រាជធានីភ្នំពេញ ៖ ក្រសួងមហាផ្ទៃបានហាមមិនឲ្យប្រើប្រាស់មធ្យោបាយ សម្ភារ របស់រដ្ឋដើម្បីធ្វើយុទ្ធនាការបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ រដ្ឋសភា ឡើយ ។ នេះបើតាមសេចក្តីណែនាំក្រសួងហាមផ្ទៃដែលចេញផ្សាយកាលពីថ្ងៃទី១៤ ខែកក្កដា ឆ្នាំ២ ០១៨ ។
ការហាមឃាតរបស់ក្រសូងមហាផ្ទៃនេះបន្ទាប់គេឃើញមានរថយន្តដែលពាក់ស្លាកលេខ ខេមរភូមិន្ទ និងស្លាកលេខ នគបាល បានបិទរូបសញ្ញាគណបក្សកាលពីពេលថ្មីៗកន្លងមកនេះក្នុងការហែក្បូនឃោសនាបោះឆ្នោត ។
សេចក្តីណែនាំរបស់ក្រសួងមហាផ្ទៃបានលើកឡើងថា ដើម្បីឲ្យដំណើរការរៀបចំការបោះឆ្នោតជ្រើសតាំងតំណាងរាស្ត្រអាណត្តិទី៦ប្រព្រឹត្តិទៅដោយសេរី ត្រឹមត្រូវយុត្តិធម៌ គ្មានការគំរាមកំហែង និងស្របតាមច្បាប់បទបញ្ជា និងនីតិវិធីសម្រាប់ការបោះឆ្នោត ក្រសួងបានធ្វើការណែនាំជាបន្តបន្ទាប់ដល់មន្ត្រីរាជការ ស៊ីវិល អាជ្ញាធរដែនដីគ្រប់លំដាប់ថ្នាក់ និងមន្ត្រីនគបាលជាតិអនុវត្តន៍ឲ្យបានត្រឹមត្រូវ ប៉ុន្តែក្នុងរយៈពេលយុទ្ធនាបោះឆ្នោតរបស់គណបក្សនយោបាយកន្លងមកនេះបានពិនិត្យឃើញមានមន្ត្រីមួយចំនួនតូចបានប្រព្រឹត្តមិនត្រឹមត្រូវតាមការកំណត់នៃច្បាប់បទបញ្ជា និងនីតិវិធីសម្រាប់ការបោះឆ្នោតដែលជាហេតុធ្វើឲ្យមានការរិះគន់ពីសំណាក់សាធារណៈមតិក៏ដូចជាអ្នកនយោបាយមួយចំនួន ។
ក្រសួងមហាផ្ទៃក៏បានបញ្ជាក់ថា ក្នុងបំណងដើម្បីពង្រឹងស្មារតីទទួលខុសត្រូវអនុវត្តន៍តួនាទី ភារកិច្ចរបស់មន្ត្រីរាជការស៊ីវិល អាជ្ញាធរដែនដីគ្រប់លំដាប់ថ្នាក់ និងមន្ត្រីនគបាលជាតិក្រោមឱវាទក្រសួងមហាផ្ទៃបានរំលឹកថា ច្បាប់បទបញ្ជា និងនីតិវិធីសម្រាប់ការបោះឆ្នោតមានមិនឲ្យធ្វើសកម្មភាពមួយចំនួនក្នុងពេលយុទ្ធនាការឃោសនាបោះឆ្នោត និងក្នុងពេលបោះឆ្នោតដូចជា ៖ ការលើក ឬបិតស្លាកគណបក្ស និងសម្ភារឃោសនានៅលើកអគារ និងការរិយាល័យរបស់រដ្ឋ ឬកាត់ទទឹងផ្លូវសាធារណៈ ។ ការប្រើប្រាស់មធ្យោបាយដឹកជញ្ជូនអ្នកបោះឆ្នោតដែលជាសម្បត្តិរបស់រដ្ឋដើម្បីធ្វើការឃោសនា ឬការចួលរួមក្នុងសកម្មភាពនយោបាយ និងការដឹកជញ្ជូនអ្នកបោះឆ្នោតទៅកាន់ការិយាល័យបោះឆ្នោត ។ មធ្យោបាយដឹកជញ្ជូនជាទ្រព្យសម្បត្តិរបស់រដ្ឋត្រូវបានកំណត់មានរថយន្ត ទោចក្រយានយន្ត និងជលយានគ្រប់ប្រភេទដែលប្រើប្រាស់ស្លាកសញ្ញារាជការ រដ្ឋ ន.ប ឬ ខ.ម និងរាជរដ្ឋាភិបាល ។
ជាងនេះទៅទៀតក្រសួងមហាផ្ទៃក៏បានលើកឡើងដែរថា ការប្រមូលផ្តុំមន្ត្រីរាជការស៊ីវិល អាជ្ញា ធរដែនដីគ្រប់លំដាប់ថ្នាក់ និងមន្ត្រីនគរបាលជាតិ ដើម្បីបញ្ចុះបញ្ចូលស្វែងរកសម្លេង ឆ្នោតនៅក្នុងអគារ ឬការរិយាល័យរបស់រដ្ឋក៏ត្រូវហាមឃាត ។
ក្រសួងមហាផ្ទៃបន្ថែមទៀតថា សេចក្ដីណែនាំនេះគឺដើម្បីពង្រឹងស្មារតីទទួលខុសត្រូវអំពីការអនុវត្តន៍តួនាទី ភារកិច្ច របស់មន្ត្រីរាជការ អាជ្ញាធរ ដែនដី គ្រប់ជាន់ថ្នាក់ និងមន្ត្រីនគរបាលឲ្យបានល្អ ស្របតាមច្បាប់សម្រាប់ការបោះឆ្នោត ។
សូមជម្រាបថា អគ្គស្នងការនគរបាលជាតិ កាលពីថ្ងៃទី១៣ កក្កដា បានប្រកាសដាក់ពិន័យមន្ត្រីក្រសួងមហាផ្ទៃម្នាក់ដែលបានយកឡានរដ្ឋទៅបិទស្លាកគណបក្សប្រជាជនកម្ពុជា និងសម្រេចបញ្ជូនសំណុំរឿងនេះទៅគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យចាត់វិធានការបន្តតាមច្បាប់ ៕
ចែករំលែកព័តមាននេះ