ខេត្តបាត់ដំបង ៖ យោងតាមមន្ត្រីជំនាញបានផ្ដល់ព័ត៌មានជាបឋមថា គិតត្រឹមម៉ោង៤រសៀលថ្ងៃទី១៨កក្កដា នេះ ជំនន់ទឹកភ្លៀងក្នុងស្ទឹងសង្កែ បានថមថយនៅត្រឹមកម្ពស់លើស១១ម៉ែត្របន្តិច ប៉ុន្តែសន្ទុះទឹកអាចនឹងហក់ឡើងវិញនាពេលខាងមុខនេះ ហើយប្រជាពលរដ្ឋដែលរស់នៅតាមដងស្ទឹងសង្កែ គួរតែមានការប្រុងប្រយ័ត្នឱ្យបានខ្ពស់បំផុត ។
មន្ត្រីធនធានទឹក និងឧតុនិយមបានឱ្យដឹងថា ពិតមែនតែពេលនេះ ទឹកស្ទឹងសង្កែបានថយចុះជាង១ម៉ែត្រ បើធៀបនឹងប៉ុន្មានថ្ងៃមុននេះ តែវាអាចនឹងហក់ឡើងខ្លាំងវិញនៅថ្ងៃទី១៩ ឬថ្ងៃទី២០ កក្កដា ។ មន្ត្រីជំនាញបាននិយាយថា ដោយយោងលើអាកាសធាតុដែលមានសម្ពាធទាប បង្កឱ្យមានភ្លៀងធ្លាក់ខ្លាំង នៅតំបន់ព្រំដែនខ្មែរ-ថៃ នាប៉ែកខាងលើនៃដងស្ទឹងសង្កែ ដែលជាប្រភពទឹក ។ ជាពិសេស នៅតំបន់នានាក្នុងស្រុកសំឡូត
ដូច្នេះហើយ ទើបធ្វើឱ្យកម្ពស់ទឹកស្ទឹងអាចនឹងហក់ឡើងវិញ ។ ប៉ុន្តែមិនទាន់អាចសន្និដ្ឋានបានទេ អំពីកម្ពស់ទឹកដែលអាចត្រូវប្រកាសអាសន្ន ។
ជាមួយគ្នានឹងការប្រឈមជំនន់ទឹកភ្លៀងជាថ្មីក្នុងស្ទឹងសង្កែនេះ មន្ត្រីជំនាញក៏បានអំពាវនាវផងដែរ ដល់ប្រជាពលរដ្ឋខេត្តបាត់ដំបង ។ ជាពិសេស ពលរដ្ឋដែលរស់នៅតាមបណ្ដាស្រុកនានា ស្របតាមដងស្ទឹងសង្កែ ត្រូវប្រុងប្រយ័ត្ន ដើម្បីចៀសវាងអំពីផលប៉ះពាល់ ដោយសារគ្រោះទឹកជំនន់ទឹកភ្លៀងនេះ ។
ចែករំលែកព័តមាននេះ