ខេត្តកណ្តាល ៖ ដោយសារភ្លើងប្រចណ្ឌនារីម្នាក់បានស្លាប់ក្នុងថ្លុកឈាមយ៉ាងអាណោចអាធម៌ ខណៈដែលបុរសកំណាចជាប្តីយកពូថៅកាប់ជាច្រើនពូថៅ ។ ហេតុការណ៍នេះបានកើតឡើងនៅវេលាម៉ោង២០និង៣០នាទី ថ្ងៃទី១៥ ខែកក្កដា ឆ្នាំ២០១៨ នៅចំណុចលើផ្ទះជនរងគ្រោះ ស្ថិតនៅភូមិអង្គពពាយ ឃុំក្រាំងម្កាក់ស្រុក អង្គស្នួល ខេត្តកណ្តាល ។
ជនរងគ្រោះឈ្មោះ ឈិត ម៉ាច ភេទស្រី អាយុ៣៦ឆ្នាំ ជនជាតិខ្មែរ កម្មការិនីរោងចក្រ មានទីលំនៅសព្វថ្ងៃស្នាក់នៅភូមិអង្គពពាយ ឃុំក្រាំងម្កាក់ ស្រុកអង្គស្នួល ខេត្តកណ្តាល ។ ជនសង្ស័យឈ្មោះ ណន ណាត ភេទប្រុស អាយុ៣៣ឆ្នាំ ជនជាតិខ្មែរ កម្មករសំណង់ មានទីលំនៅ សព្វថ្ងៃស្នាក់នៅដូចជនរងគ្រោះដែរ ។ ចំណែកវត្ថុតាងចាប់យកពូថៅដៃ០១ដងឈើ ប្រវែង២៣ស.ម ។
លោកវរសេនីយ៍ មាន សំណាង អធិការស្រុកអង្គស្នួលបានឲ្យដឹងថា នៅមុនពេលកើតហេតុ យប់ថ្ងៃទី១៥ ខែកក្កដា ឆ្នាំ២០១៨ ជនរងគ្រោះ និងជនសង្ស័យជាប្តីប្រពន្ធបានឈ្លោះប្រកែកគ្នា ហើយក៏ស្ងាត់មាត់ទៅ ។ លុះពេលជនរងគ្រោះដេកលង់លក់ជនសង្ស័យបានយកពូថៅ កាប់ជនរងគ្រោះ៥ពូថៅសម្តៅចំក្បាល បណ្តាលឲ្យស្លាប់ភ្លាមៗ ហើយយកភួយគ្របដណ្តប់ពីលើ ។ លុះព្រឹកឡើងថ្ងៃទី១៦ កក្កដា ២០១៨ វេលាម៉ោង០៨ ជនសង្ស័យបាននាំកូន២នាក់តូចៗ ជិះម៉ូតូគេចខ្លួនទៅស្រុកកំណើតនៅភូមិត្រពាំងក្រសាំង ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺបាត់ទៅ ។
លុះដល់ថ្ងៃទី១៦ កក្កដា ២០១៨ ឈ្មោះ ឈិត តាក់ ភេទប្រុស អាយុ ២៧ឆ្នាំ ស្នាក់នៅភូមិជាមួយគ្នា ត្រូវជាប្អូនបង្កើតរបស់ជនរងគ្រោះឃើញផ្ទះបងមិនបើកភ្លើងអំពូលក៏បានដើរទៅមើល ហើយស្រែកហៅមិនឮ រួចបានឡើងទៅមើលនៅលើផ្ទះបញ្ចាំងភ្លើងពិល ឃើញជនរងគ្រោះដេកគ្របភួយស្លាប់បាត់ទៅហើយ ទើបចុះមកវិញមកប្រាប់ប្រពន្ធ និងទៅរាយការណ៍ជូនមេភូមិ ព្រមទាំងសមត្ថកិច្ចមូលដ្ឋាន ក្រោយពីទទួលបានព័ត៌មាននេះភ្លាមកម្លាំងសមត្ថកិច្ចស្រុកអង្គស្នួល សហការជាមួយសមត្ថកិច្ចជំនាញខេត្តចុះទៅដល់កន្លែងកើតហេតុពិនិត្យហេតុការណ៍ និងធ្វើកោសល្យវិច្ច័យ ។ បើកធ្វើការស្រាវជ្រាវស៊ើបអង្កេតលុះដល់ម៉ោង២២និង១០នាទី កម្លាំងសមត្ថកិច្ចបានឈានទៅកំណត់មុខសញ្ញាសង្ស័យដោយសហការជាមួយកម្លាំងសមត្ថកិច្ចនគរបាលស្រុកឧដុង្គ ខេត្តកំពង់ស្ពឺ ឈានទៅដល់ធ្វើការឃាត់ខ្លួនជនសង្ស័យបាន នៅចំណុចនៅភូមិត្រពាំងក្រសាំង ឃុំ ក្សេមក្សាន្ត ស្រុកឧដុង្គ ខេត្តកំពង់ស្ពឺ ។
នៅចំពោះមុខសមត្ថកិច្ចនគរបាល ជនសង្ស័យបានសារភាពថា ខ្លួនពិតជាបានប្រព្រឹត្តអំពើ ឃាតកម្មដោយយកពូថៅកាប់ទៅលើជនរងគ្រោះកំពុងដេកលក់ចំក្បាលចំនួន៥ពូថៅ បណ្តាលឲ្យស្លាប់ភ្លាមៗ មូលហេតុប្រចណ្ឌ និងធ្លាប់មានជម្លោះជាមួយគ្នាជាញឹកញាប់ ។ ជនសង្ស័យរួមជាមួយវត្ថុតាងត្រូវបាននាំមកកាន់អធិការដ្ឋាននគរបាលស្រុកអង្គស្នួល ដើម្បីបន្តចាត់ការតាមនីតិវិធី ៕
ចែករំលែកព័តមាននេះ