ទីក្រុងសេអ៊ូល ៖ កាលពីថ្ងៃទី១៤ កក្កដា កន្លងមកនេះ ប្រទេសកូរ៉េខាងត្បូងបានសម្រេចចិត្តថា នឹងបង្កើនប្រាក់បៀវត្សរ៍អប្បបរមាប្រមាណ១០,៩% មកស្មើ៧,៤០ដុល្លារក្នុង១ម៉ោងនាឆ្នាំក្រោយ ប៉ុន្តែក្រុមអាជីវករតូចៗនិយាយថា ពួកគេនឹងមិនអនុវត្តតាមកំណែទម្រង់នេះទេ…
ទីក្រុងសេអ៊ូល ៖ កាលពីថ្ងៃទី១៤ កក្កដា កន្លងមកនេះ ប្រទេសកូរ៉េខាងត្បូងបានសម្រេចចិត្តថា នឹងបង្កើនប្រាក់បៀវត្សរ៍អប្បបរមាប្រមាណ១០,៩% មកស្មើ៧,៤០ដុល្លារក្នុង១ម៉ោងនាឆ្នាំក្រោយ ប៉ុន្តែក្រុមអាជីវករតូចៗនិយាយថា ពួកគេនឹងមិនអនុវត្តតាមកំណែទម្រង់នេះទេ ព្រោះសមាជិកជួបប្រទះនឹងបញ្ហា ខណៈសេដ្ឋកិច្ចកំពុងតែអន់ថយ ។
ប្រធានាធិបតីកូរ៉េខាងត្បូង លោក Moon Jae-In បានសន្យាថា នឹងបង្កើនប្រាក់បៀវត្សរ៍អប្បបរមា៥៥% មកស្មើប្រមាណ៨,៨ដុល្លារក្នុង១ម៉ោងនៅឆ្នាំ២០២០ ដើម្បីជំរុញដល់ការចំណាយ និងការលូតលាស់ក្នុងស្រុក ។
បន្ទាប់ពីការបញ្ចប់កិច្ចប្រជុំប្រមាណ១៩ម៉ោងកាលពីថ្ងៃសៅរ៍ គណៈកម្មការប្រាក់ឈ្នួលអប្បបរមាបានយល់ស្របថា នឹងបង្កើនប្រាក់ឈ្នួល ខណៈព្រួយបារម្ភពីកំណើនការងារអន់ថយ ។
យោងតាម Statistic Korea បានឲ្យដឹងថា ប្រទេសនេះបង្កើតការងារថ្មីៗបានជាមធ្យម១៤ម៉ឺន២ពាន់កន្លែងក្នុង១ខែ ចាប់ពីខែមករា ដល់ខែមិថុនាឆ្នាំនេះ ដែលជាចំនួនទាបជាងគេតាំងពីមានវិបត្តិហិរញ្ញវត្ថុសកលកាលពីឆ្នាំ២០០៨ និង២០០៩មក ។
ក្រុមអាជីវករតូចៗនិយាយថា ការបង្កើននេះ ជាការសម្រេចចិត្តឯកតោភាគី ហើយពួកគេនឹងពន្យារពេលអនុវត្តវា ។
សហព័ន្ធសហគ្រាសខ្នាតតូចកូរ៉េបាននិយាយក្នុងសេចក្តីថ្លែងការណ៍ថា ៖« ពួកយើងមិនអាចទទួលយកការសម្រេចចិត្តរបស់គណៈកម្មការប្រាក់ឈ្នួលទេ ។ ម្ចាស់អាជីវកម្មតូចៗកំពុងស្ថិតក្នុងស្ថានការណ៍មួយដែលត្រូវតែជ្រើស រើសរវាងការបិទអាជីវកម្ម ឬកាត់បន្ថយចំនួនបុគ្គលិក » ។
លោក Ryu Jang-Soo ប្រធានគណៈកម្មការនេះ បានថ្លែងថា ៖« ពួកយើងប្រហែលជាមិនអាចធ្វើឲ្យទាំងក្រុមហ៊ុន ទាំងបុគ្គលិកពេញចិត្តទេ ប៉ុន្តែបន្ទាប់ពីការជជែកគ្នាដ៏តានតឹង ពួកយើងស្នើជាកម្រិតដែលអាចជួយធ្វើឲ្យប្រាក់ចំណូលពលករល្អប្រសើរឡើង និងកាត់បន្ថយការដាក់កម្រិតលើប្រាក់ចំណូល ដោយមិនប៉ះពាល់ដល់សេដ្ឋកិច្ច និងការងារ ។ គណៈកម្មការនឹងដាក់សំណើទៅកាន់រដ្ឋាភិបាល ឲ្យជួយដល់អាជីវកម្មតូចៗដែលកំពុងជួបបញ្ហា » ។
អង្គការកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច បាននិយាយក្នុងរបាយការណ៍មួយកាលពីខែឧសភាថា ការបង្កើនប្រាក់បៀវត្សរ៍អាចធ្វើឲ្យការបង្កើតការងារអន់ថយ និងប៉ះពាល់ដល់ភាពប្រកួតប្រជែងរបស់កូរ៉េផងដែរ ប្រសិនបើគ្មានកំណើនប្រសិទ្ធភាពការងារទេនោះ ៕
ចែករំលែកព័តមាននេះ