ខេត្តកណ្តាល ៖ បុរសម្នាក់បានស្លាប់ពេលដឹកយកទៅសង្គ្រោះនៅមន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍រវាងម៉ូតូបុកជាមួយម៉ូតូ ។ ហេតុការណ៍នេះបានកើតឡើងកាលពីវេលាម៉ោង៥និង៤០នាទីល្ងាចថ្ងៃទី១៦ ខែកក្កដាឆ្នាំ២០១៨ ស្ថិតលើផ្លូវជាតិលេខ១ ចន្លោះគីឡូម៉ែតលេខ២៣ និង២៤ ចំណុចភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល។
តាមប្រភពព័ត៌មានបានឱ្យដឹងថា ម៉ូតូទាំង២គ្រឿងខាងលើរួមមាន ម៉ូតូមួយគ្រឿងម៉ាកវ៉េវ ពណ៍ខ្មៅ ពាក់ស្លាកលេខ កណ្តាល ១R-៩៧៣៩ បើកបរដោយឈ្មោះឈឹម សំភ័ស្ស ភេទប្រុស អាយុ១៦ឆ្នាំ មានទីលំនៅភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយខេត្តកណ្តាល រងរបួសធ្ងន់ហើយក៏បានស្លាប់ពេលបញ្ជូនដល់មន្ទីរពេទ្យ ។ ចំណែកម៉ូតូមួយគ្រឿងទៀត(ជិះគ្នា២នាក់)ម៉ាកហុងដាឌ្រឺម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ ១AK-៩២៥៦ អ្នកបើកបរដោយឈ្មោះចាន់ ដារិទ្ធ ភេទប្រុស អាយុ៤៧ឆ្នាំ នៅភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្តាល បានរងរបួសធ្ងន់ និងអ្នករួមដំណើរម្នាក់ឈ្មោះឡឹង សារី ភេទស្រី អាយុ៤៨ឆ្នាំ នៅភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្តាល បានរងរបួសស្រាល ។
បើតាមសាក្សីបានឱ្យដឹងថា ករណីខាងលើបង្កឡើងដោយម៉ូតូមួយគ្រឿងម៉ាកវ៉េវ ពណ៍ខ្មៅ បើកបរដោយឈ្មោះឈឹម សំភ័ស្ស បើកបរក្នុងទិសដៅពីអ្នកលឿងទៅភ្នំពេញ លុះមកដល់ចំណុចកើតហេតុក៏បានបុកពីក្រោយម៉ូតូមួយគ្រឿងទៀតយ៉ាងពេញទំហឹងដែលជិះគ្នា២នាក់ ម៉ាកហុងដាឌ្រីម ពណ៌ខ្មៅ បើកបរដោយឈ្មោះចាន់ ដារិទ្ធ និងរួមដំណើរម្នាក់ ក្នុងទិសដៅស្របគ្នា បណ្តាលអោយដួលម៉ូតូ រីឯអ្នកបើកបរម៉ូតូវ៉េវ ពណ៌ខ្មៅ បានរងរបួសធ្ងន់ត្រូវបានក្រុមគ្រួសារដឹកយកទៅព្យាបាល តែដោយសាររបួសធ្ងន់ធ្ងរពេកជនរងគ្រោះក៏បានស្លាប់ពេលបញ្ជូនដល់មន្ទីរពេទ្យ។ ចំណែកភាគីខាងម៉ូតូម៉ាកហុងដាឌ្រីម បណ្តាលឱ្យអ្នកបើក
បររងរបួសធ្ងន់ រីឯអ្នករួមដំណើរម្នាក់រងរបួសស្រាល ត្រូវបានក្រុមគ្រួសារដឹកយកទៅព្យាបាលនៅមន្ទីរពេទ្យ។
ក្រោយពីទទួលបានព័ត៌មានភ្លាមៗ សមត្ថកិច្ចបានចុះទៅកន្លែងកើតហេតុធ្វើការវាស់វែង និងយកម៉ូតូទាំងពីរគ្រឿងមកអធិការស្រុកដើម្បីដោះស្រាយតាមនីតិវិធី៕
ចែករំលែកព័តមាននេះ