ខេត្តបាត់ដំបង ៖ សមត្ថកិច្ចបានឃាត់ខ្លួនយុវជនម្នាក់ កាលពីរសៀលថ្ងៃទី១៤ ខែកក្កដា កន្លងទៅ ក្រោមបទសង្ស័យជាប់ពាក់ព័ន្ធនឹងករណីរួមភេទជាមួយអនីតិជនក្រោមអាយុ១៥ឆ្នាំ នៅឃុំសន្តិភាព ស្រុកសំពៅលូន ។ លោក ពេជ្រ សារ៉ែនអធិការនគរបាលស្រុកសំពៅលូន បានឲ្យដឹងថា យុវជនរូបនេះឈ្មោះអេន ចិន អាយុ២១ឆ្នាំ រស់នៅក្នុងឃុំខាងលើ រីឯក្មេងស្រីរងគ្រោះទើបមានអាយុ១៤ឆ្នាំ ។
យុវជន អេន ចិន បានត្រូវនគរបាលស្រុកសំពៅលូនឃាត់ខ្លួន ក្រោយពីម្តាយក្មេងស្រីបានប្ដឹងទៅសមត្ថកិច្ចឲ្យជួយអន្តរាគមន៍ ដោយចោទប្រកាន់យុវជននេះថា បានល្បួងកូនស្រីគាត់យកទៅរំលោភជាច្រើនលើកច្រើនសា ហើយទើបតែបែកធ្លាយរឿងអាស្រូវនៅពេលនេះ ដោយសារគាត់តាមទាន់ ។ លោកពេជ្រ សារ៉ែន បញ្ជាក់ថា ក្រោយពីទទូលបណ្ដឹងនេះ លោកស្នងការក៏បញ្ជាឲ្យកម្លាំងអធិការដ្ឋានស្រុករបស់លោកធ្វើការស្រាវជ្រាវឃាត់ខ្លួនភ្លាមៗដែរ ។
បើតាមសមត្ថកិច្ច គឺម្ដាយក្មេងស្រីបានប្រាប់ថា កន្លងមកគាត់មិនដែលដឹងថាកូនស្រីមានពាក់ព័ន្ធនឹងយុវជនឈ្មោះ អេន ចិន នេះទេ ទើបតែមួយរយៈចុងក្រោយនេះមានការសង្ស័យអំពីសកម្មភាពពួកគេ ។ លុះធ្វើការតាមដានសកម្មភាពពួកគេ ក៏បានតាមទាន់នៅពេលឈ្មោះចិន នាំកូនស្រីគាត់ទៅដើរលេងក្រៅខេត្ត ហើយគាត់ប្ដឹងសមត្ថកិច្ចឲ្យជួយអន្តរាគមន៍តែម្ដង ។ ក្រោយពីត្រូវឃាត់ខ្លួននេះ យុវជន អេន ចិន និយាយថា ខ្លួននិងក្មេងស្រីបានស្រឡាញ់គ្នាដោយស្មោះស្ម័គ្រ ហើយធ្លាប់បានរួមមេត្រីជាមួយគ្នា៣លើក និងចុងក្រោយនេះខ្លួននាំនាងដើរលេងក៏ត្រូវម្ដាយនាងតាមរកឃើញទើបបែកធ្លាយរឿងនេះតែម្ដងទៅ ។
លោកអធិការ ពេជ្រ សារ៉ែន ថ្លែងថា បើតាមការបំភ្លឺរបស់សាមីខ្លួនទាំង២នាក់ គឺពួកគេស្រឡាញ់គ្នា គ្មានអ្នកណាបង្ខំអ្នកណាទេ ប៉ុន្តែយ៉ាងណាក៏ដោយ យុវជនរូបនេះអាចត្រូវចោទប្រកាន់ពីបទរួមភេទជាមួយអនីតិជន ។ លោកអធិការ បានស្រង់សម្តីពួកគេថា ពួកគេបានស្រឡាញ់និងធ្លាប់រួមមេត្រីគ្នាកាលពីអំឡុងខែមិថុនាកន្លងទៅ ។ លោកអធិការបញ្ជាក់ថា យោងលើបណ្ដឹងម្ដាយក្មេងស្រី ពេលនេះលោកស្នងការខេត្តបានបញ្ជាឲ្យមន្ត្រីជំនាញសាកសួរយុវជនរូបនេះ ដើម្បីរៀបចំសំណុំរឿងបញ្ជូនទៅកាន់ស្នងការដ្ឋាននគរបាលខេត្តចាត់ការបន្តទៀត ៕
ចែករំលែកព័តមាននេះ