ខេត្តព្រះសីហនុ ៖ គិតត្រឹមម៉ោង១០ព្រឹកនេះ តាមសមត្ថកិច្ចបានឲ្យដឹងថា ចរាចរណ៍តាមបណ្តោយផ្លូវជាតិលេខ៤ ចំណុចឆ្លងកាត់ស្រុកកំពង់សិលាត្រូវបានផ្អាកទាំងស្រុងហើយនៅព្រឹកថ្ងៃទី១៧ កក្កដា២០១៨នេះ បន្ទាប់ពីជំនន់ទឹកភ្លៀងបានជន់ហូរលិចលើស្ពានចំណុចអូរគគី ព្រំប្រទល់ខេត្តកំពង់ស្ពឺ និងស្រុកកំពង់សិលាខេត្តព្រះសីហនុ…
ខេត្តព្រះសីហនុ ៖ គិតត្រឹមម៉ោង១០ព្រឹកនេះ តាមសមត្ថកិច្ចបានឲ្យដឹងថា ចរាចរណ៍តាមបណ្តោយផ្លូវជាតិលេខ៤ ចំណុចឆ្លងកាត់ស្រុកកំពង់សិលាត្រូវបានផ្អាកទាំងស្រុងហើយនៅព្រឹកថ្ងៃទី១៧ កក្កដា២០១៨នេះ បន្ទាប់ពីជំនន់ទឹកភ្លៀងបានជន់ហូរលិចលើស្ពានចំណុចអូរគគី ព្រំប្រទល់ខេត្តកំពង់ស្ពឺ និងស្រុកកំពង់សិលាខេត្តព្រះសីហនុ គីឡូម៉ែត្រលេខ១០៦-១០៧ កាលពីវេលាម៉ោងជិត៦ព្រឹកនេះ ។
សេចក្តីរាយការណ៍បន្តថា ដោយសារអាកាសធាតុនៅតែបន្តធ្លាក់ភ្លៀងមិនឈប់ឈរ ទីតាំងចាស់ដែលទើបស្រកបានប្រមាណ១ថ្ងៃ គឺចំណុចស្ពានស្ទឹងសំរោង ស្ថិតក្នុងភូមិស្ទឹងឆាយ ឃុំអូបាក់រទេះ ទឹកត្រូវបានសម្រុកឡើងខ្លាំង ហូរកាត់លើផ្លូវជាតិសារជាថ្មី រហូតសមត្ថកិច្ចផ្អាកមិនឲ្យរថយន្តឆ្លងកាត់ឡើយ ហើយចំណុចស្ពានស្ទឹងសំរោងនេះ គឺជាចំណុចលិចជារៀងរាល់ឆ្នាំ ដែលទទួលទឹកហូរចុះមកពីតំបន់ភ្នំមក ។
ប្រភពសមត្ថកិច្ចបានឲ្យដឹងថា ស្របពេលដែលទឹកបានលិចលើផ្លូវជាបន្ទាប់រថយន្តដែលធ្វើដំណើរទៅភ្នំពេញ ឬទៅតំបន់ផ្សេងៗដែលត្រូវឆ្លងកាត់ស្រុកកំពង់សិលាត្រូវបានសមត្ថកិច្ចស្រុកព្រៃនប់ ឃាត់ទាំងរថយន្តតូចធំត្រឹមរង្វង់មូលវាលរេញ ដោយឲ្យធ្វើដំណើរតាមផ្លូវជាតិលេខ៣ តាមខេត្តកំពតវិញ ។
គិតត្រឹមម៉ោងជិត១០ព្រឹក ទឹកដែលហូរកាត់លើចំណុចស្ពានអូរគគី ព្រំប្រទល់ខេត្តកំពង់ស្ពឺ រាងស្រកតិចវិញ តែទឹកបានមកឡើងគំហុកនៅចំណុចស្ពានស្ទឹងសំរោងវិញ យ៉ាងណាចរាចរណ៍នៅតែបន្តផ្អាកពីសំណាក់សមត្ថកិច្ច ហើយរថយន្តមួយចំនួនធំដែលបានកកស្ទះនៅចំណុចទឹកលិចត្រូវបានបកក្រោយ ដោយធ្វើចរាចរណ៍តាមផ្លូងវជាតិលេខ៣ ឆ្លងកាត់ខេត្តកំពតវិញ ។
បច្ចុប្បន្នសមត្ថកិច្ចកំពុងគ្រប់គ្រងសភាពការណ៍នៅទីនោះយ៉ាងយកចិត្តទុកដាក់ ស្របពេលដែលទឹកនៅស្ទឹងសំរោងកំពុងគំហុកឡើង ៕
ចែករំលែកព័តមាននេះ