រាជធានីភ្នំពេញ ៖ ក្នុងចំណោមកីឡាករគូអន្តរជាតិទាំង៤ នៅសង្វៀន Beeline ជ្រោយចង្វាប៉ុស្តិ៍លេខ៥ កាលពីថ្ងៃព្រហស្បតិ៍ ទី២១ មីនាកន្លងទៅ គឺមានតែគូប្រកួតរវាងកីឡាករ លាង ស៊ីពេជ្រ និងកីឡាករ ANNWA ជាជនជាតិអ៊ូសបេគីស្ថានប៉ុណ្ណោះ ដែលធ្វើឱ្យអ្នកទស្សនាជក់ចិត្តដិតអារម្មណ៍ជាងគេក្នុងការទស្សនា ។ អ្វីដែលធ្វើឱ្យគេកត់សម្គាល់ចំពោះគូនេះខ្លាំងក្លាបំផុតនោះ គឺដោយសារទាំង
រាជធានីភ្នំពេញ ៖ ក្នុងចំណោមកីឡាករគូអន្តរជាតិទាំង៤ នៅសង្វៀន Beeline ជ្រោយចង្វាប៉ុស្តិ៍លេខ៥ កាលពីថ្ងៃព្រហស្បតិ៍ ទី២១ មីនាកន្លងទៅ គឺមានតែគូប្រកួតរវាងកីឡាករ លាង ស៊ីពេជ្រ និងកីឡាករ ANNWA ជាជនជាតិអ៊ូសបេគីស្ថានប៉ុណ្ណោះ ដែលធ្វើឱ្យអ្នកទស្សនាជក់ចិត្តដិតអារម្មណ៍ជាងគេក្នុងការទស្សនា ។ អ្វីដែលធ្វើឱ្យគេកត់សម្គាល់ចំពោះគូនេះខ្លាំងក្លាបំផុតនោះ គឺដោយសារទាំង លាង ស៊ីពេជ្រ និង ANNWA សុទ្ធតែមានសមត្ថភាពវាយប្រហារគ្នាផាំងទៅផាំងមកដែលប្រៀបដូចជារន្ទះប៉ះរន្ទះ ដែលសូម្បីតែអ្នកមិនចូលចិត្តកីឡាប្រដាល់សោះ ក៏សម្តែងនូវអារម្មណ៍រន្ធត់នឹងការវាយលុករបស់គូនេះនៅលើសង្វៀនដែរ ។
គ្មានអ្នកណាមិនសរសើរនោះទេថា ក្រុមគណៈកម្មការប៉ុស្តិ៍លេខ៥លើកនេះនាំយកកីឡាករបរទេសមកប៉ះចំសុទ្ធតែជាជើងខ្លាំងល្អៗ។ តាំងពីគូអន្តរជាតិទី១ រហូតដល់គូអន្តរជាតិទី៤ គេកត់សម្គាល់ថា កីឡាករបរទេសម្នាក់ៗគ្មានអ្នកណាឡើងរេញដោយរងការរិះគន់ថា វាយមិនកើតដូចមុនឡើយ ។ សូម្បីតែគូអន្តរជាតិទី៣ ដែលអ្នកណាក៏មើលឃើញថាសន្លប់ក្រោមដៃកីឡាករកម្ពុជា គឺដោយសារតែកីឡាករថៃនោះភ្លាត់ស្នៀតតែប៉ុណ្ណោះ ។ ស្របគ្នាដែលក្នុងចំណោមគូអន្តរជាតិទាំង៤ គឺភាគីខាងបរទេសឈ្នះរហូតដល់ទៅ៣គូផង ទើបធ្វើឱ្យអ្នកទស្សនាភាគច្រើនកាន់តែសរសើរថា កីឡាករបរទេសដែលមានមុខឡើងប្រកួតនៅលើរេញសម្រាប់ថ្ងៃនោះ គឺសម្រាំងបានល្អ ហើយត្រូវចិត្តមហាជន ។ ទោះយ៉ាងណា ក្នុងចំណោមគូអន្តរជាតិទាំង៤ គឺមានតែគូអន្តរជាតិទី២ រវាងកីឡាករកម្ពុជា លាង ស៊ីពេជ្រ និងកីឡាករអ៊ូសបេគីស្ថាន ANNWA ប៉ុណ្ណោះដែលធ្វើឱ្យគេទាក់ទាញ និងចងចាំចំពោះការប្រកួតរបស់ពួកគេជាងគេ ។ នៅទឹកទី១ កីឡាករ លាង ស៊ីពេជ្រ រងកណ្តាប់ដៃកីឡាករ ANNWA រហូតត្រូវរាប់ពីរដង ដែលក្នុងពេលនោះគេស្ទើរតែមិនជឿថា លាង ស៊ីពេជ្រ អាចតស៊ូដល់ទឹកទី៥ ផង ។
ឈានដល់ទឹកទី២ និងទឹកទី៣ ឱកាសបានធ្លាក់ទៅលើកីឡាករ លាង ស៊ីពេជ្រ វិញម្តង ។ នៅក្នុងអំឡុងទឹកនេះគ្មានអ្នកទស្សនាណាម្នាក់មិនហើបគូទពីកៅអីនោះទេ ដោយក្រុមអ្នកទស្សនាស្ទើរគ្រប់គ្នាត្រូវគេឃើញស្ទុះក្រោកឈរព្រមៗគ្នា ហើយស្រែកហ៊ោកញ្ជ្រៀវទះដៃរហូតភ្លេចគិតពីការនឿយហត់ ពិសេសនៅពេល លាង ស៊ីពេជ្រ មានឱកាសវាត់កែង និងលើកជើងធាក់ចំកណ្តាលមុខ និងកណ្តាលទ្រូងផាំងៗ ធ្វើឱ្យ ANNWA អន់សាច់។ ប៉ុន្តែឈានចូលដល់ទឹកទី៤ ឱកាសដែលគេរំពឹងថានឹងអាចជួយឱ្យ លាង ស៊ីពេជ្រ ផ្តួលគូប្រកួតឱ្យសន្លប់ បែរជាធ្លាក់លើកីឡាករ ANNWA វិញម្តង ។ ក្នុងទឹកនេះ ANNWA បានវាត់កែងបក បោះរន្ទះជើង និងម៉ាត់ផាំងៗគួរឱ្យញាក់សាច់ ត្រង់ហ្នឹងហើយដែលគូនេះត្រូវគេប្រដូចថាជារន្ទះប៉ះរន្ទះ ហើយធ្វើឱ្យអ្នកទស្សនាជក់ចិត្តដិតអារម្មណ៍បំផុត ។ ឈានដល់ទឹកទី៥ កីឡាករទាំងពីរកាន់តែបង្ហាញនូវការតស៊ូក្នុងការប្រយុទ្ធ បើទោះជាក្នុងទឹកនេះ លាង ស៊ីពេជ្រ ត្រូវគេឃើញថាអស់ដៃអស់ជើងរលីង ហើយធ្វើឱ្យ ANNWA ដែលហៀបនឹងអស់ដៃអស់ជើងដូចគ្នា មានប្រៀបជាងតែបន្តិចនោះក៏ដោយ ។ គូនេះកីឡាករបរទេសឈ្នះពិន្ទុ ហើយក៏ជាលទ្ធផលដែលធ្វើឱ្យមហាជនអ្នកទស្សនាកោតសរសើរថា យុតិ្តធម៌បំផុតនោះផងដែរ ។
ចំពោះគូទី១ កីឡាករកងចក្រ ផ.ព្រះអីុន ជាជនជាតិថៃ ដែលគ្រោងជួបជាមួយកីឡាករ អ៊ុង វិរៈ នោះបែរជាត្រូវដូរឱ្យទៅប្រកួតជាមួយកីឡាករ ពេជ្រ សីហា ជាជំនួសវិញ ។ សម្រាប់គូនេះដ្បិតថាមិនសូវទាក់ទាញចំណាប់អារម្មណ៍ពីអ្នកទស្សនាប៉ុន្មាន ប៉ុន្តែក៏មានឥទ្ធិពលធ្វើឱ្យអ្នកទស្សនាផ្តល់សំឡេងហ៊ោកញ្ជ្រៀវណាស់ដែរ ។ ពេជ្រ សីហា ដែលអ្នកណាក៏មើលឃើញថា បង្ហាញនូវការតស៊ូមិនចាញ់ លាង ស៊ីពេជ្រ បានទទួលវាសនាដូចគ្នាគឺចាញ់ពិន្ទុកីឡាករជនជាតិថៃ ។
គូទី៣ កីឡាករ កេន ផីត ជនជាតិថៃគឺជាកីឡាករអន្តរជាតិតែម្នាក់គត់ដែលទទួលជោគវាសនាចាញ់ក្រោមដៃកីឡាករកម្ពុជា ដោយត្រូវសន្លប់ក្នុងទឹកទី៣ ក្រោមដៃកីឡាករ ឡុង សុភី។ គូនេះក៏ធ្វើឱ្យអ្នកទស្សនាជក់ចិត្តណាស់ដែរ បើទោះភាគរយនៃការផ្តល់សម្រែកហ៊ោកញ្ជ្រៀវត្រូវគេមើលឃើញថា ចាញ់គូអន្តរជាតិទី២ ក៏ដោយ ។
ដោយឡែក គូទី៤ គឺកីឡាករ សែន ឆាយណយ មកពីប្រទេសថៃ បានបំបាក់មុខកីឡាករ អូត ភូថង របស់កម្ពុជាឱ្យចាញ់ពិន្ទុដោយអស់ចិត្តបំផុតនៅចុងបញ្ចប់នៃការប្រកួត។ អ្នកទស្សនាដោយផ្ទាល់នៅសង្វៀនប៉ុស្តិ៍លេខ៥ គ្រប់គ្នាសរសើរថា ស្ថាប័ននេះកំពុងធ្វើឱ្យអ្នកស្នេហាកីឡាប្រដាល់មានទំនុកចិត្តដូចអំឡុងជាង១០ឆ្នាំមុនវិញហើយ បន្ទាប់ពីកែទម្រង់ផ្តល់ពិន្ទុកាន់តែយុតិ្តធម៌ និងសម្រាំងបានកីឡាករខ្មែរ និងបរទេសឱ្យឡើងរេញប្រកួតគ្នានាពេលនេះ ៕
ចែករំលែកព័តមាននេះ