ខេត្តតាកែវ៖ ជនសង្ស័យម្នាក់ត្រូវបានប៉ូលិសស្រុកសំរោងធ្វើការស្រាវជ្រាវឃាត់ខ្លួនពេលដែលជនសង្ស័យបានធ្វើសកម្មភាពឆក់កាបូបរបស់ប្រជាពលរដ្ឋនៅក្នុងភូមិ ។ ហេតុការនេះបានកើតឡើងវេលាម៉ោង០៤ល្ងាច ថ្ងៃទី១៤ ខែកក្កដា ឆ្នាំ២០១៨ នៅចំណុចភូមិឫស្សីជុំ ឃុំទ្រា ស្រុកសំរោង ខេត្តតាកែវ ។
លោកវរសេនីយ៍ឯក មឿង សារុន អធិការនគរបាលស្រុកសំរោងបានអោយដឹងថា លើកទី១នៅវេលាម៉ោង៨ព្រឹកជនសង្ស័យបានធ្វើសកម្មភាពឆក់កាបូបយួរដៃពីស្ត្រីម្នាក់ឈ្មោះ អ៊ូច ពៅ អាយុ៤៣ឆ្នាំ រស់នៅឫស្សីជុំ ឃុំទ្រា ស្រុកសំរោង និងលួចយកប្រាក់ចំនួន ៥០.០០០៛ (ប្រាំម៉ឺនរៀល)ក្នុងកាបូបរួចក៏ជិះម៉ូតូគេចខ្លួនបាត់ ។
លុះដល់វេលាម៉ោង១២និង៣០នាទីថ្ងៃត្រង់ ថ្ងៃខែឆ្នាំដដែលជនសង្ស័យដដែលបានធ្វើសកម្មភាពឆក់កាបូបម្ដងទៀតនៅចំណុចខាងកើតកោះព្នៅ ស្ថិតក្នុងភូមិសែនភាស ឃុំទ្រា ស្រុកសំរោង ដោយឆក់កាបូបយួរដៃរបស់ស្ត្រីរងគ្រោះម្នាក់ទៀតឈ្មោះ ច្រិង ផល្លី អាយុ២៤ឆ្នាំ រស់នៅភូមិអង្គរ ឃុំព្រែកផ្ទោល ស្រុកអង្គរបូរី ដោយក្នុងកាបូបមានទូរស័ព្ទដៃ១គ្រឿង ។
ក្រោយពេលកើតហេតុលោកឧត្តមសេនីយ៍ទោ សុខ សំណាង ស្នងការនគរបាលខេត្តបានបញ្ជាមករូបលោកដោយសហការជាមួយកម្លាំងប៉ុស្តិ៍នគរបាលរដ្ឋបាលបានចុះអន្តរាគមន៍ពួនស្ទាក់គ្រប់ច្រកល្ហករហូតឈានដល់ឃាត់ខ្លួនជនសង្ស័យខាងលើនៅចំណុចផ្លូវលំស្ថិតក្នុងភូមិទួលទ្រា ឃុំលំចង់ ស្រុកសំរោង ។
ហើយជនសង្ស័យឈ្មោះ សុ គីម ភេទប្រុស អាយុ២៨ឆ្នាំ រស់នៅភូមិបឹងត្រាញ់ ឃុំបឹងត្រាញ់ខាងត្បូង ស្រុកសំរោង និងដកហូតបានម៉ូតូ១គ្រឿងម៉ាកC125 ពណ៌ខ្មៅ ស៊េរីឆ្នាំ២០១៦ ពាក់ផ្លាកលេខ ភ្នំពេញ 1FP-0420 ដែលជនសង្ស័យជិះធ្វើសកម្មភាព ។
នៅចំពោះមុខសមត្ថកិច្ចជនសង្ស័យបានសារភាពថា រូបគេពិតជាបានជិះម៉ូតូធ្វើសកម្មភាពឆក់ការបូបពិតប្រាកដមែន ។ ជនសង្ស័យ និងវត្ថុតាងត្រូវបានសមត្ថកិច្ចកសាងសំណុំរឿងដើម្បីបញ្ជូនទៅសាលាដំបូងខេត្តចាត់ការទៅតាមច្បាប់ ៕
ចែករំលែកព័តមាននេះ