រាជធានីភ្នំពេញ ៖ សូមប្រជាពលរដ្ឋដែលរស់នៅតាមដងទន្លេមេគង្គ ទន្លេសាប ទន្លេបាសាក់ និងអ្នករស់ នៅតាមតំបន់ទំនាបនានាចូរបង្កើនការប្រុងប្រយ័ត្នខ្ពស់ ដើម្បីចូលរួមបង្ការការពារគ្រោះថ្នាក់ដែលកើតមានឡើងជាយថាហេតុ ព្រោះលំហូរនៃទឹកទន្លេមេគង្គកំពុងមានសន្ទុះហក់ឡើងយ៉ាងគំហុក។ លោក…
រាជធានីភ្នំពេញ ៖ សូមប្រជាពលរដ្ឋដែលរស់នៅតាមដងទន្លេមេគង្គ ទន្លេសាប ទន្លេបាសាក់ និងអ្នករស់
នៅតាមតំបន់ទំនាបនានាចូរបង្កើនការប្រុងប្រយ័ត្នខ្ពស់ ដើម្បីចូលរួមបង្ការការពារគ្រោះថ្នាក់ដែលកើតមានឡើងជាយថាហេតុ ព្រោះលំហូរនៃទឹកទន្លេមេគង្គកំពុងមានសន្ទុះហក់ឡើងយ៉ាងគំហុក។
លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញ បានបញ្ជាក់ឲ្យដឹងថា ដោយមើលឃើញពីស្ថានភាពជំនន់ទឹកទន្លេមេគង្គមានសន្ទុះហក់ឡើងយ៉ាងគំហុកនាប៉ុន្មានថ្ងៃចុងក្រោយនេះគួរឲ្យព្រួយបារម្មណ៏ មន្ទីរបានអំពាវនាវដល់ប្រជាពលរដ្ឋដែលរស់នៅតាមដងទន្លេមេគង្គ ក៏ដូចទន្លេសាប ទន្លេបាសាក់ និងអ្នករស់នៅតាមតំបន់ទំនាបនានាក្នុងភូមិសាស្ត្ររាជធានីភ្នំពេញត្រូវបង្កើនការប្រុងប្រយ័ត្នទាំងអស់គ្នា ដើម្បីបង្ការការពារគ្រោះថ្នាក់កើតឡើងជាយថាហេតុ ព្រោះស្ថានភាពទឹកនាពេលនេះកំពុងបន្តហក់ឡើង។
លោកបន្តថា អនុវត្តតាមការណែនាំពីក្រសួងធនធានទឹកលើវិធានការការពារ ក៏ដូចការផ្សព្វផ្សាយអំពីស្ថានភាពទឹកជំនន់ទន្លេមេគង្គនេះ មន្ទីរធនធានទឹក និងឧតុនិយមរាជធានី ក៏បានជូនដំណឹងដល់អាជ្ញាធរមូលដ្ឋាន សង្កាត់ ខណ្ឌមួយចំនួន ដែលមានប្រជាជនរស់នៅតាមដងទន្លេ សុំឲ្យជួយផ្សព្វផ្សាយបងប្អូនអំពីស្ថានភាពជំនន់ទឹកទន្លេមេគង្គនេះ ដើម្បីមានវិធានការការពារទ្រព្យសម្បត្តិ អាយុជីវិតកូនចៅ និងសត្វធាតុ បង្ការទុកជាមុនឱ្យបានទាន់ពេល។
សូមបញ្ជាក់ថា៖ តាមសេចក្តីជូនដំណឹងស្តីពីស្ថានភាពទឹកជំនន់ទន្លេមេគង្គដែលក្រសួងធនធានទឹក និងឧតុនិយមប្រកាស កាលពីថ្ងៃទី១៦ ខែកក្កដា បានបានព្យាករណ៍ថា ទឹកទន្លេមេគង្គបានហក់ឡើង ដោយសារនៅប្រទេសឡាវ និងថៃកំពុងទទួលរងនូវប្រព័ន្ធសម្ពាធទាប មានភ្លៀងធ្លាក់យ៉ាងខ្លាំង ទើបធ្វើឲ្យទឹកទន្លេមេគង្គហក់ឡើង និងជះឥទ្ធិពលដល់កម្ពុជា។
ក្រសួងបញ្ជាក់ថា បន្ទាប់ពីតាមដានព្យាករណ៍លើស្ថានភាពអាកាសធាតុ និងស្ថានភាពទឹកជំនន់ទន្លេមេគង្គនេះរួចមក ក្រសួងក៏បានជូនដំណឹងដល់ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋបានដឺងពីឥទ្ធិពលរបស់ប្រព័ន្ធសម្ពាធទាប ដែលបានកើតឡើង និងកំពុងស្ថិតលើតំបន់ផ្ទៃរងទឹកភ្លៀងរបស់ទន្លេមេគង្គក្នុងប្រទេសថៃ និងប្រទេសឡាវ បានធ្វើឲ្យមានភ្លៀងធ្លាក់ជាបន្តបន្ទាប់ និងបង្កឲ្យទឹកទន្លេមេគង្គហក់ឡើងដូច្នេះ។ ក្រសួងបានបញ្ជាក់ទៀតថា ក្នុងអំឡុងពេល២ ឬ៣ថ្ងៃខាងមុខនេះ ទឹកទន្លេមេគង្គលើ ក្នុងប្រទេសកម្ពុជានឹងហក់ឡើង ហើយចាប់ផ្តើមហូរចូលតាមព្រែក និងតំបន់ទំនាបនានា ដែលស្ថិតនៅអមសងខាងទន្លេមេគង្គលើ៕
ចែករំលែកព័តមាននេះ