ចិន ៖ តាមប្រភពព័ត៌មាន Oddity Central បានឲ្យដឹងថា ស្ត្រីជនជាតិចិនម្នាក់បានមកពេទ្យ ដើម្បីធ្វើការវះកាត់បង្រួមក្រពះក្រោយឡើងទម្ងន់មួយគុណនឹងពីរ បន្ទាប់ពីប្រើថ្នាំសម្រករយៈពេល៧ឆ្នាំ។
ស្ត្រីខាងលើអាយុ២៥ឆ្នាំ ដែលត្រូវគេហៅថា Xiaoli បានចាប់ផ្តើមប្រើប្រាស់ថ្នាំសម្រកទម្ងន់ដំបូងកាលពី៧ឆ្នាំមុន ក្រោយពេលនាងឃើញការផ្សាយតាមទូរទស្សន៍។ ពេលនោះ នាងមានទម្ងន់៤៥គីឡូក្រាម។ ទម្ងន់នេះមិនធាត់ទេ តែនាងចង់ស្រកថែម ហើយក៏ទិញថ្នាំនោះយកមកលេប។
ក្រោយប្រើភ្លាម នាងឃើញលទ្ធផលភ្លាម។ តែក្រោយពីឈប់លេបភ្លាម នាងក៏ឡើងទម្ងន់ជាបន្តបន្ទាប់។ អស់រយៈពេល៧ឆ្នាំមកនេះ នាងបានជះលុយខ្ទង់៣ម៉ឺនដុល្លារលើថ្នាំសម្រក់ទាំងនោះ រហូតដល់នាងមិនចាំសូម្បីតែឈ្មោះ ព្រោះថា ច្រើនមុខពេក។
ពេលនាងទូរស័ព្ទទៅសួរអ្នកលក់ថ្នាំ គេគ្មានអ្វីផ្តល់ជាយោបល់ក្រៅពីឲ្យនាងលេបថ្នាំបន្ថែម ឬក៏ប្តូររបបអាហារទេ។ ពេលនាងមកដល់ពេទ្យវះកាត់ លោកវេជ្ជបណ្ឌិត Wang Zhong បានប្រាប់ថា មូលហេតុដែលឲ្យនាងធាត់មានទាំងរបបអាហារ និងថ្នាំសម្រកទម្ងន់។
លោកថា ថ្នាំសម្រកទម្ងន់ទាំងនោះ បើមិនធ្វើឲ្យអត់ឃ្លានទេ ក៏ជម្រុញឲ្យអាហារឆាប់បញ្ចេញចោលដែរ។ សកម្មភាពរបស់វាមិនមានភាពទៀងទាត់ទេ។ ការសម្រកទម្ងន់ទាមទារឲ្យយើងគិតគូរឲ្យបានគ្រប់ជ្រុងជ្រោយ និង ទាមទារពេលវេលា។
រឿងរ៉ាវនេះត្រូវបានចុះផ្សាយនៅលើកាសែត Chengdu Business Daily ក្រោយពី Xiaoli ធ្វើដំណើរពី Yibin មកកាន់ Chengdu ដើម្បីធ្វើការវះកាត់បង្រួមក្រពះ។ នាងប្រាប់ថា នាងចង់ចែករំលែករឿងនេះឲ្យមហាជនដឹងលឺពីផលវិបាកនៃការប្រើប្រាស់ថ្នាំសម្រកទម្ងន់៕
ចែករំលែកព័តមាននេះ