ខេត្តកំពង់ស្ពឺ ៖ ម៉ូតូស្គូពី១គ្រឿងត្រូវបានក្មេងប្រុសអាយុ១២ឆ្នាំម្នាក់ ប្រទះឃើញនៅក្នុងគុម្ពសង្កែ មុខវត្តសំបួរ ខណៈដែលក្មេងប្រុសរូបនោះកំពុងតែដើរជីកជន្លេនដើម្បីដាក់បង្កៃ។ ការប្រទះឃើញនេះ ត្រូវបានមជ្ឈដ្ឋានមហាជនដាក់ការសង្ស័យថា ប្រហែលជាក្រុមជនសង្គមងងឹតយកមកប្លុងចោល។ ការប្រទះឃើញនេះកើតឡើងកាលពីវេលាម៉ោង១១ព្រឹក…
ខេត្តកំពង់ស្ពឺ ៖ ម៉ូតូស្គូពី១គ្រឿងត្រូវបានក្មេងប្រុសអាយុ១២ឆ្នាំម្នាក់ ប្រទះឃើញនៅក្នុងគុម្ពសង្កែ មុខវត្តសំបួរ ខណៈដែលក្មេងប្រុសរូបនោះកំពុងតែដើរជីកជន្លេនដើម្បីដាក់បង្កៃ។ ការប្រទះឃើញនេះ ត្រូវបានមជ្ឈដ្ឋានមហាជនដាក់ការសង្ស័យថា ប្រហែលជាក្រុមជនសង្គមងងឹតយកមកប្លុងចោល។ ការប្រទះឃើញនេះកើតឡើងកាលពីវេលាម៉ោង១១ព្រឹក ថ្ងៃទី១៧ ខែកក្កដា ឆ្នាំ២០១៨ នៅក្នុងកុម្ពសង្កែ អែបផ្លូវចូលក្នុងវត្តសំបួរ ស្ថិតនៅក្នុងភូមិចម្ការដូង សង្កាត់ច្បារមន ក្រុងច្បារមន ខេត្តកំពង់ស្ពឺ។
បើតាមសម្តីរបស់លោកអនុសេនីយ៍ឯក អ៊ុត សុផា នាយប៉ុស្តិ៍នគរបាលសង្កាត់ច្បារមន បានប្រាប់ឲ្យដឹងថា ម៉ូតូដែលក្មេងប្រុសប្រទះឃើញនោះ ម៉ាកហុងដាស្គូពី ពណ៌ស ពាក់ស្លាកលេខ ភ្នំពេញ 1GH-5603 មិនទាន់រកម្ចាស់ឃើញនៅឡើយនោះទេ។ លោកនាយប៉ុស្តិ៍បានបន្តទៀតថា នៅមុនពេលប្រទះឃើញម៉ូតូខាងលើនេះ គឺក្មេងប្រុសឈ្មោះ ហេង សុផល អាយុ១២ឆ្នាំ រៀនថ្នាក់ទី៦ សាលាបឋមសិក្សាសំបួរ រស់នៅក្នុងភូមិចម្ការដូង សង្កាត់ច្បារមន ក្រុងច្បារមន ខេត្តកំពង់ស្ពឺ បានយកចបកាប់មួយដើររកជីកកាយយកជន្លេនដើម្បីយកទៅដាក់បង្កៃដើម្បីយកត្រី។
ពេលកំពុងតែដើររកជីកជន្លេននោះ ក៏ស្រាប់តែប្រទះឃើញម៉ូតូស្គូពីខាងលើត្រូវបានគេយកមកលាក់ គ្របក្នុងគុម្ពសង្កែ កាច់មែកឈើគ្របពីលើ ឃើញដូចនោះក្មេងប្រុសបានរត់ទៅប្រាប់ប្រជាពលរដ្ឋ ដែលមានផ្ទះក្បែរកន្លែងកើតហេតុមានការភ្ញាក់ផ្អើល និងបានរាយការណ៍ទៅនគរបាលមូលដ្ឋានលោក អ៊ុត សុផា ក៏បានចុះមកពិនិត្យ និងធ្វើការសាកសួរប្រជាពលរដ្ឋនៅក្បែរកន្លែងកើតហេតុ ក្រែងមានបាត់ ម៉ូតូដែលមានភិនភាគ និងស្លាកលេខខាងលើនេះ ប៉ុន្តែមិនទាន់រកម្ចាស់ឃើញនៅឡើយទេ។
លោកនាយប៉ុស្តិ៍ដដែលបានបន្តថា សូមអំពាវនាវដល់ម្វាស់ម៉ូតូដែលមានភិនភាគ និងស្លាកលេខខាងលើ មិនថានៅក្នុងខេត្តកំពង់ស្ពឺ ឬរាជធានីភ្នំពេញ ឬតាមបណ្តាលខេត្តនានា ទូទាំងប្រទេស ប្រសិនបើ មានបាត់ម៉ូតូមានដូចស្លាកលេខខាងលើសូមមកធ្វើការទំនាក់ទំនងជាមួយនគរបាលក្រុងច្បារមនរៀងរាល់ម៉ោងធ្វើការ។
បើតាមប្រភពពីប្រជាពលរដ្ឋរស់នៅក្បែរកន្លែងកើតហេតុបានចេញចូលតាមផ្លូវនោះ និយាយថា ម៉ូតូនេះគេបានឃើញតាំងពីថ្ងៃសៅរ៍មកម្លេះប៉ុន្តែមិនមានអ្នកណាចាប់អារម្មណ៍។ សូមបញ្ជាក់ថា ម៉ូតូស្គូពីខាងលើត្រូវបាននគរបាលក្រុងច្បារមន នាំយកទៅរក្សាទុកនៅអធិការដ្ឋាន នគរបាលក្រុងច្បារមនសិន រង់ចាំធ្វើការស្រាវជ្រាវស្វែងរកម្ចាស់៕
ចែករំលែកព័តមាននេះ