ខេត្តបន្ទាយមានជ័យ ៖ រថយន្តតូចធំ៤គ្រឿង និងត្រាក់ទ័រ១គ្រឿងបើកបុកគ្នាជាបន្តបន្ទាប់ពុំធ្លាប់មានសោះនៅទឹកដីខេត្តបន្ទាយមានជ័យបណ្តាលឱ្យមនុស្សប្រុស ស្រីចំនួន៣នាក់រងរបួសធ្ងន់។ ឧប្បត្តិហេតុនេះកើតឡើងនៅលើផ្លូវជាតិលេខ៦ស្ថិតក្នុងភូមិរំដួល ឃុំភ្នំលៀប ស្រុកព្រះនេត្រព្រះ កាលពីវេលាម៉ោង៩ និង១៥នាទីព្រឹក ថ្ងៃទី៣០ ខែមីនា ឆ្នាំ២០១១។
អ្នកឃើញហេតុការណ៍ផ្ទាល់ភ្នែកនិយាយថា រថយន្តម៉ាកហ៊ីណូដឹកដីពណ៌ស ពាក់ស្លាកលេខបន្ទាយមានជ័យ៣A ០៥២៦ បើកពីលិចទៅកើតក្នុងល្បឿនលឿនជ្រុលបុករថយន្តនីស្សាន់ពណ៌កណ្តុរល្មែះមួយបាំងកន្លះ ពាក់ស្លាកលេខផ០៤២៥ភព២ ដឹកមនុស្សពេញបណ្តាលឱ្យអ្នកជិះ៣នាក់ធ្លាក់ពីលើរថយន្តរងរបួសធ្ងន់ធ្ងរ។ បន្ទាប់មករថយន្តហ៊ីណូជ្រុលទៅបុករថយន្តរបស់អង្គការហេឡូត្រាសទៀតដែលមកពីទិសខាងកើតបណ្តាលឱ្យខូចផ្នែកខាងមុខ ដាច់កង់ខាងឆ្វេងធ្លាក់ពីលើផ្លូវជាតិ។ បន្ទាប់មកទៀតរថយន្តក្រុងពណ៌ស្លាទុំ ពាក់ស្លាកលេខភ្នំពេញ៣B៣៣៣៣ ដឹកភ្ញៀវទេសចរបានបើកចូលប្រឡោះរថយន្តដឹកដី និងត្រាក់ទ័រពីទិសខាងលិចបណ្តាលឱ្យកៀបគ្នាជាប់ ប៉ុន្តែពុំបណ្តាលឱ្យមានគ្រោះថ្នាក់ដល់ភ្ញៀវទេសចរជនជាតិកូរ៉េដែលធ្វើដំណើរទៅកាន់ខេត្តសៀមរាបឡើយ។
មន្ត្រីប៉ូលិសចរាចរឱ្យដឹងថា គ្រោះថ្នាក់ចរាចរណ៍រថយន្តបុកគ្នាបន្តបន្ទាប់បែបនេះពុំធ្លាប់មានទេ ក្នុងខេត្តបន្ទាយមានជ័យ ហើយកន្លែងកើតហេតុពុំមានការកកស្ទះចរាចរទេ តែបណ្តាលមកពីរថយន្តដឹកដីបើកលឿនវ៉ាគេពុំមើលឧបសគ្គខាងមុខ។ ជនរងគ្រោះរបួសធ្ងន់ឈ្មោះរ៉ឹក ភេទប្រុសអាយុ៣១ឆ្នាំ ឈ្មោះមឺយ អិត ភេទស្រី អាយុ៣២ឆ្នាំ ទាំង២នាក់ជាប្តីប្រពន្ធនឹងគ្នា និងម្នាក់ទៀតឈ្មោះវឿ ពេញ ភេទស្រី អាយុ២០ឆ្នាំ ។ ទាំង៣នាក់រស់នៅភូមិតាសែង ឃុំស្នួល ស្រុកក្រឡាញ់ ។ ចំណែកអ្នកបើកបររថយន្តក្រុងដឹកភ្ញៀវទេសចរឈ្មោះតូ ស៊ីដ្ឋា ភេទប្រុស អាយុ៣៥ឆ្នាំ រស់នៅភូមិភ្នំក្រោម សង្កាត់សៀមរាប ក្រុងសៀមរាប ខេត្តសៀមរាប អ្នកបើកបរត្រាក់ទ័រឈ្មោះសំ វិន ភេទប្រុស អាយុ២៧ឆ្នាំ នៅភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ និងអ្នកបើកបររថយន្តអង្គការហេឡូត្រាសឈ្មោះមួន រដ្ឋា ភេទប្រុស អាយុ៣២ឆ្នាំ រស់នៅភូមិភ្នំធំថ្មី ឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ។ ចំណែកអ្នកបើកបររថយន្តដឹកដី គេមិនស្គាល់ឈ្មោះទេ ព្រោះបានរត់គេចខ្លួនបាត់ ឯអ្នកបើកបររថយន្តនីស្សាន់ក៏ពុំស្គាល់ឈ្មោះដែរ។
ប៉ូលិសឱ្យដឹងទៀតថា រថយន្ត៤គ្រឿង ត្រាក់ទ័រ១គ្រឿងត្រូវសមត្ថកិច្ចនាំយកទៅរក្សាទុកនៅស្នងការដ្ឋាននគរបាលខេត្តបន្ទាយមានជ័យ។ អ្នករងរបួសទាំង៣នាក់ត្រូវរថយន្តសង្គ្រោះដឹកទៅមន្ទីរពេទ្យ ប៉ុន្តែមិនដឹងយ៉ាងណាទេ។ អ្នកភូមិរំដួលរិះគន់ចំពោះរថយន្តដឹកដីដែលតែងតែបើកលឿនណាស់ជាកត្តាបង្កឱ្យមានគ្រោះថ្នាក់ចរាចរណ៍ជាញឹកញាប់ ៕
ចែករំលែកព័តមាននេះ