រាជធានីភ្នំពេញ ៖ រថយន្តពណ៌ស្លែមួយគ្រឿងក្រពឹតផ្នែកខាងមុខ និងដាច់កាឡេកង់មុខបើកទៅមុខលែងរួច ពេលដែលកំពុងតែបើកបរតាមផ្លូវសុខៗ ក៏ស្រាប់តែមានរថយន្តពណ៌សមួយគ្រឿងដែលបើកបរដោយបុរសវ័យចំណាស់ម្នាក់ចេញពីកន្លែងលាងមកបុកពេញទំហឹង ហើយបណ្តាលឱ្យរថយន្តពណ៌សនោះរួញមុខខ្លួនឯងផងដែរ ។ ករណីគ្រោះថ្នាក់ចរាចរណ៍នេះបានកើតឡើងនៅពីវេលាម៉ោង១០និង១៥នាទីព្រឹកថ្ងៃទី១៨ ខែកក្កដា ឆ្នាំ២០១៨ នៅចំណុចខាងមុខហាងលាងរថយន្ត ដែលស្ថិតនៅផ្លូវលេខ១៦៣ កែងនឹងផ្លូវលេខ៤៨០ ក្នុងសង្កាត់ផ្សារដើមថ្កូវ ខណ្ឌចំការមន។
តាមប្រភពព័ត៌មានពីអ្នករត់ម៉ូតូរ៉ឺមកកង់បីម្នាក់ដែលបានឃើញហេតុការណ៍បានប្រាប់ឱ្យដឹងថា មុនពេលកើតហេតុ គាត់បានបើកម៉ូតូរ៉ឺម៉កកង់បីរបស់គាត់មកឈប់ចតចាំដឹកម៉ូយនៅក្បែរកន្លែងកើតហេតុខាងលើ ហើយបានឃើញរថយន្តមួយគ្រឿងពណ៌ស្លែ ពាក់ស្លាកលេខ ភ្នំពេញ ២E-៦៦៩៥ ដែលបើកបរដោយបុរសវ័យក្មេងម្នាក់ ធ្វើដំណើរតាមបណ្តោយផ្លូវលេខ១៦៣ ក្នុងទិសដៅពីត្បូងទៅជើងតែម្នាក់ឯង ។
លុះមកដល់កន្លែងកើតហេតុ ក៏ស្រាប់តែមានរថយន្តមួយគ្រឿង ពណ៌ស ពាក់ស្លាកលេខ ភ្នំពេញ ២F-៩១៤៩ ដែលបើកបរដោយបុរសវ័យចំណាស់ម្នាក់ ដែលទើបនឹងលាងរថយន្តរួច ហើយបើកចេញពីកន្លែងលាងនោះ ក៏ស្រាប់តែបោះពួយទៅបុកនឹងរថយន្តពណ៌ស្លែនោះ លាន់ឮសូរតែ «ក្ឌាំងដូចរន្ទះ» យ៉ាងខ្លាំងតែម្តង។
តាមប្រភពដដែលបានប្រាប់បន្តទៀតថា ករណីគ្រោះថ្នាក់ចរាចណ៍នេះដែរ ទំនងជាកើតឡើងដោយសារតែបុរសវ័យចំណាស់ម្នាក់ខាងលើបានបើកបររថយន្តរបស់គាត់ចេញពីកន្លែងលាងរថយន្តនោះ ទំនងជាជាន់ហ្គាជ្រុល ទើបបានជាបោះពួយហោះទៅបុករថយន្តពណ៌ស្លែដែលកំពុងតែបើកបរតាមផ្លូវសុខៗ បណ្តាលឱ្យរថយន្តពណ៌ស្លែ រងការខូចខាតក្រពឹតផ្នែកខាងមុខ និងដាច់កាឡេកង់មុខបើកទៅមុខលែងរួច ចំណែករថយន្តពណ៌សរងការខូចខាតរួញមុខខ្លួនឯង ហើយក្នុងហេតុការណ៍គ្រោះថ្នាក់ចរាចរណ៍នេះដែរមិនបានបង្កឱ្យមនុស្សណាម្នាក់រងរបួសឡើយ។
ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះមកដល់កន្លែងគ្រោះថ្នាក់ចរាចណ៍រវាងរថយន្តទាំងពីរគ្រឿង ហើយធ្វើការវាស់វែង រួចក៏ឱ្យរថយន្តពណ៌សបើកទៅចតនៅលើចិញ្ចើមផ្លូវ ចំណែកឯរថយន្តពណ៌ស្លែ ដោយសារដាច់កាឡេកង់មុខបើកទៅមុខមិនរួចក៏បានរក្សានៅកន្លែងដដែល។
ដោយមិនចង់ឱ្យមានរឿងវែងឆ្ងាយតទៅទៀត និងដឹងពីកំហុសរបស់ខ្លួននោះ ភាគីខាងរថយន្តពណ៌សយល់ព្រមចេញសងថ្លៃជួសជុលទាំងស្រុងទៅឱ្យរថយន្តពណ៌ស្លែ ដើម្បីបញ្ចប់រឿងនៅនឹងកន្លែងកើតហេតុភ្លាមៗតែម្តង ៕
ចែករំលែកព័តមាននេះ