ខេត្តព្រៃវែង ៖ បុរសស្រវឹងខួបម្នាក់បានចង.កធ្វើអត្តឃាតខ្លួនឯង រហូតស្លាប់បាត់បង់ជីវិត និងបង្កឲ្យមានការភ្ញាក់ផ្អើលទាំងព្រឹក នៅចំណុចភូមិរលួស ឃុំចាម ស្រុកកំពង់ត្របែក ខេត្តព្រៃវែង ។
បុរសជាជនរងគ្រោះខាងលើមានឈ្មោះ ផាន់ ម៉ាប់ អាយុ៣៩ឆ្នាំ មានទីលំនៅក្នុងភូមិកើតហេតុត្រូវបានគេប្រទះឃើញចង.កស្លាប់នៅលើដើមដង្កៀបក្តាម ចម្ងាយពីផ្ទះរបស់ជនរងគ្រោះប្រមាណជា៤០ម៉ែត្រ កាលពីវេលាម៉ោង៦ព្រឹកថ្ងៃទី១៦ កក្កដានេះ ។
ប្រភពពីក្រុមគ្រួសារជនរងគ្រោះបានឲ្យដឹងថា មុនពេលកើតហេតុនោះជនរងគ្រោះមិនមានទំនាស់ជាមួយក្រុមគ្រួសារ ឬអ្នកជិតខាងណាទេ ប៉ុន្តែឲ្យតែពេលស្រវឹងស្រាចេះតែចង់ស្លាប់ ហើយកន្លងមកគេធ្លាប់បានធ្វើអត្តឃាតខ្លួនឯង ដោយផឹកថ្នាំពុលម្តង និងចង.កខ្លួនឯង២លើករួចមកហើយ ប៉ុន្តែត្រូវបានក្រុមគ្រួសារឃើញ និងជួយសង្គ្រោះទាន់ទើបមិនស្លាប់ ហើយនៅលើកទី៣នេះ ដោយគ្មានអ្នកណាបានឃើញ និងជួយសង្គ្រោះទាន់ទើបបណ្តាលឲ្យស្លាប់បាត់បង់ជីវិតបែបនេះ ។
ដោយឡែកប្រភពព័ត៌មានពីសមត្ថកិច្ចបានឲ្យដឹងថា ក្រោយពីទទួលបានព័ត៌មានថា មានអ្នកចង.កសម្លាប់ខ្លួនភ្លាមកម្លាំងនគរបាលប៉ុស្តិ៍រដ្ឋបាលឃុំចាម និងកម្លាំងអធិការដ្ឋាននគរបាលស្រុកកំពង់ត្របែកបានចុះទៅដល់កន្លែងកើតហេតុធ្វើការពិនិត្យលើដងខ្លួននៃសពពុំឃើញមានស្លាកស្នាមរបួស ឬភស្តុតាងណាមួយបញ្ជាក់ថា ជាអំពើឃាតកម្មទេហេតុនេះហើយទើបសមត្ថកិច្ចសន្និដ្ឋានថា ជនរងគ្រោះពិតស្លាប់ដោយសារចង.កសម្លាប់ខ្លួនពិតមែន ហើយក៏បានប្រគល់សពទៅក្រុមគ្រួសារ រៀបចំធ្វើបុណ្យតាមប្រពៃណីតែម្តង ៕
ចែករំលែកព័តមាននេះ