រាជធានីភ្នំពេញ ៖ បុរសម្នាក់បានប្រើប្រាស់ឧបករណ៍សំរាប់ឆក់ត្រីខុសបច្ចេកទេស បណ្តាលអោយឆក់ខ្លួនឯងស្លាប់នៅក្នុងទឹកបឹង បង្កអោយមានការភ្ញាក់ផ្អើលកាលពីវេលាម៉ោង៥និងល្ងាចថ្ងៃទី១៦ ខែកក្កដា ឆ្នាំ២០១៨ ក្នុងទឹកបឹងមួយកន្លែងក្រោយវត្តឫស្សីសាញ់ ភូមិប្រការ សង្កាត់ព្រៃស…
រាជធានីភ្នំពេញ ៖ បុរសម្នាក់បានប្រើប្រាស់ឧបករណ៍សំរាប់ឆក់ត្រីខុសបច្ចេកទេស បណ្តាលអោយឆក់ខ្លួនឯងស្លាប់នៅក្នុងទឹកបឹង បង្កអោយមានការភ្ញាក់ផ្អើលកាលពីវេលាម៉ោង៥និងល្ងាចថ្ងៃទី១៦ ខែកក្កដា ឆ្នាំ២០១៨ ក្នុងទឹកបឹងមួយកន្លែងក្រោយវត្តឫស្សីសាញ់ ភូមិប្រការ សង្កាត់ព្រៃស ខណ្ឌដង្កោ ។
ជនរងគ្រោះដែលស្លាប់ឈ្មោះ សុខ ដា ភេទប្រុស អាយុ៣៣ឆ្នាំ មុខរបរជាងប៉ះកង់ម៉ូតូ ស្នាក់នៅផ្ទះជួលភូមិទួលពង្រ សង្កាត់ចោមចៅ ខណ្ឌពោធ៍សែនជ័យ មានស្រុកកំណើត ស្រុកល្វាឯម ខេត្តកណ្ដាល មានប្រពន្ធឈ្មោះ អ៊ួ សុខនៅ អាយុ២៨ឆ្នាំ មុខរបរកម្មការិនីរោងចក្រ និងមានកូនស្រីម្នាក់ អាយុ៣ឆ្នាំ ។
តាមប្រភពព័ត៌មានពីសមត្ថកិច្ចបានអោយដឹងថា មុននឹងមានការភ្ញាក់ផ្អើលថាមានមនុស្សឆក់ស្លាប់ គឺមានបងប្អូនប្រជាពលរដ្ឋម្នាក់ដែលសុំមិនបញ្ចេញឈ្មោះបានចុះទៅដើររកត្រីនៅក្នុងបឹងខាងលើក៍ប្រទះឃើញបុរសម្នាក់បានស្លាប់លិចជាមួយនឹងកំប្លោក និងលើកដៃម្ខាងឡើងលើ ព្រមទាំងមានឧបករណ៍សំរាប់ឆក់ត្រីនៅក្បែរខ្លួនផង ។
តាមប្រភពព័ត៌មានបានបន្តទៀតថា ដោយប្រទះឃើញបែបនេះ ពលរដ្ឋម្នាក់នោះបានរត់ទៅប្រាប់គេឯងថាមានមនុស្សឆក់ស្លាប់នៅក្នុងបឹង បន្ទាប់ពីហេតុការណ៍នេះភ្ញាក់ផ្អើលឡើងបាន១៥នាទី ដំណឹងនេះបានឮដល់សមត្ថកិច្ចមូលដ្ឋាននាំគ្នាចុះទៅកន្លែងកើតហេតុ ហើយបានជិះទូកបន្តទៅពិនិត្យមើលសព លុះពេលទៅដល់ក៏ប្រទះឃើញសពជនរងគ្រោះបានស្លាប់នៅក្នុងបឹង ដោយមានការឧបករណ៍សំរាប់ឆក់ត្រីនៅក្បែរជនរងគ្រោះផងដែរ ទើបពួកគាត់បានផ្តល់ដំណឹងនេះបន្តមកក្រុមគ្រួសារជនរងគ្រោះ និងខាងជំនាញកោសល្យវិច្ច័យខណ្ឌដង្កោ និងជំនាញកោសល្យវិច្ច័យក្រុងភ្នំពេញ ចុះទៅពិនិត្យសពតែម្តង ។
បើតាមសម្តីសាច់ញាតិជនរងគ្រោះវិញបានអោយដឹងថា ពីមុនជនរងគ្រោះទៅរកត្រី គ្រាន់តែដាក់មងធម្មតានោះទេ ហើយឧបករណ៍សំរាប់ឆក់ត្រីនេះ គឺជនរងគ្រោះទិញទើបបានតែរយៈពេល២ថ្ងៃប៉ុណ្ណោះ ហើយគាត់ដើររកត្រីបែបនេះមិនមែនយកទៅលក់នោះ គឺសំរាប់ហូបនៅគ្រួសារតែប៉ុណ្ណោះ តែអកុសលអ្វីក៍ជួបហេតុការណ៍គួរឱ្យរន្ធត់បែបនេះ។
នៅក្នុងករណីនេះដែរ ក្រុមគ្រួសារជនរងគ្រោះមិនចង់ប្តឹងផ្តល់ ឬស៊ើបអង្កេតអ្វីនោះទេ គឺចង់យកសពជនរងគ្រោះទៅធ្វើបុណ្យភ្លាមៗ តែសមត្ថកិច្ចជំនាញក្រុងសុំធ្វើកោសល្យវិច្ច័យសិន ព្រោះសពជនរងគ្រោះមានស្នាមរយះក្បាលហូរឈាម ដូច្នេះហើយទើបសមត្ថកិច្ចសុំពិនិត្យអោយបានត្រឹមត្រូវ ថាករណីជនរងគ្រោះស្លាប់នេះបណ្តាលមកពីឆក់ឧបករណ៍សំរាប់ឆក់ត្រី ឬ មួយជាករណីឃាតកម្មអោយបានច្បាស់លាស់ ។
ក្រោយពេលកើតហេតុ បន្ទាប់ពីពិនិត្យសពរួចរាល់ហើយរកឃើញថាជនរងគ្រោះពិតជាស្លាប់ដោយសារឧបករណ៍ឆក់ត្រីឆក់ស្លាប់ពិតប្រាកដមែន ទើបប្រគល់សពជនរងគ្រោះអោយក្រុមគ្រួសារយកទៅធ្វើបុណ្យនៅស្រុកកំណើតតាមប្រពៃណី ៕
ចែករំលែកព័តមាននេះ