រាជធានីភ្នំពេញ ៖ បុរសជាកម្មកររោងចក្រម្នាក់ត្រូវបានអ្នកធ្វើការជាមួយគ្នា ប្រទះឃើញដេកស្លាប់ក្នុងបន្ទប់ផ្ទះជួល ដោយមិនដឹងមូលហេតុ បង្កការភ្ញាក់ផ្អើលជាខ្លាំងកាលពីវេលាម៉ោង៧ព្រឹកថ្ងៃទី១៦ ខែកក្កដា ឆ្នាំ២០១៨ ស្ថិតក្បែរវត្តអង្គពោធិ៍ញាណ ក្នុងភូមិឬស្សី សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
ប្រភពព័ត៌មានបានអោយដឹងថា ជនរងគ្រោះដែលស្លាប់ឈ្មោះ អ៊ុត យ៉ា ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់នៅផ្ទះជួលចំណុចកើតហេតុ និងមានស្រុកកំណើត នៅស្រុកកំពង់ត្របែក ខេត្តព្រៃវែង ។ រូបគេជាមនុស្សនៅលីវ ហើយបច្ចុប្បន្នស្នាក់នៅម្នាក់ឯង ។
តាមការរៀបរាប់របស់ស្ត្រីជាកម្មការនីរោងចក្រម្នាក់ដែលស្និទ្ធិស្នាលជាមួយជនរងគ្រោះបានអោយដឹងថា ជារៀងរាល់ពេលទៅធ្វើការនាងតែងជិះម៉ូតូទៅធ្វើការជាមួយជនរងគ្រោះ ព្រោះនាងគ្មានម៉ូតូជិះ ម្យ៉ាងវិញទៀតនាងស្នាក់នៅបន្ទប់ផ្ទះជួលក្បែរបុរសរងគ្រោះផងដែរ ។ នៅព្រឹកថ្ងៃកើតហេតុ ម៉ោងជិត៧ព្រឹក នាងបានទៅគោះទ្វារបន្ទប់បុរសរងគ្រោះជាច្រើនដង ដើម្បីហៅទៅធ្វើការ តែមិនឃើញបើកទ្វារសោះ ហើយពេលនោះនាងព្យាយាមស្រែកហៅ និងទូរស័ព្ទទៅច្រើនដងដែរ ក៏នៅតែមិនលើកដដែល ។
នាងបានបន្តទៀតថា ដោយចម្លែកក្នុងចិត្ត នាងបានពឹងអ្នកជាប់បន្ទប់អោយផ្លោះឡើងមើលតាមដំបូល ក៏ប្រទះឃើញបុរសរងគ្រោះដេកផ្កាប់មុខទៅនឹងពូក ហៅយ៉ាងណាក៏មិនព្រមក្រោកសោះ ។ ពេលនោះ ពួកគេបានរាយការណ៍ទៅសមត្ថកិច្ចអោយចុះអន្តរាគមន៍គាស់ទ្វារបន្ទប់ ដើម្បីចូលពិនិត្យមើលទើបដឹងថា បុរសខាងលើបានស្លាប់បាត់ទៅហើយ ។
ក្រោយការប្រទះឃើញបុរសរងគ្រោះដេកស្លាប់ កម្លាំងនគរបាលមូលដ្ឋាន សហការជាមួយនគរបាលកោសល្យវិច្ច័យចុះអន្តរាគមន៍ពិនិត្យលើសព ដើម្បីរកមូលហេតុ នៃការស្លាប់ ថាតើជាករណីដេកស្លាប់ដោយសារជម្ងឺ ឬជាអំពើឃាតកម្ម? គិតត្រឹមវេលាម៉ោង១០ព្រឹកថ្ងៃដដែលនេះ នគរបាលជំនាញពុំទាន់បញ្ជាក់ពីមូលហេតុនៃការស្លាប់របស់ជនរងគ្រោះនៅឡើយនោះទេ ខណៈកំពុងពិនិត្យយ៉ាងល្អិតល្អន់ ៕
ចែករំលែកព័តមាននេះ