ចៅក្រមចេញដីកាបង្គាប់លោក សម រង្ស៊ី ចូលឆ្លើយករណីប៉ុនប៉ងកាត់ទឹកដីឲ្យបរទេស
- ភ្នំពេញ
រាជធានីភ្នំពេញ ៖ លោករស់ ពិសិដ្ឋ ចៅក្រមស៊ើបអង្កេតនៃសាលាដំបូងរាជធានីភ្នំពេញ កាលពីថ្ងៃទី១៣ ខែកក្កដា ឆ្នាំ២០១៨ បានចេញដីកាបង្គាប់ឲ្យលោក សម…
រាជធានីភ្នំពេញ ៖ លោករស់ ពិសិដ្ឋ ចៅក្រមស៊ើបអង្កេតនៃសាលាដំបូងរាជធានីភ្នំពេញ កាលពីថ្ងៃទី១៣ ខែកក្កដា ឆ្នាំ២០១៨ បានចេញដីកាបង្គាប់ឲ្យលោក សម រង្ស៊ី អតីតប្រធានគណបក្សសង្គ្រោះជាតិចូលទៅកាន់សាលាដំបូងរាជធានីភ្នំពេញ នៅថ្ងៃទី១៣ ខែសីហា ឆ្នាំ២០១៨វេលាម៉ោង៩និង០០នាទីព្រឹក ដើម្បីសួរចម្លើយដែលត្រូវបានអយ្យការអមសាលាដំបូងរាជធានីភ្នំពេញប្តឹងចោទពីបទ«ប៉ុនប៉ងប្រគល់ឲ្យរដ្ឋបរទេសនូវដែនដីជាតិមួយផ្នែក» ។
យោងតាមដីកាបង្គាប់ចុះថ្ងៃទី១៣ ខែកក្កដា ឆ្នាំ២០១៨ ដែលអាជ្ញាធរបាននាំយកទៅបិទនៅអតីតស្នាក់ការកណ្តាលរបស់គណបក្សនៅថ្ងៃទី១៦ ខែកក្កដា ២០១៨ ស្ថិតតាមបណ្តោយផ្លូវជាតិលេខ២ សង្កាត់ចាក់អង្រែលើ ខណ្ឌមានជ័យ ។
លោកចៅក្រម រស់ ពិសិដ្ឋ បានបញ្ជាក់ថា ៖ សំណុំរឿងនេះត្រូវដាក់ក្រោមការត្រួតពិនិត្យក្រោមបទ«ប៉ុនប៉ងប្រគល់ឲ្យរដ្ឋបរទេសនូវដែនដីជាតិមួយផ្នែក» ប្រព្រឹត្តទៅនៅរាជធានីភ្នំពេញ និងកន្លែងផ្សេងទៀត កាលពីថ្ងៃទី១៤ ខែមេសា ឆ្នាំ២០១៣ បទល្មើសដែលមានចែងឲ្យផ្តន្ទាទោសតាមប្បញ្ញតិមាត្រា២៧ និងមាត្រា៤៤០នៃក្រមព្រហ្មទណ្ឌនៃប្រទេសកម្ពុជា ។ ចៅក្រមបង្កាប់ឲ្យឈ្មោះ សម រង្ស៊ី ចូលមកកាន់សាលាដំបូងរាជធានីភ្នំពេញថ្ងៃទី១៣ ខែសីហា ឆ្នាំ២០១៨ វេលម៉ោង៩ព្រឹក ដើម្បីសួរចម្លើយពាក់ព័ន្ធនឹងសំណុំរឿងខាងលើនេះ ។
លោកចៅក្រមបញ្ជាក់ « ក្នុងករណីមិនចូលតាមការកំណត់ខាងលើនេះទេ យើងនឹងចេញដីកាឲ្យនាំខ្លួនឬចាប់ខ្លួន»។ មេធាវី សំ សុគង់ ដែលការពារក្តីលោក សម រង្ស៊ី ក្នុងសំណុំរឿងជាច្រើននៅតុលាការនៅរសៀលថ្ងៃទី១៦ ខែកក្កដា ឆ្នាំ២០១៨ បានថ្លែងប្រាប់តាមទូរស័ព្ទថា លោកនៅមិនទាន់បានទទួលការពឹងពាក់ពីលោក សម រង្ស៊ី នៅក្នុងសំណុំរឿងនេះ ៕
ចែករំលែកព័តមាននេះ