DAILY MAILរបស់អង់គ្លេសកាលពីពេលថ្មីៗកន្លងមកផ្សាយថា លោករិក ស្តេនតុន(Rick Stanton) អាយុ៥៧ឆ្នាំកំពុងសេពគប់ និងមើលចិត្តជាមួយនាងស៊ីរីផុន ប៊ុកងើន(Siripon Bugnngern) ជាគ្រូពេទ្យនៅខេត្តឈៀងរ៉ៃដែលមានគម្លាតអាយុពីគ្នា២០ឆ្នាំ…
DAILY MAILរបស់អង់គ្លេសកាលពីពេលថ្មីៗកន្លងមកផ្សាយថា លោករិក ស្តេនតុន(Rick Stanton) អាយុ៥៧ឆ្នាំកំពុងសេពគប់ និងមើលចិត្តជាមួយនាងស៊ីរីផុន ប៊ុកងើន(Siripon Bugnngern) ជាគ្រូពេទ្យនៅខេត្តឈៀងរ៉ៃដែលមានគម្លាតអាយុពីគ្នា២០ឆ្នាំ ។
អ្នកទាំងពីរបានជួបគ្នានៅចក្រភពអង់គ្លេស កាលពីប៉ុន្មានខែមុន និងក្នុងអំឡុងពេលក្មេងប្រុស១៣នាក់ និងគ្រូបង្វឹកបាល់ទាត់របស់ពួកគេជាប់នៅក្នុងរូង «ថាំហ្លួង» នាងបានដើរតួជាអ្នកបកប្រែឲ្យលោកស្តេនតុន និងក្រុមអ្នកមុជទឹកជនជាតិអង់គ្លេស ។
មនុស្សជំនិតម្នាក់បញ្ជាក់ប្រាប់ DAILY MAILថា «ទោះបីជាពួកគេទើបតែជួបគ្នាក៏ដោយ ប៉ុន្តែលោករិកបានលង់ស្នេហ៍លើនាងយ៉ាងខ្លាំង ។ នាងជាអ្នកខេត្តឈៀងរ៉ៃ ដូច្នេះនៅពេលលោករិក ហៅឲ្យទៅជួយក្រុមក្មេងប្រុសដែលបាត់ខ្លួន នាងក៏ទៅនៅក្បែរលោក។ នាងបានជួយលោករិក និងអ្នកមុជទឹកផ្សេងទៀតក្នុងនាមជាអ្នកបកប្រែរហូតចប់ភារកិច្ច» ។
អ្នកទាំងពីរមានភាពស្និទ្ធស្នាលគ្នា ហើយក៏មិនចម្លែកដែរប្រសិនបើពួកគេរៀបការ ។ លោករិក ស្តេនតុន និងលោកJohn Volanthen ជាមនុស្ស២នាក់ដំបូងដែលជួបក្មេងទាំង១២នាក់ដែលបាត់ខ្លួននៅក្នុងល្អាង«ថាំហ្លួង» នៅស្រុកមេសាយ ខេត្តឈៀងរ៉ៃតាំងពីថ្ងៃទី២៣ មិថុនាកន្លងមក និងជាអ្នកនាំក្មេង និងគ្រូបង្វឹកចេញពីរូងរហូតជោគជ័យនៅថ្ងៃទី១០ កក្កដា ។
លោករិក ស្តេតុន បានទទួលគ្រឿងឥស្សរិយយសពីចក្រភពអង់គ្លេស«MBE» ជាការលើកស្ទួយកិត្តិយសមានចំណែកជួយសង្គ្រោះមនុស្សនៅក្នុងល្អាងដ៏អង់អាចក្លាហានជាច្រើនលើក ។ មិនតែប៉ុណ្ណោះលោកមានកេរ្តិ៍ឈ្មោះក្នុងនាមជា «មនុស្សត្រូវទូរស័ព្ទរក» ប្រសិនបើមានការជួយសង្គ្រោះនៅក្នុងល្អាង ៕
ចែករំលែកព័តមាននេះ