ខេត្តកំពង់ស្ពឺ ៖ ដោយការយកចិត្តទុកដាក់ចំពោះសុខទុក្ខរបស់ប្រជាពលរដ្ឋក្នុងមូលដ្ឋានឆ្លៀតពេលការងារដ៏មមាញឹក និងក្រោយពីបានចុះពិនិត្យស្ថានភាពទឹកជំនន់ជន់លិចកំណាត់ផ្លូវជាតិលេខ០៤ ត្រង់ចំណុចគីឡូម៉ែត្រ១០៧ រួចមកនៅរសៀលថ្ងៃទី១៧ ខែកក្កដា ឆ្នាំ២០១៨ ដដែលនេះ លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺបានបន្ដដឹកនាំក្រុមការងារចុះពិនិត្យទីតាំងទាំង៦ភូមិដែលរងគ្រោះដោយសារជំនន់ទឹកភ្លៀងក្នុងស្រុកភ្នំស្រួច ។
នាឱកាសចុះពិនិត្យមើលស្ថានភាពជំនន់ទឹកភ្លៀងនេះដែរ លោកបានមានប្រសាសន៍ថា បើទោះបីជាមានការជន់លិចដោយទឹកភ្លៀងក៏ដោយបញ្ហាប្រឈមរបស់ប្រជាពលរដ្ឋដែលរស់នៅតំបន់នេះក៏ដូចជា តំបន់ងាយរងគ្រោះដទៃទៀតក្នុងខេត្តកំពង់ស្ពឺពុំទាន់មានការប៉ះពាល់ធ្ងន់ធ្ងរនៅឡើយទេ តែទោះជាយ៉ាងណាក្តីប្រជាពលរដ្ឋត្រូវប្រុងប្រយ័ត្នមិនត្រូវធ្វេសប្រហែសឡើយ ចំពោះស្ថានភាពទឹកភ្លៀងដែលកំពុងបន្តធ្លាក់ ។
លោក វ៉ី សំណាង បន្តមានប្រសាសន៍ទៅកាន់បងប្អូនប្រជាពលរដ្ឋថា អាជ្ញាធរខេត្ត អាជ្ញាធរស្រុក -ឃុំ បាន នឹងកំពុងយកចិត្តទុកដាក់បំផុតចំពោះសុវត្ថិភាពរបស់បងប្អូន ហើយក៏បានត្រៀមវិធានការដោះស្រាយ ទប់ស្កាត់ ចំពោះគ្រោះធម្មជាតិមួយនេះហើយ ដើម្បីដោះស្រាយឲ្យបានទាន់ពេលវេលា ។
ជាមួយគ្នានេះដែរ លោកក៏បានផ្តាំផ្ញើដល់បងប្អូនត្រូវប្រុងប្រយ័ត្នពីបញ្ហាសុខភាព ដោយហូបស្អាត ផឹកស្អាត ជាពិសេសត្រូវប្រុងប្រយ័ត្នចំពោះមនុស្សចាស់ ក្មេងតូចៗ នៅពេលមានខ្យល់ ឬភ្លៀងហាមជ្រកក្រោមដើមឈើ និងប្រយ័ត្នចំពោះពពួកសត្វមានពឹសជាដើម ៕
ចែករំលែកព័តមាននេះ