រាជធានីភ្នំពេញ ៖ រថយន្តបែនដឹកដីមួយគ្រឿង ខណៈបើកបរនៅផ្លូវចង្អៀតបានជ្រុលទៅកៀររថយន្តកាមរីឆ្លាមមួយគ្រឿង ដែលធ្វើដំណើរស្របទិសគ្នា បណ្តាលឱ្យរងការខូចខាតបន្តិចបន្តួច ប៉ុន្តែភាគីទាំងសងខាងមិនព្រមសម្រួលគ្នាទេ គឺគិតតែពីថតវីដេអូបង្កការកកស្ទះចរាចរណ៍អស់រាប់ម៉ោង ។
ករណីនេះ កើតឡើងកាលពីវេលាម៉ោង០៦ និង៣០នាទីល្ងាចថ្ងៃទី១៥ កក្កដា ស្ថិតនៅមុខវត្តស្ទឹងមានជ័យ ផ្លូវព្រះមុនីរ៉េត សង្កាត់ស្ទឹងមានជ័យ២ ខណ្ឌមានជ័យ ។ ប្រភពព័ត៌មាននៅកន្លែងកើតហេតុឱ្យដឹងថា រថយន្តកាមរីឆ្លាម ពណ៌ខ្មៅ ពាក់ផ្លាកលេខភ្នំពេញ ២M-៨១៨៥ បើកបរដោយបុរសម្នាក់ ធ្វើដំណើរតាមផ្លូវព្រះមុនីរ៉េតពីខាងលិចទៅខាងកើត និងរួមដំណើរដោយនារីវ័យក្មេង៣នាក់ ។
ខណៈមកដល់ចំណុចខាងលើ ស្រាប់តែមានរថយន្តបែនដឹកដីមួយគ្រឿងម៉ាកហ៊ីយ៉ាន់ដាយ ពណ៌ក្រហម ពាក់ផ្លាកលេខ ភ្នំពេញ ៣B-៣០០៥ ធ្វើដំណើរស្របគ្នា ហើយដោយផ្លូវចង្អៀតផងនោះ ក៏ជ្រុលទៅកៀររថយន្តកាមរីឆ្លាមបណ្តាលឱ្យរងការខូចខាតក្រពឹតគូទក្រោយចំហៀងខាងឆ្វេងបន្តិច តែមិនមានគ្រោះថ្នាក់ដល់មនុស្សទេ ។
ដោយឡែក រថយន្តបែនដឹកដីអត់មានខូចខាតឡើយ ហើយបានប្រកែកថា រថយន្តកាមរីឆ្លាម ជាអ្នកបើកមកកៀររថយន្តបែនដឹកដីរបស់ខ្លួនទៅវិញទេ ។ បន្ទាប់ពីកើតហេតុ ភាគីទាំងសងខាងមិនព្រមសម្រួលគ្នាឡើយ គឺបុរសជាអ្នកបើករថយន្តកាមរីឆ្លាម គិតតែយកទូរស័ព្ទទៅថតវីដេអូដូចអ្នកយកព័ត៌មានដែរ បង្កឱ្យមានការកកស្ទះចរាចរណ៍រាប់ម៉ោង ។
បន្តិចក្រោយមក ទើបមានតំណាងភាគីទាំងសងខាង មកធ្វើការសម្របសម្រួលគ្នា ដោយខាងរថយន្តបែនដឹកដីជួយចេញការជួសជុលឱ្យខាងរថយន្តកាមរីឆ្លាមដើម្បីបញ្ចប់រឿង ៕
ចែករំលែកព័តមាននេះ