ខេត្តរតនគីរី ៖ កក្រើកហើយជំនួញឈើប្រណីត មេព្រៃមួយរូបចាប់រថយន្តសាំយ៉ុងដឹកឈើមួយគ្រឿងត្រូវបានឈ្មួញជាម្ចាស់ឈើហៅបក្សពួកមកតដៃបំណងរំដោះឡានដឹកឈើ។ ហេតុការណ៍នេះបានកើតឡើងកាលពីម៉ោង៣និង៣០នាទីរសៀល ថ្ងៃទី១៥ ខែកក្កដា ឆ្នាំ២០១៨ លើផ្លូវជាតិលេខ 78A ត្រង់ចំណុចលើទួលអូរត្រាវ ស្ថិតក្នុងភូមិភ្នំ សង្កាត់យក្សឡោម ក្រុងបានលុង ។
ក្នុងដំណើររឿងខាងលើត្រូវបានលោក ទន់ វីរភាព ជានាយរងផ្នែករដ្ឋបាលព្រៃឈើស្រុកអូរជុំ ជាអ្នកចុះចាប់ផ្ទាល់បានឲ្យដឹងថា នៅក្នុងសកម្មភាពចុះបង្ក្រាបនេះ គាត់មានគ្នា២នាក់ បានឃាត់រថយន្តសាំយ៉ុងដឹកឈើមួយគ្រឿងដែលមានស្លាកលេខ កំពង់ចាម 2A 5588 ពណ៌ស ផ្ទុកឈើប្រភេទធ្នង់ពេញមួយឡានសាំយ៉ុង បំណងយកទៅលក់នៅប្រទេសវៀតណាម តាមច្រកទ្វារអន្តរជាតិអូរយ៉ាដាវ។
លោកបានបន្តទៀតថា ពេលដែលលោកបានឃាត់រថយន្តដឹកឈើនោះ ម្ចាស់រថយន្តមិនព្រមឈប់ទេ ហើយបើកបន្តព្យាយាមរត់គេច ដោយឃើញសកម្មភាពមេឈ្មួញធ្វើបែបនេះលោកក៏បានយកដែកស្រួចចាក់បំបែកកង់ឡានដឹកឈើ រួចខាងក្រុមឈ្មួញមានគ្នាជាច្រើននាក់បានចាប់តោងដៃមេព្រៃមិនឲ្យចាក់កង់ឡាន និងរុញទ្រូងមេព្រៃឲ្យផ្ងារក្រោយ ព្រមទាំងមានបក្សពួកខាងឈ្មួញឈើពីរបីនាក់ទៀតមកតោងបំពង់ទីបគំរាមវ៉ៃមេព្រៃទៀតផង។
ចំណែកលោកមេព្រៃបានចាក់កង់ឡានបែកដូចបំណង ពេលនោះក្រុមឈ្មួញបានដូរកង់ឡានរត់ទៅមុខបន្តទៀត រួចមេព្រៃបានបើកឡានម៉ាកឡិចស៊ីស330 កាក់ឡានដឹកឈើបន្ត ខណៈនោះក្រុមឈ្មួញយកឡានស៊េរីទំនើប២គ្រឿងទៀតមកកៀររថយន្តមេព្រៃដូចនៅក្នុងរឿងភាពយន្តចឹង ធ្វើឲ្យប្រជាពលរដ្ឋដែលធ្វើដំណើរតាមដងផ្លូវមានការភ្ញាក់ផ្អើលយ៉ាងខ្លាំង ។ ក្នុងខណៈដេញកៀរគ្នានោះ រថយន្តមេព្រៃបានឆ្កូតថ្នាំខាងឆ្វេងយ៉ាងដំណំ ។
លោក ទន់ វីរភាព បានអះអាងថា អត់មានរបួសធ្ងន់ធ្ងរទេ គ្រាន់តែគ្រេច.កដៃខាងស្តាំ ខណៈដេញកៀគ្នានោះ រីឯរថយន្តដឹកឈើបានរត់គេចបានជាង20គីឡូម៉ែត្រ ហើយត្រូវចាប់បានវេលាម៉ោង៧យប់ក្នុងថ្ងៃដដែល ត្រង់ចំណុចភូមិបរកែវចាស់ ឃុំឡាមិញ ស្រុកបរកែវ។
បច្ចុប្បន្នវត្ថុតាងឈើ និងរថយន្តបានយកមករក្សាទុកនៅផ្នែករដ្ឋបាលព្រៃឈើស្រុកបរកែវ ហើយ។
ចែករំលែកព័តមាននេះ