(គជប)បដិសេធសំណើរបស់លោក ខឹម វាសនា សុំវិសោធនកម្មច្បាប់បោះឆ្នោត

ថ្ងៃទី ១៦ ខែ កក្កដា ឆ្នាំ ២០១៨
ម៉ោង ២១:២៣
ស.សុខុម (អ៊ាង ម៉េងឡេង)

រាជធានីភ្នំពេញ ៖ លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត កាលពីថ្ងៃទី១៥ ខែកក្កដានេះ បានចេញសេចក្តីជូនដំណឹងដល់លោក ខឹម វាសនា ប្រធានគណបក្ស សម្ព័ន្ធដើម្បីប្រជាធិបតេយ្យ ដែលបានស្នើសុំឲ្យ(គជប) ធ្វើសោធនកម្មច្បាប់បោះឆ្នោត ចំណុច៨.១១.១ នៃបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រ អាណត្តិទី៦ (គជប)មិនអាចធ្វើតាមការស្នើសុំបានឡើយ។ យោងតាមលិខិតរបស់លោក ទេព នីថា បានលើកឡើងថា (គជប) បានទទួលលិខិតរបស់លោកប្រធានគណបក្សសម្ព័ន្ធ ដើម្បីប្រជាធិបតេយ្យ ចុះថ្ងៃទី១២ ខែកក្កដា ឆ្នាំ២០១៨ ស្នើសុំឲ្យ(គជប) ធ្វើវិសោធនកម្មចំណុច៩.១១.១នេះ។

ក្រោយពីពិនិត្យរួចលើទិដ្ឋភាពច្បាប់ និងបច្ចេកទេស(គជប) មិនអាចធ្វើតាមការស្នើសុំបានទេ។ ការសម្រេចរបស់(គជប) ដោយផ្នែកលើមូលដ្ឋានច្បាប់ និងបទពិសោធន៍។ ទី១.ការតម្រូវឲ្យអ្នកនោះឆ្នោតគូសសញ្ញាធិក(√) តែមួយដើម្បីគាំទ្រគណបក្សនយោបាយនៅលើសន្លឹកឆ្នោតគឺមិនឆ្លុះបញ្ចាំងពីបទប្បញ្ញត្តក្នុងកថាខណ្ឌទី២នៃមាត្រា១០៥ និងមាត្រា១២០ ដែលមានកំណត់លើរបៀបគូសលើសន្លឹកឆ្នោត ដែលចាត់ទុកជាបានការ តាមរយៈការគូសសញ្ញា។ តាមបទប្បញ្ញត្តនេះគ្មានចែងតម្រូវឲ្យអ្នកបោះឆ្នោតត្រូវតែគូសសញ្ញាធិក(√) តែមួយគត់ឡើយ មានន័យថា ឲ្យអ្នកបោះឆ្នោតគូសសញ្ញាទូទៅនៅលើសន្លឹកឆ្នោត លើកលែងតែគំនូស សញ្ញាណាដែលធ្វើឲ្យគេសម្គាល់បាននូវអត្តសញ្ញាណរបស់អ្នកបោះឆ្នោត។

ទី២.ការទទួលយកជាបាននូវគំនូសសញ្ញានេះត្រូវបានអនុវត្តតាំងតែពីការបោះឆ្នោតសភាធម្មនុញ្ញឆ្នាំ១៩៩៣ ដែលរៀបចំឡើងដោយអ៊ុនតាក់មកម្លេះ ហើយបទពិសោធន៍ដ៏ល្អ ហើយគំនូសសញ្ញាគាំទ្រនេះ ក៏ត្រូវបានអនុវត្តសម្រាប់ការបោះឆ្នោតក្រោយៗមកទៀតក្នុងគោលបំណងការពារសំឡេងគាំទ្ររបស់អ្នកបោះឆ្នោតក្នុងបរិបទប្រទេសកម្ពុជាយើង។ ទី៣.ម្យ៉ាងទៀតតាមការសិក្សាក្នុងប្រទេសជាច្រើន នៅលើពិភពលោកដូចជា ប្រទេសអង់គ្លេស គេមិនតម្រូវឲ្យអ្នកបោះឆ្នោតគូសសញ្ញាគាំទ្រ ជាក់ណាមួយនៅលើ សន្លឹកឆ្នោតនោះដែរ។ ទី៤.ស្ថិតក្នុងលក្ខខណ្ខដែល(គជប) បានកំណត់នេះគឺមិនធ្វើឲ្យប៉ះពាល់ដល់ការសម្ងាត់នៃការបោះឆ្នោតដូចបានចែងក្នុងមាត្រា១០៦ នៃច្បាប់បទបញ្ជារៀបចំ និងនីតិវិធីសម្រាប់បោះឆ្នោតអាណត្តិទី៦ទេ។

ជនណាដែលព្យាយាមដោយទុច្ចរិតក្នុងគោលបំណងកត់សម្គាល់ដើម្បីឲ្យដឹងថា អ្នកបោះឆ្នោតណាម្នាក់ ឬច្រើននាក់បានបោះឆ្នោតឲ្យគណបក្សនយោបាយណាមួយនឹងព្រមានពីប្រធានការិយាល័យរាប់សន្លឹកឆ្នោត។ ក្នុងករណីនៅតែធ្វើសកម្មភាពដដែលឡើងវិញជាលើកទី២នឹងត្រូវចាត់ទុកថា ជាការរំលោភលើគោលការណ៍សម្ងាត់នៃការបោះឆ្នោត ហើយជនដែលពាក់ព័ន្ធត្រូវបណ្តេញពីការិយាល័យរាប់សន្លឹកឆ្នោត និងត្រូវទទួលទោសស្របតាមច្បាប់ស្តីពីការបោះឆ្នោត៕