មិនដឹងគាត់មកពីណាទៅណាទេ ស្រាប់តែ...គួរឱ្យអាណោចអាធ័ម

មិនដឹងគាត់មកពីណាទៅណាទេ ស្រាប់តែ…គួរឱ្យអាណោចអាធ័ម

ថ្ងៃទី ១៦ ខែ កក្កដា ឆ្នាំ ២០១៨

ម៉ោង ១០:២២

រាជធានីភ្នំពេញ ៖ បុរសម្នាក់ត្រូវរថយន្តធុនធំមិនចាំម៉ាកមួយគ្រឿងបានបុកស្លាប់ភ្លាមៗគួរឱ្យអាណោចអាធ័មនៅលើផ្លូវជាតិលេខ១ ។ ហេតុការណ៍នេះបានកើតឡើងកាលពីវេលាម៉ោង១២នឹង១៥នាទីរំលង
អធ្រាតឈានចូលថ្ងៃទី១៦ ខែកក្កដា នៅតាមបណ្តោយផ្លូវជាតិលេខ១ ទល់មុខផ្ទះលក់សំបកកង់រថយន្ត ភូមិជ្រោយអំពិល២ សង្កាត់ក្បាលកោះ ខណ្ឌច្បារអំពៅ។

ជនរងគ្រោះដែលស្លាប់ឈ្មោះ ហ៊ុន ស្រស់ ភេទប្រុស អាយុ៣៩ឆ្នាំ មុខរបរសន្តិសុខយាមនៅអគ្គិសនីច្បារអំពៅ ស្នាក់នៅកន្លែងធ្វើការ មានស្រុកកំណើតនៅភូមិឃ្នួង ឃុំខ្នារឃ្នួង ស្រុករំដួល ខេត្តស្វាយរៀង។

ប្រភពព័ត៌មានពីប្រជាពលរដ្ឋដែលបានឃើញហេតុការណ៍បានប្រាប់អោយដឹងថា បុរសដែលស្លាប់នេះមិនមែនជាអ្នករស់នៅក្នុងភូមិនោះទេ មុនកើតហេតុ ពួកគាត់ក៏មិនដឹងថាបុរសរងគ្រោះមកពីណាទៅណាដែរ គ្រាន់តែដឹងថាបុរសខាងលើដើរតាមផ្លូវ ហើយភ្លាមនោះស្រាប់តែឆ្លងផ្លូវតែមិនផុត ក៏ត្រូវរថយន្តកុងតឺន័រមួយគ្រឿងបើកបរក្នុងទិសដៅពីជើងទៅត្បូង បានបុកបុរសនោះពេញទំហឹងបណ្តាលអោយប៉ើងជាង៣០ម៉ែត្រ បាក់ជើងខាងឆ្វេង និងបែកក្បាលស្លាប់ភ្លាមៗនៅនឹងកន្លែងកើតហេតុ ហើយរថយន្តកុងតឺន័របានបន្ថែមល្បឿនគេចបាត់ស្រមោល។

ភ្លាមៗនោះដែរ ប្រជាពលរដ្ឋនៅទីនោះបានចេញមកជួយអន្តរាគមន៍ និងទាក់ទងសមត្ថកិច្ចចុះមកត្រួតពិនិត្យ និងទាក់ទងហៅសាច់ញាតិអោយមកទទួលយកសព ។ ក្រោយការវាស់វែង និងពិនិត្យរួច សពត្រូវបានប្រគល់អោយសាច់ញាតិដឹកយកទៅធ្វើបុណ្យនៅស្រុកកំណើត៕