ប្រភពពីក្រុងហ្សាការតា ប្រទេសឥណ្ឌូណេស៊ី កាលពីពេលថ្មីៗកន្លងមកផ្សាយថា មន្ត្រីជាន់ខ្ពស់ចំនួន២នាក់នៅក្នុងរដ្ឋាភិបាល គឺលោកស្រី Sri Mulyani រដ្ឋមន្ត្រីក្រសួងហិរញ្ញវត្ថុ និងលោកអ៊ីកណាស៊ីអ៊ូស ចូណាន (Ignasius Jonan) រដ្ឋមន្ត្រីក្រសួងរ៉ែ និងថាមពល បានចុះហត្ថលេខារួមជាមួយលោករីឆាត អ៊ែតគ័រសុន (Richard Adkerson) អនុប្រធានក្រុមហ៊ុន «Freeport-McMoRan» នៃមុខជំនួញអណ្ដូងរ៉ែដ៏ធំបំផុតនៅលើពិភពលោក ពីសហរដ្ឋអាមេរិក ។ ការចុះហត្ថលេខានេះបានធ្វើឡើងនៅក្រុងហ្សាការតា កាលពីថ្ងៃទី១២ កក្កដា ២០១៨ ។
នៅក្នុងព្រមព្រៀងនោះបានកំណត់ឲ្យ «Inalum» ផ្នែកអណ្ដូងរ៉ែដ៏ធំបំផុតរបស់ឥណ្ឌូណេស៊ីបង្កើនការកាន់កាប់ភាគហ៊ុនពី១០ភាគរយ ទៅ៥១ភាគរយនៃអណ្ដូងរ៉ែមាសដ៏ធំបំផុតនៅលើពិភពលោក និងជាអណ្ដូងរ៉ែទង់ដែងធំនៅលំដាប់ទី២ ស្ថិតក្រោមការគ្រប់គ្រងរបស់ក្រុមហ៊ុន «Freeport-McMoRan» នៅក្នុងខេត្តប៉ាពួ ភាគខាងលិចប្រទេស ។ មានន័យថា ចាប់ពីពេលនេះតទៅរដ្ឋាភិបាលក្រុងហ្សាការតា គឺជាអ្នកកាន់ភាគហ៊ុនធំបំផុតនៃអណ្ដូងរ៉ែនេះ ។
ចំណែកលោកប្រធានាធិបតីJoko Widodo របស់ឥណ្ឌូណេស៊ីថ្លែងថា កិច្ចព្រមព្រៀងនោះ គឺជាចំណុចចាប់ផ្ដើមដ៏ល្អរបស់ឥណ្ឌូណេស៊ី និងបានគ្រប់គ្រងលើធនធានធម្មជាតិរបស់ប្រទេសដោយខ្លួនឯង ។
ទោះជាយ៉ាងណាក៏ដោយ មេដឹកនាំឥណ្ឌូណេស៊ីបានទទួលស្គាល់ថា ការចរចាក្នុងអំឡុងពេលកន្លងមក បានបង្ហាញនូវភាពតានតឹង ដើម្បីសម្រេចកិច្ចព្រមព្រៀងឲ្យបានផលប្រយោជន៍ស្មើគ្នាទាំង២ភាគី ៕
ចែករំលែកព័តមាននេះ