រាជធានីភ្នំពេញ ៖ តារាចំរៀងម្ចាស់បទ «ដីថ្លៃប្រល័យស្នេហ៍» លោក ម៉ារ៉ា ប៊ុណ្ណា ទើបនឹងទិញរថយន្តទីកូមួយគ្រឿងទុកថត MV បទថ្មីរបស់ខ្លួនហើយងងុយដេកងោកមួយផាំងក៏ជ្រុលចង្កូតទៅបុកបង្កាន់ដៃស្ពានបណ្តាលអោយរងការខូចខាតរថយន្តយ៉ាងដំណំ ហេតុការណ៍នេះកើតឡើងកាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១៦ ខែកក្កដា ឆ្នាំ២០១៨ត្រង់ចំណុចគល់ស្ពានអាកាសស្ទឹងមានជ័យផ្នែកខាងលិច តាមបណ្តោយផ្លូវ២៧១ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ។
បើតាមសម្តីពីតារាចំរៀងលោក ម៉ារ៉ា ប៊ុណ្ណា បានឲ្យដឹងថា នៅមុនពេលកើតហេតុគាត់បានបើកបររថយន្តមួយគ្រឿងទីកូ ពណ៌ទឹកមាស ពាក់ស្លាកលេខ ច7124 ភព2 ទើបមកពីខេត្តបានធ្វើដំណើរតាមបណ្តោយផ្លូវ២៧១ក្នុងទិសដៅបើកមកពីវិទ្យាល័យ ជា ស៊ីមសាមគ្គី ឆ្ពោះទៅស្ពានអាកាសស្ទឹងមានជ័យ ។
លុះមកដល់ចំណុចកើតហេតុដោយសារតែគាត់ងងុយដេកខ្លាំងពេកងោកមួយផាំងបានរ៉េចង្កូតទៅបុកបង្កាន់ដៃស្ពានអាកាសស្ទឹងមានជ័យបណ្តាលឲ្យរថយន្តក្រឡាប់ផ្ងារជើង និងរងការខូចដាច់កាឡេកង់ខាងមុខចំហៀងខាងស្តាំ ចំណែកឯបង្កាន់ដៃស្ពានគឺពុំមានរងការខូចខាតនោះទេ ។ ភ្លាមៗនោះតារាចំរៀងជាអ្នកបើកបរក៏បានហៅប្រជាពលរដ្ឋដែលនៅក្បែរនោះអោយជួយរុញរថយន្តរបស់ខ្លួនយកទៅដាក់នៅចិញ្ចើមផ្លូវរួចក៏ឡើងជិះរថយន្តមួយគ្រឿងទៀតចេញទៅបាត់ទៅ ។
បើតាមសម្តីពីមិត្តភក្តិរបស់តារាចំរៀងជើងចាស់ខាងលើម្នាក់សូមមិនបញ្ចេញឈ្មោះបានឲ្យដឹងថា រថយន្តទីកូខាងលើនេះគឺលោក ម៉ារ៉ា ប៊ុណ្ណា ទើបតែទិញពីតារាចំរៀងម្នាក់ទៀតគឺនាយ ផ្លាក ទីន ។ ដោយមានបំណងយករថយន្តខាងលើទៅថត MV បទថ្មីរបស់គាត់ដែលគ្រោងនិងចេញក្នុងពេលឆាប់ៗនេះ តែមិនទាន់នឹងបានថតផងបែរជាទៅជួបគ្រោះថ្នាក់ចរាចរណ៍បណ្តាលអោយខូចខាតរថយន្តយ៉ាងដំណំបាត់ទៅហើយ ។
ក្រោយពេលកើតហេតុមិត្តភក្តិរបស់តារាចំរៀងខាងលើនោះបានទាក់ទងហៅរថយន្តស្ទូចមកធ្វើការស្ទូចយករថយន្តខាងចេញទៅបាត់ទៅដោយមិនឃើញមានសមត្ថកិច្ចមូលដ្ឋានចុះមកអន្តរាគមន៍នោះទេ ៕
ចែករំលែកព័តមាននេះ