ខេត្តរតនគិរី ៖ រថយន្តសាំយ៉ុងដឹកឈើប្រណីត១គ្រឿង ត្រូវមេព្រៃមួយរូបចាប់ឃាត់ ។ អ្វីដែលត្រូវបានកត់សម្គាល់នោះ គឺឈ្មួញជាម្ចាស់ឈើបានហៅបក្សពួកមកតដៃ បំណងរំដោះយករថយន្តដឹកឈើនោះទៅវិញ តែមិនបានសម្រេច ក៏ក្លាយជាសង្គ្រាមយកឈ្នះរៀងៗខ្លួន ។
ហេតុការណ៍នោះ បានកើតឡើងនៅថ្ងៃទី១៥ កក្កដា កន្លងមកនេះ នៅវេលាម៉ោង៣ និង៣០នាទីរសៀល លើផ្លូវជាតិលេខ៧៨A ត្រង់ចំណុចលើទួលអូរត្រាវ ស្ថិតនៅភូមិភ្នំ សង្កាត់យក្សឡោម ក្រុងបានលុងដំណើររឿងចាប់រថយន្តដឹកឈើខាងលើ ត្រូវបានលោក ទន់ វីរភាព នាយរងផ្នែករដ្ឋបាលព្រៃឈើស្រុកអូរជុំ និងជាអ្នកចុះចាប់ផ្ទាល់បានឱ្យដឹងថា នៅក្នុងសកម្មភាពចុះបង្ក្រាបនេះ គាត់មានគ្នាពីរនាក់ បានឃាត់រថយន្តសាំយ៉ុងដឹកឈើមួយគ្រឿងមានផ្លាកលេខកំពង់ចាម២A-៥៥៨៨ ពណ៌ស ផ្ទុកឈើប្រភេទធ្នង់ពេញ បំណងយកទៅលក់នៅប្រទេសវៀតណាម តាមច្រកទ្វារអន្តរជាតិអូរយ៉ាដាវ ដែលជាច្រកចេញឈើប្រចាំខែ ប្រចាំឆ្នាំ ។
លោកបានបន្តទៀតថា ពេលដែលលោកឃាត់រថយន្តដឹកឈើនោះ ម្ចាស់រថយន្តមិនព្រមឈប់ នឹងព្យាយាមបើករត់ ដោយឃើញសកម្មភាពបែបនេះ លោកបានយកដែកស្រួចចាក់បំបែកកង់រថយន្តដឹកឈើ ធ្វើឱ្យក្រុមឈ្មួញដែលមានគ្នាជាច្រើននាក់ ចាប់ដៃលោកមិនឱ្យចាក់បំបែកកង់ និងរុញទ្រូងលោកឱ្យផ្ងារក្រោយព្រមទាំងមានបក្សពួកខាងឈ្មួញឈើពីរបីនាក់ទៀត កាន់បំពង់ទីបគំរាមវាយ ។
លោកមេព្រៃបានឱ្យដឹងទៀតថា ក្រោយចាក់បំបែកកង់រថយន្តហើយនោះ ក្រុមឈ្មួញបានដូរកង់រថយន្តបើករត់ទៅមុខបន្តទៀត ។ លោកមេព្រៃឱ្យដឹងទៀតថា លោកបានបើករថយន្តឡិចស៊ីស៣៣០ កាក់រថយន្តដឹកឈើជាបន្ត ខណៈពេលនោះក្រុមឈ្មួញបានយករថយន្តស៊េរីទំនើបពីរគ្រឿងទៀតមកកៀររថយន្តលោកដូចនៅក្នុងខ្សែភាពយន្ត ធ្វើឱ្យប្រជាពលរដ្ឋដែលធ្វើដំណើរតាមដងផ្លូវមានការភ្ញាក់ផ្អើលយ៉ាងខ្លាំង ។
ក្នុងខណៈដេញកៀរគ្នានោះរថយន្តលោកបានឆ្កូតថ្នាំខាងឆ្វេងយ៉ាងដំណំ តែលោកអត់មានរបួសធ្ងន់ធ្ងរទេ គ្រាន់តែគ្រិចកដៃខាងស្តាំ ។ ការដេញកៀរគ្នានោះរថយន្តដឹកឈើបើកគេចបានជាង២០គីឡូម៉ែត្រ ទើបចាប់បាននៅវេលាម៉ោង៧យប់ក្នុងថ្ងៃដដែល ត្រង់ចំណុចភូមិបរកែវចាស់ ឃុំឡាមិញ ស្រុកបរកែវ ។ បច្ចុប្បន្ន វត្ថុតាងឈើនិងរថយន្ត យកមករក្សាទុកនៅផ្នែករដ្ឋបាលព្រៃឈើស្រុកបរកែវហើយ ។
លោក ទន់ វីរភាព បានបន្តទៀតថា ការបង្ក្រាបរថយន្តដឹកឈើនេះគឺមានការលំបាកខ្លាំងដោយមានបទបញ្ជាពីលោក កែប កត់ នាយខណ្ឌរដ្ឋបាលព្រៃឈើខេត្ត បានបន្ថែមមេព្រៃ៧ទៅ៨នាក់ទៀត ទើបចាប់បាន ។ លោកថា នៅក្នុងនោះដែរកាលពីយប់ថ្ងៃទី១៤ កក្កដា លើផ្លូវជាតិលេខ៧៨ ស្ថិតនៅភូមិត្រពាំងច្រេស ឃុំត្រពាំងក្រហម ស្រុកកូនមុំ ក៏មានករណីរថយន្តក្រុមអ្នកកាន់កាតកាសែត៤គ្រឿង បានកាក់រថយន្តដឹកឈើម៉ាកសាំយ៉ុង១គ្រឿង ហើយត្រូវរថយន្តដឹកឈើបុក ក៏មានជម្លោះទាស់ទែងគ្នារហូតមានអំពើហិង្សាកើតឡើង ដោយភាគីខាងរថយន្តដឹកឈើជាច្រើននាក់ បានព្រួតគ្នាវាយរថយន្តអ្នកកាន់កាតកាសែត ទាំង៤គ្រឿងនោះ បណ្តាលឱ្យបែកកញ្ចក់ខូចខាតមិនតិចទេ ។
ក្រោយពីជម្លោះកើតឡើង អ្នកប្រើប្រាស់កាតកាសែតទាំងនោះ បានរត់ចោលរថយន្តពីរគ្រឿងម៉ាកកាមរីគូទស្វិតទុកចោលកន្លែងកើតហេតុ ក្រោយមកទៀតសមត្ថកិច្ចស្រុកកូនមុំបានអូសមករក្សាទុកនៅអធិការដ្ឋានស្រុកកូនមុំ ។សមត្ថកិច្ចប៉ូលិសបានឱ្យដឹងថា រថយន្តពីរគ្រឿងនោះត្រូវបានសមត្ថកិច្ចប្រគល់ឱ្យពួកគេវិញនៅថ្ងៃទី១៦ កក្កដា ដោយគ្មានពាក្យបណ្តឹងអ្វីទាល់តែសោះ ៕
ចែករំលែកព័តមាននេះ