ខេត្តកំពត ៖ ដោយសារតែការមានជំនឿទៅលើដើមឈើ១ដើម ដុះនៅកណ្តាលប្រាសាទតូចមួយ ដែលមានអាយុកាលរាប់រយឆ្នាំ ក៏បានក្លាយទៅជាពិធីបុណ្យមួយដ៏អធិកអធមនៅក្នុងវត្តប្រាសាទធ្វើឱ្យជំនឿកាន់តែផុសផុលឡើងគួរឱ្យកត់សម្គាល់ ។ ខណៈពេលដែលមានការធ្វើបុណ្យនោះ ក៏មានស្ត្រីម្នាក់ត្រូវបានគេចាត់ទុកថា បារមីចូលសន្ធិត…
ខេត្តកំពត ៖ ដោយសារតែការមានជំនឿទៅលើដើមឈើ១ដើម ដុះនៅកណ្តាលប្រាសាទតូចមួយ ដែលមានអាយុកាលរាប់រយឆ្នាំ ក៏បានក្លាយទៅជាពិធីបុណ្យមួយដ៏អធិកអធមនៅក្នុងវត្តប្រាសាទធ្វើឱ្យជំនឿកាន់តែផុសផុលឡើងគួរឱ្យកត់សម្គាល់ ។
ខណៈពេលដែលមានការធ្វើបុណ្យនោះ ក៏មានស្ត្រីម្នាក់ត្រូវបានគេចាត់ទុកថា បារមីចូលសន្ធិត បានធ្វើឱ្យអ្នកស្រុករាប់រយនាក់ ដែលទៅចូលរួមក្នុងពិធីមានការភ្ញាក់ផ្អើលគ្រប់ៗគ្នា ។ ពិធីបុណ្យនេះត្រូវបានរៀបចំធ្វើ កាលពីព្រឹកថ្ងៃ១៣ កក្កដា កន្លងមកនេះ ។ ដោយមានអ្នកស្រុកមកពីតាមឃុំនានានៅស្រុកអង្គរជ័យមកចូលរួមយ៉ាងកុះករ ។
ប្រាសាទដែលមានដើមឈើដុះចំកណ្តាលនេះកសាងពីថ្មបាយក្រៀម ស្ថិតក្នុងវត្តប្រាសាទ ដែលមានទីតាំងនៅជាប់នឹងផ្សារតានី ។ ទោះបីជាបែបណា គេពុំដឹងពីប្រវត្តិនៃប្រាសាទនេះទេ គ្រាន់តែដឹងថាធ្វើក្នុងសតវត្សរ៍ទី១០ ។ក្នុងពិធីបុណ្យដែលមានមនុស្សប្រុសស្រីចាស់ក្មេងចូលរួមយ៉ាងច្រើនកុះករនោះ លោកអាចារ្យក៏បានរៀបចំរណ្តាប់ក្រុងពាលី ថ្វាយអារុក្ខអារក្សអ្នកតាថែរក្សាដើមឈើផងដែរ ។ មនុស្សម្នាដែលទៅចូលរួមក៏នៅតែដណ្ដើមគ្នារើសស្លឹកឈើដែលជ្រុះមកពីលើ ។ អ្នកខ្លះដែលមិនទាន់បានស្លឹកឈើនឹងគេ បានព្យាយាមប្រណមសុំទេវតាប្រទាន ឱ្យស្លឹកឈើមួយសន្លឹកយកទៅដាំទឹកផឹកក្នុងជំនឿតៗគ្នាថាបានជាសះស្បើយពីរោគា ។
ពេលភ្លេងពិណពាទ្យកំពុងលេងថ្វាយ ស្រាប់តែមានស្ត្រីចំណាស់ម្នាក់នៅឃុំភ្នំកុង ស្រុកអង្គរជ័យ ត្រូវបានបារមីចូលសន្ធិតរាំមានក្បាច់រស់រវើកគួរឱ្យភ្ញាក់ផ្អើល ក្រោយមកស្ត្រីដែលថាបារមីចូលរូបនោះ ក៏ត្រូវបាននគរបាលហៅចេញទៅក្រៅ ។ បន្ទាប់មកទៀតក៏មានក្រុមរបាំពីខេត្តកំពត មករាំថ្វាយជូនអ្នកថែរក្សាដើមឈើដែលគេបានស្គាល់ថា ដើមឈើអាចម៍ដែក ដុះក្នុងប្រាសាទសតវត្សរ៍ទី១០ ។
ស្ត្រីអ្នកភូមិឈ្មោះ ជា ស្រីអូន អាយុ៣៦ឆ្នាំ ជាអាជីវកលក់ដូរនៅផ្សារតានី បាននិយាយប្រាប់ឱ្យដឹងថា ការរៀបចំធ្វើបុណ្យឱ្យដើមឈើដុះក្នុងវត្តប្រាសាទនេះ គឺជាការរួមគ្នាធ្វើដើម្បីសុំសេចក្ដីសុខ ។ ស្រី្តរូបនេះនិយាយថា នេះជាជំនឿរបស់ពលរដ្ឋបន្ទាប់ពីក្រុមជំនាញខាងមន្ទីរវប្បធម៌គ្រោងលើកគ្នាមកអារចោល ដោយសារខ្លាចរលំបាក់លើប្រាសាទ តែត្រូវបានអ្នកភូមិលើកគ្នារារាំងពួកមន្ត្រីទាំងនោះ ។
បានសង្កេតឃើញថា ពីធីបុណ្យដែលផ្ដើមចេញពីបេះដូងអ្នកមានជំនឿនោះ គេមិនឃើញមានមន្ត្រីរាជការណាចូលរួមទេ សូម្បីតែព្រះសង្ឃក៏មិនមានដែរ មានតែព្រះអនុគណ១អង្គឯងគត់ មកថតយករូបភាព ។ ទោះបីជាបែបនេះក្តីក្រុមអ្នកភូមិនៅតែមានការព្រួយបារម្ភថា ឈើមួយដើមនោះអាចរិចរិលអស់ ព្រោះពេលយប់ត្រូវបានមនុស្សខ្លះយកជំពាមកៅស៊ូបាញ់ស្លឹកឱ្យជ្រុះរើសយកលក់ដែលតាមតំលៃមួយសន្លឹកថ្លៃ៥ពាន់រៀល ។ ចំពោះវិធានការរបស់ក្រុមមន្ត្រីជំនាញក៏មិនទាន់ដឹងថាតើនឹងចាត់ការបែបណានៅឡើយទេចំពោះឈើ១ដើមនេះ ដើម្បីរក្សាការពារប្រាសាទដ៏តូចមួយកុំឱ្យបាក់រលំតទៅទៀត ៕
ចែករំលែកព័តមាននេះ