តាមប្រភពពី Bangkok Post បានឱ្យដឹងថា វេជ្ជបណ្ឌិតខាងយោធាម្នាក់ ដែលនៅជាប់ជាមួយនឹងក្មេងៗក្នុងរូងភ្នំតាំងពីថ្ងៃរកឃើញ រហូតដល់ថ្ងៃចេញមកក្រៅ បានសរសើរពីក្មេងៗឱ្យមហាជនដឹងតាមរយៈ Facebook របស់ខ្លួន…
តាមប្រភពពី Bangkok Post បានឱ្យដឹងថា វេជ្ជបណ្ឌិតខាងយោធាម្នាក់ ដែលនៅជាប់ជាមួយនឹងក្មេងៗក្នុងរូងភ្នំតាំងពីថ្ងៃរកឃើញ រហូតដល់ថ្ងៃចេញមកក្រៅ បានសរសើរពីក្មេងៗឱ្យមហាជនដឹងតាមរយៈ Facebook របស់ខ្លួន ។
វេជ្ជបណ្ឌិត Pak Loharachun (ពាក់វែនតានៅក្នុងរូប) បានសរសេរលើ Facebook របស់ខ្លួនថា៖ «អ្វីដែលក្រុមក្មេងៗ Wild Boars ធ្វើឲ្យខ្ញុំមិនសរសើរមិនបាន គឺទឹកចិត្តសុទិដ្ឋិនិយម និងសីលធម៌ក្នុងរស់នៅរបស់ពួកគេ ។ ជារៀងរាល់ថ្ងៃ ពេលនៅក្នុងរូងភ្នំ ពួកគេតែងតែព្យាយាមជីកប្រហោងមួយចូលក្នុងជញ្ជាំងភ្នំ ក្នុងគោលបំណងរកផ្លូវចេញ ទាំងកាយមិនមានអ្វីទទួលទានសោះ» ។
លោកវេជ្ជបណ្ឌិត Pak បានប្រាប់ទៀតថា ពេលដែលលោកទៅដល់ជួបក្មេងៗក្នុងរូងភ្នំ ពួកគេតែងតែយកសំរាមប្លាស្ទិកសល់ពីការបរិភោគអាហារ (អាហារដែលក្រុមសង្គ្រោះយកទៅឲ្យ) ទៅដាក់ក្នុងថង់សំរាមជានិច្ច។
ជាមួយគ្នានេះដែរ លោកវេជ្ជបណ្ឌិតក៏បានឆ្លៀតសរសើរពីគ្រូបង្វឹក Ek ដែលបាននៅជាមួយក្មេងៗតាំងពីជាប់ក្នុងរូងភ្នំដំបូង ។ លោកដុកទ័រសរសេរថា លោក Ek តែងតែមើលថែក្មេងរហូតតាំងពីមុនពេលក្រុមជួយសង្គ្រោះរកឃើញ ហើយក៏ហាមក្មេងៗមិនឲ្យយកអ្វីផ្តេសផ្តាសពីក្នុងរូងភ្នំផងដែរ។
គួរបញ្ជាក់ផងដែរថា ខាងមន្ទីរពេទ្យបានប្រាប់ឱ្យដឹងថា ក្មេងៗអាចនឹងចាកចេញពីមន្ទីរពេទ្យនៅថ្ងៃព្រហស្បត្តិ៍នេះ ព្រោះតែស្ថានភាពរបស់ពួកគេបានប្រសើរច្រើនហើយនៅពេលនេះ ។
ចែករំលែកព័តមាននេះ