ទីក្រុងញូវយ៉ក ៖ តម្លៃប្រេងបានធ្លាក់ចុះ៤%កាលពីថ្ងៃចន្ទដើមសប្ដាហ៍នេះ ខណៈកំពង់ផែប្រទេសលីប៊ីបានបើកដំណើរការសាជាថ្មី និងពាណិជ្ជករកំពុងរង់ចាំការបង្កើនផលិតកម្មក្នុងប្រទេសរុស្ស៊ី និងប្រទេសផលិតប្រេងដទៃទៀត ។ តម្លៃប្រេងឆៅរបស់ Brent បានធ្លាក់ចុះ…
ទីក្រុងញូវយ៉ក ៖ តម្លៃប្រេងបានធ្លាក់ចុះ៤%កាលពីថ្ងៃចន្ទដើមសប្ដាហ៍នេះ ខណៈកំពង់ផែប្រទេសលីប៊ីបានបើកដំណើរការសាជាថ្មី និងពាណិជ្ជករកំពុងរង់ចាំការបង្កើនផលិតកម្មក្នុងប្រទេសរុស្ស៊ី និងប្រទេសផលិតប្រេងដទៃទៀត ។
តម្លៃប្រេងឆៅរបស់ Brent បានធ្លាក់ចុះ ៤,១% ឬ៣,០៩ដុល្លារ មកស្មើ៧២,២៤ដុល្លារក្នុង១ធុង ខណៈតម្លៃប្រេងរបស់ West Texas Intermediate បានធ្លាក់ចុះ៣,៩% ឬ២,៧៤ដុល្លារ មកស្មើ៦៨,២៧ដុល្លារក្នុង១ធុង ។
ការផ្អាកការផ្គត់ផ្គង់ក្នុងប្រទេសលីប៊ី ជម្លោះពលកម្មក្នុងប្រទេសន័រវែស និងភាពចលាចលក្នុងប្រទេសអុីរ៉ង់ បានជួយជំរុញដល់តម្លៃប្រេងកាលពីចុងសប្តាហ៍មុន ។
យ៉ាងណាក្តី លោក Alexander Novak រដ្ឋមន្ត្រីថាមពលរបស់រុស្ស៊ី បានប្រាប់អ្នកសារព័ត៌មានកាលពីថ្ងៃសុក្រថា ប្រទេសរុស្ស៊ី និងប្រទេសផលិតប្រេងដទៃទៀត អាចនឹងបង្កើនទិន្នផលប្រេងប្រមាណ១លានធុងទៀតក្នុង១ថ្ងៃ ឬច្រើនជាងនេះ ប្រសិនបើទីផ្សារមានកង្វះការផ្គត់ផ្គង់ ។
លើសពីនេះ មានរបាយការណ៍ថា សហរដ្ឋអាមេរិកអាចនឹងប្រើប្រេងបម្រុងរបស់ពួកគេដែលអាចបង្កើនការផ្គត់ផ្គង់ក្នុងទីផ្សារ ។
ផលិតកម្មក្នុងប្រទេសលីប៊ីនៅតែស្ថិតក្រោមការគំរាមកំហែងដដែល ។ National Oil Corporation បាននិយាយកាលពីថ្ងៃសៅរ៍ថា បើទោះជាកំពង់ផែបានចាប់ដំណើរការវិញមែន ប៉ុន្ដែទិន្នផលក្នុងតំបន់ប្រេង Sharara អាចនឹងធ្លាក់ចុះយ៉ាងតិច១៦ម៉ឺនធុងក្នុង១ថ្ងៃ បន្ទាប់ពីពលករ២រូបត្រូវបានចាប់ខ្លួន ។
ក្នុងប្រទេសន័រវែសវិញ សហជីពពលករក្នុងតំបន់ជីកប្រេង និងឧស្ម័ន បានបន្តធ្វើកូដកម្មកាលពីថ្ងៃចន្ទ។ អ្នកចូលរួមកូដកម្ម២រូបក្នុងប្រទេសអ៊ីរ៉ង់ បានបាត់បង់ជីវិតកាលពីថ្ងៃអាទិត្យនៅ Samawa បន្ទាប់ពីមានហិង្សាជាមួយកង កម្លាំងសន្តិសុខ ។ ការធ្វើកូដកម្មមិនទាន់ប៉ះពាល់ដល់ផលិតកម្មប្រេងឆៅឡើយ ប៉ុន្តែរដ្ឋមន្ត្រីរតនាគាររបស់សហរដ្ឋអាមេរិក លោក Steven Mnuchin បាននិយាយកាលពីថ្ងៃចន្ទថា សហរដ្ឋអាមេរិកមានគោលដៅបញ្ឈប់ការនាំចេញប្រេងអុីរ៉ង់ដល់កម្រិតសូន្យ ៕
ចែករំលែកព័តមាននេះ