រាជធានីភ្នំពេញ ៖ បុណ្យចូលព្រះវស្សាក៏ជាបុណ្យដ៏ធំមួយដែលអាចចាត់ទុកថា ជាបុណ្យដែលមាន សារៈសំខាន់ណាស់នៅក្នុងចំណោមបុណ្យផ្សេងៗនៅក្នុងវិស័យព្រះពុទ្ធសាសនា។ ជារៀងរាល់ឆ្នាំ នៅពេលដល់ថ្ងៃខែដែលត្រូវប្រារឰពីធីបុណ្យចូលព្រះវស្សា ប្រជាពលរដ្ឋដែលជាអ្នកកាន់ ព្រះពុទ្ធសាសនាក៏បាននាំគ្នាជ្រះថ្លារៀបចំគ្រឿងសក្ការៈ និងគ្រឿងឧបភោគបរិភោគផ្សេង ៗសម្រាប់ប្រគេនដល់ភិក្ខុសង្ឃឆាន់ និងប្រើប្រាស់ក្នុងរដូវកាលចូលកាន់ព្រះវស្សា។
ពិធីបុណ្យចូលកាន់ព្រះវស្សាមានរយៈ៣ខែ ដោយចាប់ពីថ្ងៃ១រោច ខែអាសាឍ ត្រូវនឹងថ្ងៃទី២៨ ខែកក្កដា រហូតដល់ថ្ងៃ១៥កើត ខែអស្សុជ ត្រូវនឹងថ្ងៃទី២៤ ខែតុលា ឆ្នាំ២០១៨។ ជាក់ស្តែងនៅសល់តែជាង១០ថ្ងៃ ទៀតប៉ុណ្ណោះ បុណ្យចូលកាន់ព្រះវស្សានឹងឈានចូលមកដល់។ ដើម្បីចូលរួមលើកស្ទួយវិស័យ ព្រះពុទ្ធសាសនា ដែលជាសាសនារបស់រដ្ឋផងនោះ រដ្ឋបាលរាជធានីភ្នំពេញ បានត្រៀមលក្ខណៈ រួចជាស្រេច ដើម្បីនាំទៀនវស្សា ប្រេងកាត បច្ច័យ និងទេយ្យវត្ថុមួយចំនួន ទៅប្រគេនដល់ព្រះសង្ឃ គង់នៅក្នុងវត្តចំនួន១៥០វត្តទូទាំងរាជធានីភ្នំពេញ។
ទៀនវស្សា ប្រេងកាត និងទេយ្យវត្ថុមួយចំនួន ត្រូវ បានដឹកបញ្ជូនយកទៅរក្សាទុកនៅរដ្ឋបាលរាជធានីភ្នំពេញអស់ហើយ មុននឹងនាំយកទៅប្រគេនដល់ ព្រះសង្ឃ ដែលត្រៀមគង់ចាំព្រះវស្សានៅទាំងអស់នៅក្នុងទីអារាមនារាជធានីភ្នំពេញ។ មន្ត្រីរដ្ឋបាលរាជធានីភ្នំពេញ បានឲ្យដឹងថា ដោយមានការណែនាំពី អភិបាលរាជធានីភ្នំពេញ ទៀនព្រះវស្សា និងទេយ្យវត្ថុមួយចំនួនទៀត រដ្ឋបាលរាជធានីភ្នំពេញ បានត្រៀមប្រគល់បន្តទៅឲ្យខណ្ឌ ទាំង១២ ដើម្បីយកទៅប្រគេនដល់វត្តនីមួយៗនៅក្នុងមូលដ្ឋានរបស់ខ្លួន គឺបញ្ជូនទៅតាមខណ្ឌឲ្យបាន មុនល្ងាចថ្ងៃទី១៧ កក្កដានេះ។
មន្ត្រីដដែល បានបន្តថា សម្រាប់មួយវត្ត ទទួលបានបច្ច័យ១០ម៉ឺនរៀល ទៀនវស្សា១គូ សាដក១កញ្ចប់ អង្ករចំនួន១០០គីឡូក្រាម ប្រេងមួយកានចំណុះ៣០លីត្រ ស្ករស១បាវទម្ងន់២៥គីឡួក្រាម ទឹកដោះគោចំនួន១កេស ៤៨កំប៉ុង ទឹកក្រូច២កេស ទឹកបរិសុទ្ធ២កេស មី២កេស និងឧបត្ថមសហគមក្មេងវត្តចំនួន៥លានរៀលផងដែរ៕
ចែករំលែកព័តមាននេះ