រាជធានីភ្នំពេញ ៖ នៅក្នុងឆមាសទី១ឆ្នាំនេះ បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុកើនឡើងជាង២៥% បើធៀបនឹងគ្រាដូចគ្នាកាលពីឆ្នាំ២០១៧ ។ នេះបើតាមការឲ្យដឹងពីប្រធានការិយាល័យស្ថិតិកំពង់ផែស្វយ័តក្រុងព្រះសីហនុ ។ លោក អ៊ុក…
រាជធានីភ្នំពេញ ៖ នៅក្នុងឆមាសទី១ឆ្នាំនេះ បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុកើនឡើងជាង២៥% បើធៀបនឹងគ្រាដូចគ្នាកាលពីឆ្នាំ២០១៧ ។ នេះបើតាមការឲ្យដឹងពីប្រធានការិយាល័យស្ថិតិកំពង់ផែស្វយ័តក្រុងព្រះសីហនុ ។
លោក អ៊ុក សុមេធី ប្រធានការិយាល័យស្ថិតិកំពង់ផែស្វយ័តក្រុងព្រះសីហនុ បានមានប្រសាសន៍កាលពីថ្ងៃទី១២ កក្កដា ថា ៖« ក្នុងរយៈពេល៦ខែដើមឆ្នាំកន្លងទៅនេះ យើងអនុវត្តបានសម្រាប់ទំនិញឆ្លងកាត់កំពង់ផែមានជាង២,៦លានតោន ក្នុងនោះកម្ពុជានាំចេញបានជាង៨៩ម៉ឺនតោន និងនាំចូលជាង១,៩លានតោន។ ជារួម រយៈពេល៦ខែកន្លងទៅនេះបរិមាណទំនិញឆ្លងកាត់កំពង់ផែកើនឡើងជាង២៥,៩៨% បើធៀបនឹងពេលដូចគ្នាកាលពីឆ្នាំ២០១៧ » ។ លោកបន្តថា ៖« កំណើននេះ បើតាមការកត់សម្គាល់ ដោយសារទំនិញប្រភេទជាកុងតឺន័រ ដែលមានជាសម្ភារប្រើប្រាស់ក្នុងវិស័យសំណង់ កើនខ្ពស់លើសផែនការដែលយើងគ្រោងទុក ព្រោះតែអំណោយផលសេដ្ឋកិច្ចល្អសម្រាប់ស្រុកខ្មែរយើង ធ្វើឱ្យការនាំចូលកើនឡើងខ្ពស់ » ។
បើតាមប្រធានការិយាល័យសិ្ថតិ មកដល់បច្ចុប្បន្ននេះ កម្ពុជាពុំទាន់មានផលិតផលណានាំចេញបានច្រើន ក្រៅពីផលិតផលសម្លៀកបំពាក់និងស្រូវអង្ករនោះទេ ហើយការនាំចូលមកកម្ពុជាវិញ មានដូចជា គ្រឿងចក្រ, ស៊ីម៉ងត៍, ធ្យូងថ្ម រួមនឹងទំនិញមួយចំនួនផ្សេងទៀតជាវត្ថុធាតុដើមសម្រាប់បម្រើក្នុងវិស័យកាត់ដេរ ។
លោករំពឹងថា ៖« នៅឆមាសបន្ទាប់ យើងសង្ឃឹមថា កំពង់ផែនឹងនៅតែទទួលបានកំណើនព្រោះយើងមានការចុះកិច្ចសន្យាត្រឹមត្រូវជាមួយនាវាដឹកជញ្ជូនកុងតឺន័រ ។ ម្យ៉ាងទៀត យើងទើបតែបានដាក់ឲ្យដំណើរការកំពង់ផែពហុបំណងមួយទៀត ដែលនឹងធ្វើឲ្យការប្រើប្រាស់ផែកំពង់ផែកាន់តែមានប្រសិទ្ធភាពថែមទៀត » ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់មានប្រសាសន៍ថា កំពង់ផែស្វយ័តក្រុងព្រះសីហនុ កាន់តែដើរតួនាទីយ៉ាងសំខាន់ក្នុងការដឹកជញ្ជូនទំនិញបានឆាប់រហ័ស ព្រមទាំងមានតម្លៃថោក សំដៅលើកកម្ពស់សមត្ថភាពប្រកួតប្រជែងរបស់កម្ពុជា ជាមួយប្រទេសជិតខាង និងប្រទេសក្នុងតំបន់ ។ ថ្លែងនៅក្នុងពិធីដាក់ឲ្យដំណើរការចំណតកំពង់ផែពហុបំណង កាលពីពេលថ្មីៗនេះ លោកទេសរដ្ឋមន្ត្រីគូសបញ្ជាក់ថា ៖« ចំណុចសំខាន់ គឺកំពង់ផែស្វយ័តក្រុងព្រះសីហនុ នឹងអាចស្រូបយកនូវចំណែកទីផ្សាររហូតដល់ជាង ៧០%នៃចរាចរទំនិញចេញ-ចូលសរុបរបស់ព្រះរាជាណាចក្រកម្ពុជា ។ ម្យ៉ាងវិញទៀត ចំណតផែពហុបំណងនេះ នឹងជួយគាំទ្រដល់មូលដ្ឋានភស្តុភារសម្រាប់ផ្គត់ផ្គង់ការរុករកប្រេង និងការធ្វើអាជីវកម្មប្រេងក្នុងដែនសមុទ្រកម្ពុជា ដែលនឹងជំរុញដល់ការអភិវឌ្ឍផែ្នកឧស្សាហកម្មប្រេងបន្ថែមទៀតផងដែរ » ។ លោកបន្តថា ៖« ដើម្បីឆ្លើយតបទៅនឹងការកើនឡើងនៃបរិមាណកុងតឺន័រឆ្លងកាត់កំពង់ផែនាពេលបច្ចុប្បន្ន និងក្នុងពេលអនាគត កំពង់ផែស្វយ័តក្រុងព្រះសីហនុ គ្រោងនឹងពង្រីកសមត្ថភាពរបស់កំពង់ផែថែមទៀត តាមរយៈការកសាងចំណតផែកុងតឺន័រថ្មីមួយទៀត ដែលមានជម្រៅទឹក១៤,៥ម៉ែត្រ ប្រវែង៣៥០ម៉ែត្រ » ។
គួររំឭកថា កាលពីខែសីហា ឆ្នាំ២០១៧ កន្លងទៅនេះ កំពង់ផែស្វយ័តក្រុងព្រះសីហនុ បានចុះហត្ថលេខាលើពិធីប្តូរសារ និងកិច្ចព្រមព្រៀងប្រាក់កម្ចីសម្បទានលេខ CP-P21 រវាងរាជរដ្ឋាភិបាលកម្ពុជា និងរាជរដ្ឋាភិបាលជប៉ុន លើគម្រោងសាងសង់ចំណតផែកុងតឺន័រទឹកជ្រៅនេះ ដោយគ្រោងនឹងសាងសង់នៅក្នុងឆ្នាំ២០១៩ ហើយបញ្ចប់នៅចុងឆ្នាំ២០២២ ឬដើមឆ្នាំ២០២៣ ដែលមានទឹកប្រាក់សរុបប្រមាណជា២០៣លានដុល្លារ ។ កំពង់ផែទឹកជ្រៅនេះ នឹងធានាដល់ការចូលចតនាវាកុងតឺន័រខ្នាតធំចំណុះ៦ម៉ឺនតោន រហូតដល់៩៣% នៃចំនួននាវាប្រចាំតំបន់អាស៊ី-ប៉ាស៊ីហ្វិកនៅដើមឆ្នាំ២០២៣។ ជាងនេះទៀត កំពង់ផែស្វយ័តក្រុងព្រះសីហនុ នឹងក្លាយទៅជាកំពង់ផែលំដាប់ថ្នាក់មធ្យម ដោយបរិមាណកុងតឺន័រឆ្លងកាត់ នឹងលើសពី១លានTEUs ក្នុង១ឆ្នាំ ។ រីឯតម្លៃដឹកជញ្ជូនតាមសមុទ្រទៅមកកម្ពុជា នឹងកាន់តែចុះទាបប្រហាក់ប្រហែលនឹងថ្លៃដឹកជញ្ជូនតាមសមុទ្រនៃប្រទេសជិតខាង ៕
ចែករំលែកព័តមាននេះ