ខេត្តកំពង់ធំ ៖ គ្រោះថ្នាក់ចរាចរណ៍រវាងម៉ូតុបុកជាមួយគោយន្តកន្ត្រៃ បណ្តាលឱ្យមនុស្ស២នាក់បានស្លាប់ ។ ហេតុការណ៍នេះបានកើតឡើងកាលពីវេលាម៉ោង៨និង៤០នាទីព្រឹកថ្ងៃទី១៧ ខែកក្កដា ឆ្នាំ២០១៨ ស្ថិតនៅលើផ្លូវជាតិលេខ៦ ក្នុងភូមិស៊ីវត្ថា ឃុំប្រាសាទ ស្រុកសន្ទុក ខេត្តកំពង់ធំ។
ជនរងគ្រោះដែលស្លាប់ទាំង២នាក់រួមមានឈ្មោះសាន់ សុផាត់ ភេទប្រុស អាយុ១៦ឆ្នាំ ជាអ្នកបើកបរម៉ូតូ និងអ្នករួមដំណើរម្នាក់ទៀតឈ្មោះ ហួ គឹមហៀង ភេទប្រុស អាយុ១៦ឆ្នាំ ។ ជនរងគ្រោះទាំងពីរនាក់រស់នៅភូមិត្រើយអូរ ឃុំព្នៅ ស្រុកសន្ទុក ។ ចំណែកម៉ូតូមួយគ្រឿងរបស់ជនរងគ្រោះធុនសេ១២៥ ពណ៌ខ្មៅ ពាក់ស្លាកលេខ កំពង់ធំ ១K-៩៨៨២ ។
បើយោងតាមការឲ្យដឹងពីអ្នកឃើញហេតុការណ៍នៅកន្លែងកើតហេតុបាននិយាយថា នៅមុនពេលកើតហេតុ គេឃើញម៉ូតូមួយគ្រឿងជិះគ្នា២នាក់ បើកបរក្នុងល្បឿនយ៉ាងលឿន បញ្ច្រាសទិសគ្នាជាមួយនឹងគោយន្តកន្ត្រៃ លុះមកដល់ចំណុចកើតហេតុខាងលើ ម៉ូតូរបស់ជនរងគ្រោះក៏បានប៉ះដៃចង្កូតជាមួយនឹងអ្នកជិះកង់ម្នាក់ បណ្តាលអោយរេចង្កូតម៉ូតូទៅបុកជាមួយនឹងគោយន្តកន្ត្រៃដែលកំពុងតែបើកបរនៅខាងស្តាំដៃដែលជាផ្លូវអាទិភាពរបស់គោយន្តយ៉ាងពេញទំហឹង បណ្តាលឱ្យអ្នកបើកបរម៉ូតូ និងអ្នករួមដំណើរម្នាក់រងរបួសធ្ងន់ទាំងពីរនាក់ ហើយក៏បានស្លាប់ពេលដែលបញ្ជូនទៅសង្គ្រោះនៅមន្ទីរពេទ្យ ។
សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍ខាងលើនេះ មូលហេតុបង្កឡើងដោយម៉ូតូបើកបរក្នុងល្បឿនលឿន និងខ្វះការប្រុងប្រយ័ត្ន ៕
ចែករំលែកព័តមាននេះ