៥លើក ចំនួន០៤នាក់ កាលពីព្រឹកថ្ងៃទី១៨ កក្កដា ២០១៨ លោក ទី សំណាង ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួនដាក់ពន្ធនាគារបណ្តោះអាសន្នពីបទ«លួចមានស្ថានទម្ងន់ទោស» ដែលប្រព្រឹត្តនៅភូមិព្រែកត្រែង ឃុំសិត្បូ ស្រុកស្អាង ខេត្តកណ្ដាល កាលពីថ្ងៃទី១៤ កក្កដា ២០១៨ តាមមាត្រា៣៥៣ ,៣៥៧ នៃក្រមព្រហ្មទណ្ឌ ។ បទល្មើសនេះត្រូវផ្តន្ទាទោសពី៣(បី)ឆ្នាំ ទៅ១០(ដប់)ឆ្នាំ ។
ជនត្រូវចោទមានឈ្មោះ១-ឈ្មោះ រិន វ៉ាន់ឌី ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ បច្ចុប្បន្ននៅផ្ទះជួលភូមិលេខ១.ក ឃុំស្វាយរលំ ស្រុកស្អង ខេត្តកណ្ដាល ទី០២-ឈ្មោះ ខៀវ គីមឡុង ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិត មានទីលំនៅភូមិព្រែកសំរោង សង្កាត់កំពង់សំណាញ់ ក្រុងតាខ្មៅ ទី០៣- ឈ្មោះ លីម គីមទ្រី ភេទប្រុស អាយុ ១៧ឆ្នាំ ជនជាតិខ្មែរ មុខរបរមិនពិត មានទីលំនៅភូមិក្រពើហាលិច សង្កាត់ព្រែកឬស្សី ក្រុងតាខ្មៅ ខេត្តកណ្ដាល ទី០៤- ឈ្មោះ បូរី គឹមហំ ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតមានទីលំនៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល ។
ជនរងគ្រោះឈ្មោះ ខ្វែក សុភ័ក្ដ្រ ភេទប្រុស អាយុ៣០ឆ្នាំ ជនជាតិខ្មែរ មុខរបរជាងកាត់ដេរ សព្វថ្ងៃស្នាក់នៅផ្ទះជួលភូមិព្រែកត្រែងឃុំសិត្បូ ស្រុកស្អាង ខេត្តកណ្តាល ។ លោកអធិការបញ្ជាក់ថា នៅថ្ងៃទី១៤ កក្កដា ២០១៨ ជនរងគ្រោះជិះម៉ូតូ សេ១២៥ សេរីឆ្នាំ២០១៨ មកដល់ភូមិកោះគរ ឃុំរកាខ្ពស់ ត្រូវបានជួបក្រុមជនសង្ស័យខាងលើ (ជិះម៉ូតូ៣គ្រឿង) ធ្វើសកម្មភាពដេញវាយជនរងគ្រោះរហូតមកដល់ភូមិព្រែកត្រែងឃុំសិត្បូក៏ដួលម៉ូតូភ្លាមនោះជនរងគ្រោះស្រែកថា ចោរៗទើបមានប្រជាពលរដ្ឋចេញមកជួយ រំពេចនោះជនសង្ស័យបានឡើងជិះម៉ូតូគេចខ្លួនដោយបន្សល់ ទុកម៉ូតូចំនួន០១គ្រឿង នៅកន្លែងកើតហេតុ ជារបស់ជនសង្ស័យ(វ៉ាន់ឌី ) ។
ក្រោយពេលទទួលបានព័ត៌មានខាងលើកម្លាំងប៉ុស្តិ៍សិត្បូសហការណ៍ជាមួយកម្លាំងផ្នែកព្រហ្មទ័ណ្ឌ ស្រុកស្អាងដឹកនាំផ្ទាល់ ដោយលោកវរសេនីយ៍ ឯក សេង សុជាតិ អធិការបានធ្វើការស្រាវជ្រាវរហូតកំណត់បានមុខសញ្ញាឈ្មោះ រិន វ៉ាន់ឌី បានសារភាពពីបក្ខពួករបស់ខ្លួន ។
ដោយមានការសម្របសម្រួលពីលោក លាវ ស្រេង ព្រះរាជអាជ្ញាអម សាលាដំបូងខេត្តកណ្ដាល កម្លាំងនគរបាលស្រុកស្អាងបានបន្ដសហការជាមួយកនម្លាំងនគរបាលអធិការដ្ឋានក្រុងតាខ្មៅ និងកម្លាំងការិយាល័យព្រហ្មទណ្ឌកម្រិតស្រាលនៃស្នងកានគរបាលខេត្តកណ្ដាល ។ ដែលបានធ្វើការឃាត់ខ្លួនមុខសញ្ញាចំនួន០៣នាក់ទៀតមាន១-ឈ្មោះ លីម គីទ្រី ភេទប្រុស អាយុ១៧ឆ្នាំ ២- ឈ្មោះខៀវ គីមឡុង ភេទប្រុស អាយុ១៨ឆ្នាំ ៣-ឈ្មោះ បូរី គឹមហំ ភេទប្រុស អាយុ១៨ឆ្នាំ ។
ជនសង្សយ័ទាំង០៤បានសារភាពថា ពួកខ្លួនពិតជាបានដេញវ៉ៃប្លន់យកម៉ូតូកាលពីថ្ងៃទី១៤ ខែកក្កដា នៅចំណុចភូមិព្រែកត្រែង ឃុំសិត្បូ ប្រាកដមែន ។ ហើយកន្លងមកក្នុងខែ៤ ខែ៦ និង ខែ៧ ឆ្នាំ២០១៨(នៅចន្លោះម៉ោង២៣និង០០នាទី និងម៉ោង០១និង០០នាទី) ក្រុមរបស់ខ្លួនទាំង០៧នាក់ ធ្លាប់ធ្វើសកម្មភាពវ៉ៃគប់ដុំថ្មប្លន់យកម៉ូតូចំនួន០៧លើក ក្នុងនោះមិនបានសម្រេចចំនួន០២លើក និងបានសម្រេចចំនួន០៥លើក គឺបានម៉ូតូចំនួន០៥គ្រឿង រួចយកទៅលក់ឲ្យមនុស្សប្រុសម្នាក់ មិនស្គាល់ឈ្មោះ នៅតាមផ្លូវម្ដុំបឹងត្របែកភ្នំពេញ ។ ដោយធ្វើសកម្មភាពនៅចំណុចលើផ្លូវជាតិលេខ២១ ស្រុកស្អាង ចំនួន០៦លើក និងនៅគល់ស្ពានព្រែកសំរោងត្រើយខាងកើតទន្លេបាសាក់បានសម្រេចចំនួន០១លើក ៕
ចែករំលែកព័តមាននេះ