ខេត្តតាកែវ ៖ បុរសម្នាក់ត្រូវបានកម្លាំងនគរបាលស្រុកគីរីវង់ធ្វើការឃាត់ខ្លួន រួចកសាងសំណុំរឿងបញ្ជូនមកកាន់ការិយាល័យព្រហ្មទណ្ឌកម្រិតស្រាលខេត្តចាត់ការបន្ត ខណៈពេលដែលជនសង្ស័យបានធ្វើសកម្មលួចសម្ភារអ្នកដទៃ ហើយត្រូវបានកម្លាំងប៉ូលិសស្រុកធ្វើការឃាត់ខ្លួន ហេតុការណ៍នេះបានកើតឡើងនៅថ្ងៃទី១៥ ខែកក្កដា ឆ្នាំ២០១៨ វេលាម៉ោង១៦និង៥០នាទី ក្នុងភូមិដើមអង្កោល ឃុំសោម ស្រុកគីរីវង់ ខេត្តតាកែវ ។
លោកវរសេនីយ ឯក យ៉ុគ សារ៉ាត អធិការនគរបាលស្រុកគីរីវង់បានឲ្យដឹងថា ការបង្ក្រាបករណីអំពើលួចនេះជនបង្កមានឈ្មោះ ជាង ម៉ក់ ភេទប្រុស អាយុ៣៣ឆ្នាំ នៅភូមិឃុំខាងលើ ហើយជនសង្ស័យម្នាក់នេះជាមុខសញ្ញាដ៏សកម្មបានលួចផលដំណាំមាន ផ្លែខ្នុរ ចេក ស្វាយ ល្ហុង ទំពាំង ក្រៅពីនេះគេបានលួចជីបាចស្រូវចំនួន០១បាវ ធ្យូងចំនួន២បាវ ដែលធ្វើឲ្យប្រជាពលរដ្ឋក្នុងមូលដ្ឋានមានការបារម្ភចំពោះទង្វើររបស់ជនសង្ស័យខាងលើនេះ ។
លោកអធិការនគរបាលស្រុកបានបន្តទៀតថា កន្លងមកសមត្ថកិច្ចយើងចេះតែមានការយោគយល់ព្រោះនឹកថា ផលដំណាំដែលលួចទាំងនោះមានលក្ខណៈតិចតួច ម្យ៉ាងជនសង្ស័យជាមនុស្សក្រីក្រ ប៉ុន្តែអង្កេតលើសកម្មភាពគេមិនមានការកែប្រែទើបជាក់ស្តែង ក្នុងថ្ងៃកើតហេតុខាងលើសមត្ថកិច្ចយើងបានចាប់ឃាត់ខ្លួនជនសង្ស័យរួមទាំងមានវត្ថុតាង មានផ្លែខ្នុរចំនួន០៥ផ្លែ និងម៉ូតូកញ្ចាស់០១គ្រឿង សម្រាប់ធ្វើសកម្មភាព ។ រីឯម្ចាស់ផ្លែខ្នុរមានឈ្មោះ ភិន ឌីម ភេទស្រី អាយុ៦៥ឆ្នាំ មានទីលំនៅភូមិជាមួយជនសង្ស័យ ។
ដោយនៅចំពោះមុខប៉ូលិសជនសង្ស័យបាននិយាយសារភាពថា រូបគេពិតជាបានធ្វើសកម្មភាពលួចរបស់របគេជាញឹកញាប់ពិតប្រាកដមែន ។ លោកនាយការិយាល័យព្រហ្មទណ្ឌកម្រិតស្រាលខេត្តបានឲ្យដឹងថា នៅពេលនេះយើងកំពុងកសាងសំណុំរឿង ដើម្បីបញ្ជូនជនសង្ស័យទៅសាលាដំបូងខេត្តផងដែរ ៕
ចែករំលែកព័តមាននេះ