រាជធានីភ្នំពេញ ៖ កីឡាករ ហេង វិឆ័យ មកពីក្លិបកងពលតូចលេខ៧០ នឹងត្រូវប្រកួតជាមួយកីឡាករ ផល សុផាត មកពីក្លិបកងរាជអាវុធហត្ថរាជធានីភ្នំពេញនៅលើសង្វៀនស្ថានីយទូរទស្សន៍ CTN នាថ្ងៃអាទិត្យ ទី២៤ មីនាខាងមុខនេះ ក្នុងវគ្គជម្រុះវិលជុំចុងក្រោយពូល B ពានរង្វាន់ K-cement ទម្ងន់៦៥គីឡូក្រាម ។
រវាងគូនេះទាំងសងខាងសុទ្ធតែត្រូវការឈ្នះដូចគ្នាដើម្បីគេចឱ្យផុតពីការហាលខោ ឬការធ្លាក់ចេញពីវគ្គជម្រុះក្នុងពូល ព្រោះការប្រកួតទាំង២លើកម្នាក់កន្លងមក គឺចាញ់ម្តងម្នាក់ដូចគ្នា ដូច្នេះសម្រាប់ការប្រកួតលើកនេះមានតែអ្នកឈ្នះប៉ុណ្ណោះទើបមានសង្ឃឹមថា នឹងអាចឡើងទៅប្រកួតនៅវគ្គ ១/២ផ្តាច់ព្រ័ត្រជាបន្តទៀតបាន ។ ហេង វិឆ័យ ប្រកួតលើកទី១ចាញ់ ជាម អាដាំ ដោយពិន្ទុ ប៉ុន្តែលើកទី២ឈ្នះពិន្ទុ ឡុង សុវណ្ណពៅ ។ ចំណែក ផល សុផាត ប្រកួតលើកទី១ឈ្នះពិន្ទុ ឡុង សុវណ្ណពៅ ប៉ុន្តែលើកទី២ ចាញ់ពិន្ទុ ជាម អាដាំ វិញ ។ ដូច្នេះនៅក្នុងពូល B គេបានរកឃើញ ជាម អាដាំ ម្នាក់រួចហើយដែលត្រូវឡើងទៅប្រកួតនៅវគ្គ១/២ផ្តាច់ព្រ័ត្រមុនគេ ។ លើកនេះ ផល សុផាត និង ហេង វិឆ័យ ពិបាកព្យាករទុកមុនណាស់ព្រោះទាំងសងខាងមានល្បិចប្រកួតនៅលើសង្វៀនម្យ៉ាងម្នាក់ ។
ហេង វិឆ័យ ចរិតរបស់គេឆាប់ឆេវឆាវបន្តិច ម្យ៉ាងវិញទៀត ពេលខ្លះគេវាយអាងកម្លាំងបាយទៀតផង បើទោះជាគេចេះស្នៀតកែង និងជង្គង់ខ្លះៗក្តី ។ ប៉ុន្តែស្នៀតកណ្តាប់ដៃ និងស្នៀតជើងរបស់គេពេលទាត់ និងវាយចេញទៅម្តងៗមានទម្ងន់ធ្ងន់គួរសម មិនអាចបណ្តោយឱ្យវាយត្រូវផ្តេសផ្តាសបានទេ ចំណែកកម្លាំងរបស់គេអាចវាយបាន៥ទឹកពេញមិនលំបាកឡើយ ។
រីឯ ផល សុផាត វិញ គេមានចិត្តអំណត់គួរសម ប៉ុន្តែកម្លាំងរបស់គេរាងចុះខ្សោយជាងមុនបន្តិច ។ ផល សុផាត មានស្នៀតកណ្តាប់ដៃល្អព្រោះគេធ្លាប់ធ្វើជាអ្នកប្រដាល់សាកលអាជីពពីមុនមក ចំណែកស្នៀតកែង និងជង្គង់ប្រើការមិនសូវបានផលឡើយ ។ ចាំមើលរវាងពួកគេទាំង២នាក់ តើនរណាជាអ្នកដែលត្រូវហាលខោមុនគេ?
ក្រៅពីគូដណ្តើមខ្សែក្រវាត់នេះទៅនៅមានគូប្រកួតជាលក្ខណៈមិត្តភាពប្រចាំសប្តាហ៍នេះដែរដូចជា កីឡាករ សួង សុវណ្ណថា មកពីសមាគមកីឡាប្រដាល់ក្រសួងការពារជាតិ ជួបប្រកួតជាមួយកីឡាករ យស់ សំអាល់ មកពីក្លិបឃ្លាំងមឿងកីឡាខេត្តពោធិ៍សាត់ ។ កីឡាករ ថន មករា មកពីក្លិបឃ្លាំងមឿងកីឡាខេត្តពោធិ៍សាត់ ជួបប្រកួតជាមួយកីឡាករ ភិរម្យ ភក្តី មកពីក្លិបរកាខ្នុរគុនខ្មែរបង្ក្រាបគ្រឿងញៀន ។ កីឡាករ សោម ទឿទី មកពីក្លិបខ្លារខិនមានឫទ្ធិ ជួបជាមួយកីឡាករ មុត សំខាន់ មកពីក្លិបសាលវ័ន្តកីឡា ។ កីឡាករ ឈឿន ពិសី មកពីសមាគមកីឡាប្រដាល់ក្រសួងការពារជាតិ ជួបជាមួយកីឡាករ សូ សុផាត មកពីក្លិបតោមាសកីឡា ដែលជាការប្រកួតលក្ខណៈសាកលអាជីព ។ កីឡាករ ម៉ក់ ហេន មកពីក្លិបក្រុងប៉ោយប៉ែត ជួបជាមួយកីឡាករ វ៉ន សាវឿន មកពីក្លិបខេមរិន្ទមានឫទ្ធិ និងកីឡាករ រ៉ុង រិទ្ធី មកពីក្លិបច័ន្ទបុរីវង្ស ជួបជាមួយកីឡាករ ឈិន ឃ្លោក មកពីក្លិបពន្លឺវិបុល ៕
ចែករំលែកព័តមាននេះ