ខេត្តកោះកុង ៖ នៅស្រុកស្រែអំបិលខេត្តកោះកុង នាថ្ងៃទី១៧ កក្កដា ២០១៨នេះ ក៏មានទឹកជំនន់ភ្លៀងលិចភូមិដ្ឋានប្រជាពលរដ្ឋមួយចំនួនដែរ ។ សេចក្តីរាយការណ៍ពីមន្ត្រីឲ្យដឹងថា ចាប់តាំងពីម៉ោង១០ព្រឹក កម្លាំងអធិការដ្ឋាននគរបាលស្រុកសហការជាមួយកម្លាំងអន្តរាគមន៍នគរបាលមកពីស្នងការដ្ឋាននគរបាលខេត្ត និងកម្លាំងអាវុធហត្ថស្រុក សរុបជាង៣០រូបបានចុះជួយសង្គ្រោះ ជម្លៀស និង ជញ្ជូនសម្ភារប្រជាពលរដ្ឋ ក្នុងភូមិព្រះអង្គកែវ ឃុំដងពែង ស្រុកស្រែអំបិល ទៅកាន់ទីទួលមានសុវត្ថិភាព ដោយបានសង់រោងប្រក់តង់កៅស៊ូ ឲ្យពលរដ្ឋស្នាក់នៅ ជាបណ្តោះអាសន្នផងដែរ ដើម្បីបញ្ចៀសគ្រោះថ្នាក់ផ្សេងៗ ។
បើតាមសមត្ថកិច្ចដែលចុះជួយពលរដ្ឋផ្ទាល់ថ្លែងថា ក្នុងរយៈពេលប៉ុន្មានថ្ងៃ កន្លងមកនេះភ្លៀងបានធ្លាក់ជាប្រចាំទាំងថ្ងៃទាំងយប់នៅក្នុងស្រុកស្រែអំបិលធ្វើឲ្យទឹកជន់លិចនៅចំណុចត្រពាំងរាំង ក្នុងភូមិព្រះអង្គកែវ ឃុំដងពែង ស្រុកស្រែអំបិល ។ ទោះជាយ៉ាងនេះក្តីហេតុការណ៍នេះមិនបណ្តាលឲ្យមានរងគ្រោះថ្នាក់ដល់មនុស្ស ឫសត្វឡើយ ។
ជាមួយគ្នានេះក្នុងស្ថានភាពទឹកកំពុងឡើងខ្លាំងអាជ្ញាធរខេត្តកោះកុងបានអំពាវនាវឲ្យបងប្អូនប្រជាពលរដ្ឋដែលមានលំនៅដ្ឋានតាមដងព្រែកក្នុងស្រុកស្រែអំបិល មេត្តាប្រុងប្រយ័ត្នឲ្យបានខ្ពស់ព្រោះស្ថានភាពទឹកតាមដងព្រែកកំពុងមានការកើនឡើងមិនទាន់ស្បើយឡើយ ៕
ចែករំលែកព័តមាននេះ