ខេត្តកណ្ដាល ៖ បុរសម្នាក់ត្រូវបាននគរបាលស្រុកស្អាងចាប់ខ្លួនបន្ទាប់ពីផឹកស្រាស្រវឹងខឹងឪពុកស្ដីប្រដៅវាយឪពុក និងដេញកាប់ឪពុកមារ បំផ្លាញសម្ភារម៉ដ្ឋ កាលពីវេលាម៉ោង២និង៣០នាទីរសៀល ថ្ងៃទី១៥ ខែកក្កដា នៅភូមិក្បាលកោះតូច ឃុំតាលន់ ស្រុកស្អាង ខេត្តកណ្ដាល ។
មន្ត្រីនគរបាលស្រុកស្អាងបានឱ្យដឹងថា ជនសង្ស័យដែលបានចាប់ខ្លួនឈ្មោះ នឿន លីណា ភេទប្រុស អាយុ១៨ឆ្នាំ មុខរបរកសិករ ។ ចំណែកជនរងគ្រោះចំនួន២នាក់ទី១-ឈ្មោះ នួន នឿន ភេទប្រុស អាយុ៤៩ឆ្នាំ មុខរបរកសិករ (ត្រូវជាឪពុក) មានស្នាមហើមមាត់ចំនួន១កន្លែង និងទី២-ឈ្មោះ អ៊ុត វង្ស ភេទប្រុស អាយុ៤៥ឆ្នាំ មុខរបររត់ម៉ូតូកង់បី អ្នកទាំងបីមានទីលំនៅៗភូមិកើតហេតុខាងលើ ។
នគរបាលបានឱ្យដឹងបន្ថែមថា នៅថ្ងៃកើតហេតុខាងលើឈ្មោះ នឿន លីណា មានសភាពស្រវឹងស្រាហើយមកដល់ផ្ទះវិញឪពុកបាននិយាយណែនាំអំពីការដើរផឹកស៊ីភ្លេចការងារផ្ទះភ្លាមនោះឈ្មោះ លីណា ខឹងឪពុកស្ដីបន្ទោសឲ្យខ្លួនក៏រុញឪពុក ហើយឪពុកបានទះមុខឈ្មោះ លីណា ចំនួនមួយដៃរំពេចនោះរូបគេក៏ស្ទុះធាក់ និងដាល់ឪពុកវិញបណ្ដាលឲ្យហើមមាត់ ។
ស្របពេលនោះឈ្មោះ អ៊ុត វង្ស បើករ៉ឺម៉កដឹកភ្ញៀវមកដល់ឃើញក៏ឈប់ហើយចុះជួយឃាត់ពេលនោះឈ្មោះ លីណា ក៏យកកាំបិត និងពូថៅដេញកាប់ឈ្មោះ វង្ស ត្រូវឈ្មោះ វង្ស រត់រួចកាប់មិនបានទេ ហើយក៏មកកាប់រ៉ឺម៉កកង់បី និងកាប់ម៉ូតូតែម្តង ។
ពេលទទួលបានព័ត៌មាននេះភ្លាមសមត្ថកិច្ចនគរបាលប៉ុស្តិ៍តាលន់បានអន្ដរាគមន៍ដល់កន្លែងកើតហេតុធ្វើការឃាត់ខ្លួនឈ្មោះ លីណា យកទៅកាន់ប៉ុស្ដិ៍សាកសួរ ។ បច្ចុប្បន្នជនសង្ស័យបានឃាត់ខ្លួននៅអធិការដ្ឋាននគបាលស្រុកស្អាងដើម្បីបន្ដអនុវត្តតាមនីតិវីធី ៕
ចែករំលែកព័តមាននេះ