ខេត្តកំពង់ធំ ៖ អគ្គីភ័យបានឆាបផ្ទះមួយខ្នងបណ្តាលឱ្យឆេះស្លាប់ប្តីប្រពន្ធ២នាក់ ។ ហេតុការណ៍ដ៏រន្ធត់នេះបានកើតឡើងកាលពីវេលាមោង១០និង៣០នាទីយប់ ថ្ងៃទី១៤ ខែកក្កដា ឆ្នាំ២០១៨ ស្ថិតនៅតំបន់អូរក្រពើ ភូមិអូរគគី ឃុំបឹងល្វា ស្រុកសន្ទុកខេត្ត កំពង់ធំ ។
សមត្ថកិច្ចបានឲ្យដឹងថា ជនរងគ្រោះទាំង២នាក់ប្តីប្រពន្ធដែលស្លាប់ ប្តីឈ្មោះ ប៉ាង ហន អាយុ៣១ឆ្នាំ មុខរបរធ្វើចំការ និងប្រពន្ធឈ្មោះ ហ៊ន ធឿន អាយុ៣៨ឆ្នាំ មុខរបរធ្វើចំការ មានទីលំនៅភូមិកើតហេតុខាងលើ ។
តាមការបំភ្លឺពីសាក្សីឈ្មោះ ចាន់ ហន ភេទប្រុស អាយុ៨៧ឆ្នាំ ត្រូវជាឪពុកបង្កើតជនរងគ្រោះ និងអ្នកជិតខាងបាននិយាយថា មួយរយៈកន្លងមកនេះ ជនរងគ្រោះជាប្តីឈ្មោះ ប៉ាង ហន ចេះតែមានអាការ:ប្លែកៗ ដូចជាឃើញគេមករកព័ទ្ធចាប់ខ្លួន ចេះតែប្រច័ណ្ឌប្រពន្ធ និងអង្គុយក្នុងផ្ទះភ្លឹកៗតែម្នាក់ឯងជាដើម ។ ជនរងគ្រោះទាំពីរនាក់ប្តីប្រពន្ធនេះជាអ្នកធ្វើចំការ ហើយបានទិញប្រេងសាំងទុកនៅលើផ្ទះរបស់ខ្លួនចំនួនមួយប៊ីដុងចំណុះ៣០លីត្រ ដើម្បីទុកចាក់ម៉ាស៊ីនបាញ់ថ្នាំ និងចាក់ម៉ាស៊ីនកាត់ឈើក្នុងចំការរបស់ខ្លួន ដោយជនរងគ្រោះទាំង២នាក់ប្តីប្រពន្ធមានការធ្វេសប្រហែស ទើបធ្វើឲ្យមានការឆាបឆេះផ្ទះមួយខ្នងធ្វើអំពីឈើ ជញ្ជាំងក្តារ ដំបូលប្រក់សង្ក័សីមានទំហំ៥ម៉ែត្រគុណនឹង៦ម៉ែត្រ និងឆេះខ្លួនឯងស្លាប់បាត់បង់ជីវិតទាំងពីរនាក់ប្តីប្រពន្ធតែម្តង ។
ក្រោយពីទទួលបានពត៏មាននេះភ្លាម កំលាំងជំនាញមានខេត្តនិងស្រុកដឹកនាំដោយលោកវរសេនឺយ៍ទោ ប៉ោ គឹមថុង នាយរងការិយាល័យបច្ចេកទេសខេត្តកំពង់ធំបានចុះទៅដល់ទីកន្លែងកើតហេតុ ដើម្បីធ្វើការពិនិត្យ។
លទ្ឋផលនៃការពិនិត្យ សមត្ថកិច្ចឃើញនៅកន្លែងកើតហេតុត្រូវបានភ្លើងឆេះផ្ទះ និងឆេះសពសុសអស់ទៅហើយ នៅសល់តែឆ្អឹង និងគំនរផេះ ហើយការស្លាប់របស់ជនរងគ្រោះទាំងពីរនាក់នេះគឺដោយសារការធ្វេសប្រហែស ទុកប្រេងសាំងនៅលើផ្ទះបណ្តាលឲ្យឆេះស្លាប់ពិតប្រាកដមែន មិនមានពាក់ព័ន្ឋនឹងអំពើឃាតកម្មឡើយ ។
ក្រោយពិនិត្យទីកន្លែងកើតហេតុរួចរាល់ សមត្ថកិច្ចបានប្រគល់សពជូនក្រុមគ្រួសារដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ