ខេត្តកំពត ៖ ស្ត្រីម្នាក់ត្រូវបានអ្នកភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត នាំគ្នាចោទប្រកាន់ថា ចេះធ្វើអំពើអាប ធ្មប់ និងចេះមន្តអាគមអូមអាម (ផ្លូវងងឹត) ដែលកន្លងមកតែងតែបង្កហេតុធ្វើឲ្យមនុស្សឈឺ និងស្លាប់ជាហូរហែ ។
លុះមានរឿងកើតឡើងផ្ទួនៗបែបនេះ ទើបប្រជាពលរដ្ឋក្នុងភូមិចេះតែនាំគ្នាសរសេរបង្ហោះ (Facebook) ចោទប្រកាន់មកលើស្ត្រីម្នាក់នោះថា ជាអ្នកធ្វើអំពើមកលើសាច់ញាតិរបស់ខ្លួនឲ្យឈឺរ៉ាំរ៉ៃមើលមិនជា រហូតដល់មានអ្នកខ្លះស្លាប់ជាបន្តបន្ទាប់ទៀតផង។ ដោយឃើញគេចោទបែបនេះ ស្ត្រីរូបនេះបានមកប្តឹងសមត្ថកិច្ចឱ្យជួយរកយុត្តិធម៌។
ដោយមានហេតុការណ៍ខាងលើនេះ ទើបនៅរសៀលថ្ងៃទី១៥ ខែកក្កដា ឆ្នាំ២០១៨ ប្រជាពលរដ្ឋនៅក្នុងភូមិខាងលើជាច្រើនគ្រួសារមានប្រតិកម្មឈានដល់ប្រមូលផ្តុំគ្នានៅសាលាឃុំកំពង់ត្រាចខាងលិច ហើយបានធ្វើដំណើរមកកាន់ប៉ុស្តិ៍ប៉ូលិស ខណៈប្រជាពលរដ្ឋក្នុងភូមិដឹងថា ស្ត្រីដែលគេសង្ស័យថា ចេះអំពើអាបធ្មប់នោះ ត្រូវបានមកកាន់ប៉ុស្តិ៍ប៉ូលិស ដោយមានការសួរនាំពីសំណាក់អាជ្ញាធរឃុំ ស្រុក និងសមត្ថកិច្ចផងដែរ។
ក្នុងករណីនេះ ប្រជាពលរដ្ឋក្នុងភូមិកណ្តាលទួលទាំងមូលបានអះអាងថា កន្លងមកនេះ ឧស្សាហ៍មានអ្នកឈឺថ្កាត់ មានសភាពរ៉ាំរ៉ៃមើលមិនដែលជា ហើយអ្នកជំងឺទាំងនោះត្រូវបានស្លាប់ជាបន្តបន្ទាប់ ហើយករណីបែបនេះ បានកើតឡើងជាញឹកញាប់ និងជាយូរឆ្នាំមកហើយ ប៉ុន្តែអាជ្ញាធរ និងសមត្ថកិច្ចពុំចាប់អារម្មណ៍ឡើយ ក៏នាំគ្នាប្តឹងចោទប្រកាន់តែម្តង។
ព័ត៌មានពិស្តានឹងមានផ្សាយជូនលើកាសែតកោះសន្តិភាព
ចែករំលែកព័តមាននេះ